அடித்து தூக்கும் மது விற்பனை.. ரூ.1000 கோடி நெருங்கும் வருவாய்.. புதுச்சேரி கலால்துறை அறிவிப்பு..

புதுச்சேரி வரலாற்றில் கலால் வருவாய், முதல் முறையாக 1000 கோடி ரூபாயை எட்ட உள்ளது.  

புதுச்சேரி மாநிலத்தில், கள்ளுக்கடைகள்-50, சாராயக்கடைகள்-80, மதுபான கடைகள்-284 என மொத்தம் 414 மதுப்பான கடைகள் உள்ளன. மாநிலத்தின் மொத்த வருவாயில், கலால் துறை பெரும் பங்காற்றுகிறது. இருப்பினும் கொரோனா தொற்று பரவல், ஊரடங்கு கட்டுபாடுகள் உள்ளிடவற்றால் கலால் வருவாய் பெரிதும் பாதித்தது. 

கடந்த 2019-20 ம் ஆண்டு கலால் வருவாய் 857 கோடி ரூபாயாக இருந்தது. இதில் 81.70 கோடி ரூபாய் அளவிற்கு சாராயம் விற்பனையாகி இருந்தது. 2020-21 ம் ஆண்டில் கொரோனா தொற்று பரவல் அதிகரித்தால், புதுச்சேரியில் கடுமையான ஊரடங்கு அமல்படுத்தப்பட்டது. இதன் காரணமாக 91 கோடி ரூபாய் அளவிற்கு வருவாய் இழப்பு ஏற்பட்டு, 766 கோடி ரூபாய் அளவிற்கு மட்டுமே கலால் துறைக்கு வருவாய் கிடைத்தது. இதனை தொடர்ந்து வருவாய் இழப்பினை சரிகட்ட, 20 சதவீத சிறப்புவரி விதிக்கப்பட்டது. இதன்காரணமாக, கலால் துறை வருவாய் உயர தொடங்கியது. தற்போது கொரோனா தொற்று குறைந்துள்ள சூழ்நிலையில், புதுச்சேரி மாநிலத்தின் கலால் வருவாய் முதல் முறையாக 1000 கோடி ரூபாயை எட்ட உள்ளதாக கலால்துறை துணை ஆணையர் சுதாகர் தெரிவித்துள்ளார்.

மேலும், மது கொள்முதல் முதல் விற்பனை வரை பல்வேறு நிலைகளில் 'செக்பாயின்ட்' அமைத்து கண்காணித்தோம் என அவர் குறிப்பிட்டார். பல குழுக்களை நேரடியாக மதுக்கடைகளுக்கு அனுப்பி, இருப்புகளை சோதனை செய்தோம். சட்டவிரோத மது விற்பனையை தடுக்க அனைத்து நடவடிக்கைகளையும் முடுக்கிவிட்டோம்.இதன் காரணமாக கலால் வருவாய், முதல் முறையாக 1000 கோடி ரூபாய் இலக்கினை தொட உள்ளதாக கூறுயுள்ளார். 

கலால் துறை ஆண்டு வருமானம் கோடியில்...

2016 -17 ம் ஆண்டு 671 கோடி
2017- 18 ம் ஆண்டு 789 கோடி
2018- 19 ம் ஆண்டு 850 கோடி
2019-20 ம் ஆண்டு 857 கோடி
2020-21 ம் ஆண்டு 766 கோடி
2021-22 ம் ஆண்டு 870 கோடி.