Minister Ramesh : விஐபி தரிசனமா? சேகர்பாபுவுக்கு அடிப்படை அறிவு இருக்கா? அமைச்சர் எஸ்.ரமேஷ் விளாசல்

Minister Ramesh Slams Sekar Babu : முன்னாள் அமைச்சர் சேகர்பாபுவுக்கு அடிப்படை அறிவு இருக்கிறதா என அறநிலையத்துறை அமைச்சர் எஸ்.ரமேஷ் கடுமையாக விமர்சித்துள்ளார்.

கோயில் நிர்வாகம் மற்றும் விஐபி தரிசனம் குறித்து முன்னாள் அறநிலையத்துறை அமைச்சர் பி.கே.சேகர்பாபு சமீபத்தில் விமர்சித்திருந்தார். இதற்கு பதிலடி கொடுக்கும் விதமாக, தற்போதைய அறநிலையத்துறை அமைச்சர் எஸ்.ரமேஷ் அவரை கடுமையாக சாடினார். சாதாரண தரிசனத்துக்கும், கோயில் பணிகளை ஆய்வு செய்வதற்கும் உள்ள வித்தியாசம் கூட முன்னாள் அமைச்சருக்கு தெரியவில்லையா என அவர் கேள்வி எழுப்பினார்.

"முன்னாள் அமைச்சருக்கு அடிப்படை அறிவு இருக்கிறதா என்றே எனக்குத் தெரியவில்லை. மதுரை மீனாட்சி அம்மன் கோயிலில் நடக்கும் கும்பாபிஷேக பணிகளை ஆய்வு செய்வதை எப்படி விஐபி தரிசனம்னு சொல்ல முடியும்? சாதாரண தரிசனம் வேற, கோயில் பணிகளை ஆய்வு செய்றது வேற," என்று ரமேஷ் கூறினார்.

கோயில் நிலங்களை பட்டாவுடன் விற்பனை செய்வதாக சில விளம்பரங்கள் வருவதாக புகார்கள் வந்துள்ளன. அப்படி போலி விளம்பரம் செய்பவர்கள் மீது அறநிலையத்துறை கடுமையான நடவடிக்கை எடுக்கும் என்றும் அவர் எச்சரித்தார். ஸ்ரீரங்கம் கோயில் நிலத்தை திமுக நிர்வாகி ஒருவர் ஆக்கிரமித்ததாக எழுந்த சர்ச்சை குறித்தும் அமைச்சர் பேசினார். "புகார் பொய் என்றால், அவர்கள் ஏன் முன்ஜாமீன் கேட்க வேண்டும்? விசாரணை அமைப்பு முன்பு ஆஜராகி விசாரணையை எதிர்கொள்ளலாமே. தப்பு செய்யலைன்னா பயப்பட வேண்டிய அவசியமே இல்லையே," என்று அவர் சுட்டிக்காட்டினார்.

ஸ்ரீரங்கம் கோயில் நில அபகரிப்பு விவகாரத்தில் சம்பந்தப்பட்ட திமுக நிர்வாகி மீது போலீஸ் விசாரணையை தொடங்கியுள்ளதாக ரமேஷ் தெரிவித்தார். மேலும், ஸ்ரீரங்கம் கோயில் சொத்துக்களில் வரி வசூல் மற்றும் பிற முறைகேடுகள் நடப்பதாக பல புகார்கள் வந்துள்ளதாகவும், உண்மையான புகார்கள் மீது நிச்சயம் ஆக்‌ஷன் எடுக்கப்படும் என்றும் அவர் கூறினார்.

ஸ்டாலின் மற்றும் உதயநிதிக்கு பதிலடி கொடுத்த அமைச்சர் ரமேஷ்

முன்னாள் முதல்வரும் திமுக தலைவருமான மு.க.ஸ்டாலின் சட்டசபை நிகழ்வுகள் குறித்து செய்த விமர்சனங்களுக்கும் ரமேஷ் பதிலடி கொடுத்தார். "மற்றவர்களைப் பார்க்க சகிக்கவில்லை என்று அவர் சொல்கிறார். அவரைப் பார்க்க சகிக்கவில்லை என்றால், அதற்கு காரணம் கொளத்தூர் எம்.எல்.ஏ அந்த தொகுதிக்கு எதுவுமே செய்யாததுதான். அதனால்தான் மக்கள் அவருக்கு ஓட்டு போடவில்லை," என்று ரமேஷ் விமர்சித்தார்.

