பிஎஸ்என்எல் ரூ.280 கோடி லாபம்! தொடர்ந்து 2வது காலாண்டிலும் வளர்ச்சி!

18 ஆண்டுகளுக்குப் பிறகு தொடர்ச்சியான லாபத்தைப் பதிவு செய்துள்ளது பிஎஸ்என்எல் (BSNL). நிறுவனத்தின் மறுமலர்ச்சிக்கு மேம்பட்ட நிர்வாகம், அரசு ஆதரவு மற்றும் 4G/5G சேவைகள் முக்கிய காரணமாக அமைச்சர் ஜோதிராதித்ய சிந்தியா தெரிவித்தார்.

இந்தியாவின் பொதுத்துறை தொலைத்தொடர்பு நிறுவனமான பாரத் சஞ்சார் நிகாம் லிமிடெட் (BSNL), கடந்த 18 ஆண்டுகளுக்குப் பிறகு முதல் முறையாக தொடர்ந்து லாபம் ஈட்டியுள்ளதாக அறிவித்துள்ளது. மார்ச் 31, 2025 அன்று முடிவடைந்த நான்காவது காலாண்டில் இந்நிறுவனம் ரூ. 280 கோடி நிகர லாபத்தைப் பதிவு செய்துள்ளது. இது, கடந்த காலாண்டில் ஈட்டிய ரூ. 262 கோடி லாபத்தைத் தொடர்ந்து கிடைத்துள்ள இரண்டாவது தொடர்ச்சியான லாபமாகும்.

மாபெரும் திருப்புமுனை:

மத்திய தொலைத்தொடர்புத் துறை அமைச்சர் ஜோதிராதித்ய சிந்தியா இது குறித்துப் பேசுகையில், "18 ஆண்டுகளுக்குப் பிறகு, முதல் முறையாக, தொடர்ச்சியான காலாண்டுகளில் நிகர லாபத்தை பிஎஸ்என்எல் ஈட்டியுள்ளது. இது வெறும் இயக்க லாபம் (operating profit) அல்லது நேர்மறை வரம்பு (positive margin) மட்டுமல்ல, 2007 ஆம் ஆண்டுக்குப் பிறகு இரண்டாவது முறையாகக் காலாண்டு அடிப்படையில் நிகர லாபத்தைப் பதிவு செய்துள்ளது" என்று பெருமிதத்துடன் தெரிவித்தார்.

கடந்த நிதியாண்டின் (2023-24) இதே காலாண்டில் ரூ. 849 கோடி இழப்பை சந்தித்த பிஎஸ்என்எல், இந்த ஆண்டு லாபப் பாதைக்குத் திரும்பி இருப்பது ஒரு குறிப்பிடத்தக்க திருப்புமுனையாகப் பார்க்கப்படுகிறது. முழு நிதியாண்டு 2024-25க்கான நிறுவனத்தின் ஒட்டுமொத்த இழப்பும் ரூ. 5,370 கோடியிலிருந்து ரூ. 2,247 கோடியாக கடுமையாகக் குறைந்துள்ளது, இது 58% சரிவாகும்.

மேம்பட்ட நிர்வாகமும் அரசின் ஆதரவும்:

பிஎஸ்என்எல் நிறுவனத்தின் தலைவரும் நிர்வாக இயக்குநருமான ஏ. ராபர்ட் ஜே. ரவி இந்தச் சிறப்பான செயல்பாட்டிற்கு "தொழில்முறை நிர்வாகம், அரசு ஆதரவு மற்றும் வருவாய் மற்றும் லாபம் இரண்டிலும் கவனம் செலுத்துதல்" ஆகியவையே காரணம் என்று கூறினார். "பிஎஸ்என்எல் மீண்டும் உயிர் பெறுவது மட்டுமல்லாமல், மறுவரையறை செய்யப்படுகிறது" என்றும் அவர் தெரிவித்தார்.

வளர்ச்சிக்கு உந்துசக்தி:

நிறுவனம் செலவுகளைக் கட்டுப்படுத்துவதிலும், 4ஜி மற்றும் 5ஜி சேவைகளை விரைந்து செயல்படுத்துவதிலும் கவனம் செலுத்துவதாக ரவி கூறினார். "லாபத்தை எங்கள் இறுதி இலக்காக நாங்கள் கருதவில்லை. பொதுச் சேவையில் தொலைத்தொடர்பு சிறப்பை மறுவரையறை செய்வோம். நாங்கள் தொடர்ந்து சரியான விஷயங்களைச் செய்யும்போது, சிறந்த சேவையை வழங்கும் போது, சென்றடையாதவர்களை சென்றடையும் போது, அனைவரையும் உள்ளடக்கிய புதுமைகளை உருவாக்கும் போது, லாபம் இயற்கையாகவே அதிலிருந்து வரும்" என்று அவர் மேலும் விளக்கினார்.

2024-25 நிதியாண்டில் பிஎஸ்என்எல்-லின் இயக்க வருவாய் ஆண்டுக்கு ஆண்டு 7.8% அதிகரித்து ரூ. 20,841 கோடியாக உயர்ந்துள்ளது, முந்தைய ஆண்டில் இது ரூ. 19,330 கோடியாக இருந்தது குறிப்பிடத்தக்கது. மத்திய அரசின் ஆதரவு, 4ஜி/5ஜி தொழில்நுட்பப் பரிமாற்றம் மற்றும் மேம்படுத்தப்பட்ட நிர்வாகம் ஆகியவை பிஎஸ்என்எல்-லின் இந்த வளர்ச்சிக்கு முக்கிய காரணமாகும்.