பியோங்சாங் குளிர்கால ஒலிம்பிக்: முதல் தங்கம் வென்று அசத்திய கனடா ஜோடி...

Pyongyang Winter Olympics Canada pair won first gold

பியோங்சாங் குளிர்கால ஒலிம்பிக் போட்டியில் ஃபிகர் ஸ்கேட்டிங் பிரிவில்  கனடா ஜோடி முதல் தங்கப் பதக்கத்தை வென்று அசத்தியது.  இதே நாளில் கனடா தனது 2-வது தங்கத்தையும் வென்றது.

பியோங்சாங் குளிர்கால ஒலிம்பிக் போட்டி-23-ல் பதக்கத்துக்கான போட்டிகள் யாவும் கடந்த சனிக்கிழமை தொடங்கின. இந்த நிலையில், 3-வது நாளான நேற்று பையத்லான், ஃபிகர் ஸ்கேட்டிங், ஃப்ரீஸ்டைல் ஸ்கையிங், ஸ்கை ஜம்பிங், ஸ்னோபோர்டு, ஸ்பீடு ஸ்கேட்டிங் ஆகிய 6 பிரிவுகளில் பதக்கப் போட்டிகள் நடைபெற்றன.

இதில் ஃபிகர் ஸ்கேட்டிங் போட்டியானது காங்னியூங் நகரில் உள்ள பனிச்சறுக்கு ஆட்ட மைதானத்தில் நடைபெற்றது. இப்போட்டியில் கனடாவின் டெசா விர்சு - ஸ்காட் மொயர் இணை 118.10 புள்ளிகளுடன் முதலிடம் பிடித்து தங்கத்தை கைப்பற்றியது.

பனியில் சறுக்கியவாறு சுமார் நான்கரை நிமிடங்கள் நடனம் நிகழ்த்திய டெசா - ஸ்காட் இணைக்கு இது 3-வது ஒலிம்பிக் போட்டியாகும்.

இதே போட்டியில் ஒலிம்பிக் கொடியின் கீழ் போட்டியிட்ட ரஷியாவின் எகாடெரினா பாப்ரோவா - டிமிட்ரி சோலோவீவ் இணை  வெள்ளிப் பதக்கம் வென்றது.

அமெரிக்காவின் மாயா ஷிபுடானி - அலெக்ஸ் ஷிபுடானி இணை வெண்கலப் பதக்கம் வென்றது.

மூன்றாவது நாள் முடிவில் பதக்கப் பட்டியலில் ஜெர்மனி 4 தங்கம், ஒரு வெள்ளி, 2 வெண்கலம் என 7 பதக்கங்களுடன் முதலிடத்தில் உள்ளது.

நெதர்லாந்து 3 தங்கம், 2 வெள்ளி, 2 வெண்கலம் என அதே 7 பதக்கங்களுடன் 2-வது இடமும், நார்வே 2 தங்கம், 4 வெள்ளி, 3 வெண்கலம் என 9 பதக்கங்களுடன் 3-வது இடமும் பிடித்துள்ளன.