Anbil Mahesh : ரூ.100 கோடி ஊழல் புகார் எதிரொலி... முன்னாள் அமைச்சர் அன்பில் மகேஷ் வீட்டில் திடீர் ரெய்டு

CCB Raids Anbil Mahesh Home : தனியார் பள்ளிகளுக்கு அனுமதி வழங்கியதில் ரூ.100 கோடி லஞ்சம் வாங்கியதாக எழுந்த புகாரில், முன்னாள் அமைச்சர் அன்பில் மகேஷ் பொய்யாமொழி வீட்டில் மத்திய குற்றப்பிரிவு போலீசார் சோதனை நடத்தினர்.

தமிழ்நாட்டின் முன்னாள் பள்ளிக்கல்வித்துறை அமைச்சர் அன்பில் மகேஷ் பொய்யாமொழிக்கு சொந்தமான திருச்சிராப்பள்ளி, தென்னூரில் உள்ள அண்ணா நகர் வீட்டில் சென்னை மத்திய குற்றப்பிரிவு (CCB) போலீசார் புதன்கிழமை அதிரடி சோதனை நடத்தினர். தனியார் பள்ளிகளுக்கு அரசு அனுமதி வழங்க, சுமார் 100 கோடி ரூபாய் வரை லஞ்சம் வாங்கியதாக ஒரு புகார் எழுந்தது. அதன் அடிப்படையில்தான் இந்த அதிகாலை ரெய்டு நடந்ததாக தகவல்கள் சொல்கின்றன. இதுதொடர்பான ஆதாரங்களை திரட்ட, சென்னை மற்றும் திருச்சியில் அவருக்கு தொடர்புடைய பல இடங்களிலும் ஒரே நேரத்தில் அதிகாரிகள் சோதனையில் ஈடுபட்டனர்.

பள்ளிகளுக்கு அனுமதி வழங்கியதில் நடந்த முறைகேடுகள் மற்றும் பணப் பரிமாற்றங்களை கண்டுபிடிக்க, பல நகரங்களில் தீவிர விசாரணை நடந்து வருவதாக போலீஸ் அதிகாரிகள் உறுதிப்படுத்தியுள்ளனர். திருவெறும்பூர் தொகுதியில் இரண்டு முறை எம்.எல்.ஏ-வாக இருந்தவர் அன்பில் மகேஷ் பொய்யாமொழி. முந்தைய திமுக ஆட்சியில் பள்ளிக்கல்வித்துறை அமைச்சராக இருந்த இவர், 2026 தமிழ்நாடு சட்டசபை தேர்தலில் தோல்வியடைந்தார். இப்போது இந்த ஊழல் புகாரில் சிக்கியுள்ளதால், அவரது இடங்களில் போலீசார் தீவிரமாக சோதனை நடத்தி வருகின்றனர்.

அன்பில் மகேஷ் வீட்டில் ரெய்டு ஏன்?

தனியார் பள்ளி நிர்வாகங்களுடன் நடந்த பணப் பரிவர்த்தனைகள் மற்றும் அதுதொடர்பான ஆவணங்களை சரிபார்க்கவே இந்த சோதனை நடப்பதாக அதிகாரிகள் தரப்பில் தெரிவிக்கப்பட்டுள்ளது. முன்னதாக, செப்டம்பர் மாத தொடக்கத்தில், முன்னாள் அமைச்சர் கே.என். நேருவுக்கு சொந்தமான திருச்சி தில்லை நகர் வீடு மற்றும் அவருக்கு தொடர்புடைய இடங்களிலும் லஞ்ச ஒழிப்புத்துறை அதிகாரிகள் சோதனை நடத்தினர். அந்த சோதனையின் போது, நேருவின் வீட்டுக்கு வெளியே திமுக தொண்டர்கள் பெருமளவில் குவிந்தனர்.

லஞ்ச ஒழிப்புத்துறை சோதனை நடந்துகொண்டிருந்த அந்த நேரத்தில், முன்னாள் அமைச்சர் அன்பில் மகேஷ் பொய்யாமொழியும் நேருவின் வீட்டுக்கு நேரில் சென்றிருந்தார். நகராட்சி நிர்வாகம் மற்றும் குடிநீர் வழங்கல் துறையில் நடந்த முறைகேடுகள் தொடர்பாகத்தான் கே.என். நேரு மற்றும் சிலர் மீது லஞ்ச ஒழிப்புத்துறை வழக்கு பதிவு செய்திருந்தது. அவர் அந்த துறையின் அமைச்சராக இருந்தபோது, வேலைவாய்ப்பு, ஒப்பந்தங்கள் வழங்குதல் மற்றும் அதிகாரிகளின் இடமாற்றம் ஆகியவற்றில் ஊழல் நடந்ததாக புகார்கள் எழுந்தன.

இந்த துறை தொடர்பான புகார்களை விசாரிக்க சென்னை உயர் நீதிமன்றம் உத்தரவிட்டதை அடுத்து, லஞ்ச ஒழிப்புத்துறை எஃப்.ஐ.ஆர் பதிவு செய்தது. இந்த வழக்கில் நேரு, அவரது உறவினர்கள் மற்றும் பல அதிகாரிகளின் பெயர்களை விசாரணை அமைப்பு சேர்த்துள்ளது. அரசு வேலை வாங்கித் தருவதாகக் கூறி சுமார் 888 கோடி ரூபாய் வசூல் செய்ததாக ஒரு குற்றச்சாட்டு உள்ளது. இதுதவிர, சுமார் 1,020 கோடி ரூபாய் மதிப்பிலான ஒப்பந்தங்களில் முறைகேடு நடந்ததாகவும், சட்டவிரோத இடமாற்றங்கள் மற்றும் பணி நியமனங்கள் நடந்ததாகவும் புகார்கள் உள்ளன.

இந்த முறைகேடுகள் தொடர்பான விவரங்களை அமலாக்கத்துறை முன்னதாகவே மாநில அதிகாரிகளிடம் பகிர்ந்திருந்தது. அதன் பிறகே இந்த விவகாரம் தீவிர விசாரணைக்கு வந்தது. இருப்பினும், குற்றம் சாட்டப்பட்டவர்கள் மீதான லஞ்ச ஒழிப்புத்துறையின் மேல் நடவடிக்கைகளுக்கு சென்னை உயர் நீதிமன்றம் இடைக்காலத் தடை விதித்துள்ளது. அதேசமயம், இதுதொடர்பான சட்ட நடவடிக்கைகள் தொடர்ந்து நடந்து வருகின்றன.