உலக ஸ்குவாஷ் சாம்பியன்ஷிப்: ஜெர்மனியை வீழ்த்தி காலிறுதியில் கால்பதித்தது இந்திய அணி...

World squash championship Indian team to go down to quarterfinals

உலக ஸ்குவாஷ் சாம்பியன்ஷிப் போட்டியில், ஜெர்மனியை 2-1 என்ற கணக்கில் வீழ்த்தி இந்திய ஆடவர் அணி காலிறுதிக்கு முன்னேறியது.

பிரான்ஸின் மார்சைல் நகரில் உலக ஸ்குவாஷ் சாம்பியன்ஷிப் போட்டியில் நடைபெற்று வருகிறது. இந்தப் போட்டியில் தரவரிசையில் 7-வது இடத்தில் இருக்கும் ஜெர்மனியை போட்டித் தரவரிசையில் 8-வது இடத்தில் இருக்கும் இந்தியா எதிர்கொண்டது.

இந்தியாவின் விக்ரம் சிங், 11-8, 11-1, 11-8 என்ற செட் கணக்கில் ஜெர்மனியின் ரூடியை வீழ்த்தினார். இதையடுத்து, இந்தியா 1-0 என்ற கணக்கில் முன்னிலை வகித்தது.

மற்றொரு ஆட்டத்தில், ஜெர்மனியின் சிமன் ரூஸ்னரிடம் 9-11, 11-4, 5-11, 11-6, 3-11 என்ற செட் கணக்கில் இந்தியாவின் சௌரவ் கோஷல் தோல்வியைச் சந்தித்தார். இதனால், இந்தியா - ஜெர்மனி 1-1 என்ற கணக்கில் சமநிலை வகித்தது.

இந்த நிலையில், இந்தியாவின் மகேஷ் மங்காவன்கர் (23), 11-6, 11-7, 11-4 என்ற செட் கணக்கில் ஜெர்மனியின் வாலண்டைன் ராப்பை வீழ்த்தியதையடுத்து  2-1 என்ற கணக்கில் வெற்றி பெற்று காலிறுதிக்கு இந்திய ஆடவர் அணி முன்னேறியது.

ஸ்குவாஷ் உலகத் தரவரிசை புதிய பட்டியல் நேற்று வெளியிடப்பட்டது. அதில், ஆடவர் பிரிவில் சௌரவ் கோஷல் ஐந்து இடங்கள் முன்னேறி 16-வது இடத்துக்கு வந்தார்.

இதேபோல், ஹரீந்தர் பால் சந்து 52-வது இடத்துக்கு முன்னேறியுள்ளார்

மகளிர் பிரிவில், ஜோஸ்னா சின்னப்பா 15-வது இடத்திலும், தீபிகா பல்லிகல் 20-வது இடத்திலும் உள்ளனர்.