தமிழகத்தில் கொரோனா சிகிச்சை: தனியார் மருத்துவமனைகளுக்கு எச்சரிக்கை
சுருக்கம்
தமிழ்நாட்டில் கொரோனா வைரஸ் தொற்று மீண்டும் அதிகரித்து வரும் நிலையில், தனியார் மருத்துவமனைகள் கொரோனா சிகிச்சைக்கு கூடுதல் கட்டணம் வசூலித்தால் கடும் நடவடிக்கை எடுக்கப்படும் என தமிழக பொது சுகாதாரத்துறை எச்சரிக்கை விடுத்துள்ளது.
தமிழ்நாட்டில் உள்ள தனியார் மருத்துவமனைகளில் கொரோனா சிகிச்சைக்கு கூடுதல் கட்டணம் வசூலித்தால் கடும் நடவடிக்கை எடுக்கப்படும் என பொது சுகாதாரத்துறை எச்சரிக்கை விடுத்துள்ளது.
கடந்த 2019 ஆம் ஆண்டு உலகம் முழுவதும் பரவி பெரும் அச்சுறுத்தலை ஏற்படுத்திய கோவிட்-19 எனப்படும் கொரோனா வைரஸ் தொற்று, தற்போது இந்தியா உட்பட பல நாடுகளில் மீண்டும் அதிகரிக்கத் தொடங்கியுள்ளது. இந்தியாவில் கர்நாடகம், தமிழ்நாடு, மகாராஷ்டிரா, கேரளா, தெலுங்கானா உள்ளிட்ட பல மாநிலங்களில் கொரோனா வைரஸ் பரவல் அதிகரித்து வருகிறது.
மத்திய சுகாதாரத்துறை அறிக்கை:
மத்திய சுகாதாரத்துறை வெளியிட்டுள்ள அறிக்கையின்படி, இந்தியாவில் இதுவரை 3,395 பேருக்கு கொரோனா தொற்று உறுதி செய்யப்பட்டுள்ளது. நேற்று (செவ்வாய்க்கிழமை) ஒரே நாளில் மட்டும் 685 பேருக்குப் புதிதாக தொற்று பாதிப்பு கண்டறியப்பட்டுள்ளது. இதில் கேரளா (1,336), மகாராஷ்டிரா (467), டெல்லி (375), குஜராத் (265), கர்நாடகா (234), மேற்கு வங்காளம் (205), தமிழ்நாடு (185) மற்றும் உத்தரபிரதேசம் (117) ஆகிய மாநிலங்களில் அதிக பாதிப்புகள் பதிவாகியுள்ளன.
கடந்த 24 மணி நேரத்தில் கொரோனா தொற்றால் 4 பேர் உயிரிழந்துள்ளனர். டெல்லி, கேரளா, கர்நாடகா மற்றும் உத்தரபிரதேசத்தில் தலா ஒருவர் உயிரிழந்துள்ளனர். கொரோனா பரவலை எதிர்கொள்ள அனைத்து மாநிலங்களும் தயார் நிலையில் இருக்க மத்திய சுகாதாரத்துறை அறிவுறுத்தியுள்ளது. மேலும், அரசு மற்றும் தனியார் மருத்துவமனைகளில் படுக்கைகள், ஆக்சிஜன், மருந்துகள் கையிருப்பு இருப்பதை உறுதி செய்யுமாறும் அறிவுறுத்தப்பட்டுள்ளது.
தனியார் மருத்துவமனைகளுக்கு எச்சரிக்கை:
இந்தச் சூழ்நிலையில், கொரோனா சிகிச்சைக்கு தமிழ்நாட்டில் உள்ள தனியார் மருத்துவமனைகளில் கூடுதல் கட்டணம் அல்லது சிறப்பு கட்டணம் வசூலிப்பதாகப் புகார்கள் எழுந்துள்ளன. இதனையடுத்து தமிழக பொது சுகாதாரத்துறை, தனியார் மருத்துவமனைகளுக்குக் கடும் எச்சரிக்கை விடுத்துள்ளது.
"கொரோனா தொற்று உறுதி செய்யப்பட்டால் தனியார் மருத்துவமனைகள் மாவட்ட இணை பொது சுகாதாரத்துறை அலுவலகத்தில் தெரியப்படுத்த வேண்டும். சிறப்பு கட்டணமோ அல்லது கூடுதல் கட்டணமோ வசூலிக்கக் கூடாது. வீரியம் இல்லாத கொரோனாவிற்கு கூடுதல் கட்டணம் வசூலித்தால் சம்பந்தப்பட்ட மருத்துவமனை நிர்வாகம் மீது கடும் நடவடிக்கை எடுக்கப்படும்" என்று தமிழக பொது சுகாதாரத்துறை தெரிவித்துள்ளது.
கொரோனா பரவலைக் கட்டுப்படுத்தவும், சிகிச்சையில் வெளிப்படைத்தன்மையை உறுதி செய்யவும் இந்த நடவடிக்கை எடுக்கப்பட்டுள்ளதாக சுகாதாரத்துறை அதிகாரிகள் தெரிவித்தனர்.