iPhone 17e வந்தாச்சு! கம்மி விலையில் 'ப்ரோ' லெவல் அம்சங்கள் - இனி எல்லோரும் ஐபோன் வாங்கலாம்!

ஆப்பிளின் பட்ஜெட் ஸ்மார்ட்போனான ஐபோன் 17e (iPhone 17e) இந்தியாவில் அறிமுகப்படுத்தப்பட்டுள்ளது. மேக்சேஃப் சார்ஜிங், புதிய A19 சிப் மற்றும் 48MP ஃபியூஷன் கேமரா ஆகியவை இதன் முக்கிய அம்சங்கள். ரூ.64,900 ஆரம்ப விலையில், இதன் அடிப்படை ஸ்டோரேஜ் 256GB ஆகும்.

டெல்லி: பிரபல அமெரிக்க பிராண்டான ஆப்பிள், தனது 'பட்ஜெட்-ஃப்ரெண்ட்லி' ஸ்மார்ட்போனான ஐபோன் 17e-ஐ (iPhone 17e) இந்தியாவில் அறிமுகப்படுத்தியுள்ளது. ஐபோன் 17 சீரிஸின் மிகவும் குறைந்த விலை மாடலான ஐபோன் 17e, மேக்சேஃப் சார்ஜிங் ஆதரவு, புதிய A19 சிப், 48MP ஃபியூஷன் கேமரா அமைப்பு ஆகியவற்றைக் கொண்டுள்ளது. ஐபோன் 16e வடிவமைப்பிலிருந்து எந்த மாற்றமும் இல்லாததும், 60 ஹெர்ட்ஸ் டிஸ்ப்ளேவில் மேம்பாடு இல்லாததும் ஐபோன் 17e-யின் முக்கியக் குறைகளாகும்.

ஐபோன் 17e-யில் என்னென்ன புதுமைகள்?

ஆப்பிள் பட்ஜெட்-ஃப்ரெண்ட்லி என்று கூறினாலும், இந்தியாவில் ஐபோன் 17e-யின் ஆரம்ப விலை ரூ.64,900 ஆகும். இது கடந்த ஆண்டு வெளியான ஐபோன் 16e-யின் அடிப்படை விலையை விட ரூ.5,000 அதிகம் என்றாலும், ஐபோன் 17e-யின் அடிப்படை ஸ்டோரேஜை 128 ஜிபியிலிருந்து 256 ஜிபியாக ஆப்பிள் அதிகரித்துள்ளது. மார்ச் 4 முதல் ஐபோன் 17e-க்கான முன்பதிவு இந்தியாவில் தொடங்கும். மார்ச் 11 முதல் இந்த ஸ்மார்ட்போன் சந்தையில் கிடைக்கும். கருப்பு, வெள்ளை மற்றும் புதிதாக அறிமுகப்படுத்தப்பட்ட சாஃப்ட் பிங்க் ஆகிய மூன்று வண்ணங்களில் புதிய ஐபோன் 17e கிடைக்கும்.

ஐபோன் 16e உடன் ஒப்பிடும்போது, ஐபோன் 17e-யின் முக்கிய மேம்பாடு மேக்சேஃப் ஆதரவு ஆகும். Qi2 வயர்லெஸ் சார்ஜிங் மூலம் அதிகபட்சம் 15W வேகத்தில் சார்ஜ் செய்யலாம். ஐபோன் 16e-யில் இருந்த 7.5W வயர்லெஸ் சார்ஜிங்கை விட இது இருமடங்கு வேகம். USB-C போர்ட் மூலம் 20W அல்லது அதற்கு மேற்பட்ட அடாப்டரைப் பயன்படுத்தி சுமார் 30 நிமிடங்களில் 50 சதவீதம் வரை சார்ஜ் செய்ய முடியும் என ஆப்பிள் கூறுகிறது.

ஐபோன் 17e-யில் 3nm தொழில்நுட்பத்தில் உருவாக்கப்பட்ட A19 சிப் இடம்பெற்றுள்ளது. ஐபோன் 11 உடன் ஒப்பிடும்போது, இதன் டூயல் சிபியு அதிக செயல்திறனை வழங்கும் என்று ஆப்பிள் குறிப்பிடுகிறது. மேலும், ஐபோன் 17e-யில் உள்ள புதிய C1X மோடம் முந்தைய பதிப்பை விட வேகமானது மற்றும் அதிக ஆற்றல் திறன் கொண்டது. ஐபோன் 17e-யின் வீடியோ பிளேபேக்கில் அதிகபட்சமாக 26 மணிநேரம் வரை பேட்டரி ஆயுள் கிடைக்கும் என்று நிறுவனம் கூறுகிறது.

ஐபோன் 17e வடிவமைப்பு மாறவில்லை, கேமரா அம்சங்கள் இதோ

அதே சமயம், ஐபோன் 17e-யின் வடிவமைப்பு அதன் முந்தைய மாடலில் இருந்து பெரிய மாற்றங்களைக் கொண்டிருக்கவில்லை. ஏரோஸ்பேஸ் தர அலுமினிய ஃபிரேம் மற்றும் IP68 மதிப்பீடு நீர் மற்றும் தூசியை எதிர்க்கும் திறன் கொண்டது. ஐபோன் 17e-யின் 6.1 இன்ச் சூப்பர் ரெட்டினா XDR OLED டிஸ்ப்ளே, அதிகபட்சமாக 1200 நிட்ஸ் HDR பிரகாசத்தை வழங்கும். செராமிக் ஷீல்டு 2.2 பாதுகாப்பும் இதில் உள்ளது. ஆனால், திரையின் ரெஃப்ரெஷ் ரேட் 60Hz மட்டுமே என்பது ஐபோன் 17e-யின் முக்கியக் குறைபாடு. ஒற்றை பின்புற கேமராவாக இருந்தாலும், ஐபோன் 17e-யின் 48 மெகாபிக்சல் ஃபியூஷன் கேமரா உயர் தெளிவுத்திறன் கொண்ட படங்களையும் 2x டெலிஃபோட்டோ வசதியையும் வழங்குகிறது. 4K டால்பி விஷன் (60fps) வீடியோ பதிவையும் ஐபோன் 17e ஆதரிக்கிறது.