யு-17 உலகக் கோப்பை: இங்கிலாந்து - ஸ்பெயின் அணிகள் இறுதிச்சுற்றில் மோதல்…

U-17 World Cup England - Spain teams finalize ...

பதினேழு வயதுக்கு உள்பட்டோருக்கான யு-17 உலகக் கோப்பை கால்பந்து போட்டியின் இறுதிச் சுற்றில் இங்கிலாந்து - ஸ்பெயின் அணிகள் வரும் சனிக்கிழமை கொல்கத்தாவில் மோதுகின்றன.

பதினேழு வயதுக்கு உள்பட்டோருக்கான யு-17 உலகக் கோப்பை கால்பந்து போட்டியின் அரையிறுதி கொல்கத்தாவில் சனிக்கிழமை நடைபெற்றது. இதில், இங்கிலாந்து அணி 3-1 என்ற கோல் கணக்கில் பிரேசில் அணியைத் தோற்கடித்தது. 

இந்த ஆட்டத்தில் இங்கிலாந்து வீரர் ரியான் பிரெவ்ஸ்டர் ஹாட்ரிக் கோலடித்து அசத்தினார். 10-வது நிமிடத்தில் முதல் கோலை அடித்த ரியான் 39 மற்றும் 77-வது நிமிடங்களில் அடுத்த இரு கோல்களை அடித்து ஹாட்ரிக் சாதனையை படைத்தார்.

இந்த உலகக் கோப்பை போட்டியில் அவர் அடித்த 2-வது ஹாட்ரிக் இதுவாகும். முன்னதாக காலிறுதியில் அமெரிக்காவுக்கு எதிராக அவர் ஹாட்ரிக் கோலடித்தார்.

அதேசமயத்தில் பிரேசில் தரப்பில் வெஸ்லே 21-வது நிமிடத்தில் கோலடித்ததார். ஆனால், அது வெற்றிக்கான கோலாக அமையவில்லை.

அதேபோன்று நவி மும்பையில் நடைபெற்ற மற்றொரு அரையிறுதியில் ஸ்பெயின் அணி 3-1 என்ற கோல் கணக்கில் மாலி அணியைத் தோற்கடித்தது.

ஸ்பெயின் தரப்பில் அபேல் ரூயிஸ் 19 மற்றும் 43-வது நிமிடங்களில் கோலடிக்க, அந்த அணி முதல் பாதி ஆட்டநேர முடிவில் 2-0 என்ற கோல் கணக்கில் முன்னிலைப் பெற்றது. 

பின்னர் நடைபெற்ற 2-வது பாதி ஆட்டத்தில் ஃபெரான் கோலடிக்க, ஸ்பெயின் 3-0 என்ற கோல் கணக்கில் முன்னிலை பெற்றது.

மறுமுனையில் போராடிய மாலி அணி 74-வது நிமிடத்தில் ஒரே ஒரு ஆறுதல் கோலடித்தது. இந்த கோலை டியே அடித்தார்.

கொல்கத்தாவில் சனிக்கிழமை நடைபெறும் 3-வது இடத்திற்கான ஆட்டம் மாலி - பிரேசில் அணிகள் இடையே நடைபெறுகிறது.