சர்வதேச பேட்டிங்க் தரவரிசையில் இரண்டாம் இடம் பிடித்தார் இந்திய மகளிரணி கேப்டன்…

சர்வதேச கிரிக்கெட் கவுன்சிலின் (ஐசிசி) ஒருநாள் கிரிக்கெட் போட்டிக்கான பேட்டிங் தரவரிசையில் இந்திய மகளிர் அணி கேப்டன் மிதாலி ராஜ் இரண்டாவது இடத்துக்கு முன்னேறியுள்ளார்.

அதேபோல், இந்திய அணியின் தொடக்க ஆட்டக்காரர்களான தீப்தி சர்மா 17 இடங்கள் முன்னேறி 38-ஆவது இடத்துக்கும், திருஷ் காமினி 11 இடங்கள் முன்னேறி 41-ஆவது இடத்துக்கும் வந்துள்ளனர்.

இவர்கள் இருவரும் இந்த இடத்துக்கு முன்னேறியிருப்பது இது முதல் முறையாகும்.

வங்கதேச அணி கேப்டன் ருமானா அகமது 4 இடங்கள் முன்னேறி, 31-ஆவது இடத்துக்கும், பாகிஸ்தானின் நைன் அபிதி 2 இடங்கள் முன்னேற்றம் கண்டு 26-ஆவது இடத்துக்கும் வந்துள்ளனர்.

தென் ஆப்பிரிக்கா கேப்டன் வான் நீகெர்க் பேட்டிங் பட்டியலில் 2 இடங்கள் முன்னேறி 12-ஆவது இடத்துக்கும், பந்துவீச்சாளர்கள் பட்டியலிலும் 2 இடங்கள் முன்னேறி 15-ஆவது இடத்துக்கும் முன்னேறியுள்ளார்.

பந்துவீச்சாளர்கள் பட்டியலில், பாகிஸ்தானின் சனா மிர் இரு இடங்கள் முன்னேறி 7-ஆவது இடத்தைப் பிடித்துள்ளார். இந்தியாவின் இடதுகை சுழற்பந்துவீச்சாளர் எக்தா பிஷ்த் 3 இடங்கள் முன்னேறி 11-ஆவது இடத்துக்கு வந்துள்ளார்.

தென் ஆப்பிரிக்காவின் சுன் லுஸ் 28-ஆவது இடத்துக்கும், வங்கதேச கேப்டன் ருமானா அகமது 29-ஆவது இடத்துக்கும், இலங்கையின் கேப்டன் இனோகா ரனவீரா 33-ஆவது இடத்துக்கும் முன்னேறியுள்ளனர்.

ஆல்-ரவுண்டர்கள் பட்டியலில், தென் ஆப்பிரிக்காவின் க்ளோ ட்ரையான் 13 இடங்கள் முன்னேறி 23-ஆவது இடத்துக்கும், சக வீராங்கணை மாரிஸானே காப் 2 இடங்கள் ஏற்றம் கண்டு 22-ஆவது இடத்துக்கு வந்துள்ளனர்.