உதயநிதி ஸ்டாலின் மற்றும் சட்டசபை நிகழ்வுகள் குறித்த விமர்சனங்களுக்கும் அவர் பதிலளித்தார். "கடந்த மூணு மாசமா உதயநிதி ஒரே பாட்டைத்தான் பாடிக்கிட்டு இருக்காரு. அவங்க தொடர்ந்து அதையேதான் பாடுறாங்க. சட்டசபை நிகழ்வுகளை சரியா கவனிச்சிருந்தா, யார் யார் அமைச்சர்கள்னு அவங்களுக்கு தெரிஞ்சிருக்கும். கிளாஸை கட் அடிக்கிறவங்க இப்படித்தான் பேசுவாங்க. முதல்ல கிளாஸை சரியா கவனிங்க," என்று அவர் கலாய்த்தார்.

திருச்சி மாவட்டம் அந்தநல்லூர் ஒன்றியம் திருச்செந்துறையில் பள்ளி மாணவர்களுக்கான விரிவாக்கப்பட்ட காலை உணவுத் திட்டத்தை தொடங்கி வைத்தபோதுதான் அமைச்சர் இந்த கருத்துகளைத் தெரிவித்தார். இந்த நிகழ்ச்சியில் மாணவர்களுக்கு அமைச்சர் சர்க்கரைப் பொங்கல் பரிமாறினார். காங்கிரஸ் மாநிலங்களவை எம்.பி கிறிஸ்டோபர் திலக், திருச்சி மாவட்ட ஆட்சியர் உள்ளிட்டோர் இந்த நிகழ்வில் கலந்து கொண்டனர்.

காலை உணவுத் திட்டத்தின் முக்கியத்துவம் குறித்து பேசிய ரமேஷ், குழந்தைகள் வெறும் வயிற்றோடு பள்ளிக்கு வரக்கூடாது என்றும், அவர்களுக்கு போதுமான ஊட்டச்சத்து கிடைக்க வேண்டும் என்றும் கூறினார். முன்னாள் முதல்வர் காமராஜர் காலத்தில் கொண்டுவரப்பட்ட மதிய உணவுத் திட்டத்தை நினைவுகூர்ந்த அவர், அந்த திட்டம் அடுத்தடுத்த அரசுகளால் எப்படி விரிவுபடுத்தப்பட்டது என்பதையும் சுட்டிக்காட்டினார்.

அமைச்சரின் தரவுப்படி, திருச்சி மாவட்டத்தில் விரிவாக்கப்பட்ட இந்த காலை உணவுத் திட்டம் 590 பள்ளிகளைச் சேர்ந்த 63,157 மாணவர்களுக்கு பயனளிக்கும். இதில் ஊரக ஊராட்சிப் பகுதிகளில் உள்ள 417 பள்ளிகள் (36,800 மாணவர்கள்), பேரூராட்சிகளில் உள்ள 33 பள்ளிகள் (5,845 மாணவர்கள்), நகராட்சிகளில் உள்ள 27 பள்ளிகள் (5,567 மாணவர்கள்), மாநகராட்சிப் பகுதியில் உள்ள 115 பள்ளிகள் (14,941 மாணவர்கள்) அடங்கும்.

வகுப்புகள் தொடங்கும் முன்பே மாணவர்களுக்கு காலை உணவு வழங்குவதும், மாநில அரசின் பள்ளி நலத்திட்டங்களின் ஒரு பகுதியாக அவர்களின் ஊட்டச்சத்தை மேம்படுத்துவதுமே இந்த திட்டத்தின் முக்கிய நோக்கமாகும்.