போட்டி போட்டு விளையாடியும் சமனில் முடிந்தது இந்தியா ஏ – வங்கதேசம் போட்டி…

இந்தியா "ஏ' - வங்கதேசம் இடையிலான இரண்டு நாள் பயிற்சி கிரிக்கெட் ஆட்டம் சமனில் முடிந்தது.

இரண்டு நாள் பயிற்சி கிரிக்கெட் ஆட்டம் ஹைதராபாதில் நடைபெற்றது. இந்த ஆட்டத்தில் முதலில் பேட் செய்த வங்கதேச அணி 67 ஓவர்களில் 8 விக்கெட் இழப்புக்கு 224 ஓட்டங்கள் சேர்த்து டிக்ளேர் செய்தது. அந்த அணியில் அதிகபட்சமாக கேப்டன் முஷ்பிகுர் ரஹிம் 58, செளம்ய சர்க்கார் 52 ஓட்டங்கள் எடுத்தனர்.

இந்தியத் தரப்பில் அனிகெட் செளத்ரி 4 விக்கெட்டுகளை வீழ்த்தினார்.

இதையடுத்து பேட் செய்த இந்திய "ஏ' அணி முதல் நாள் ஆட்டநேர முடிவில் 21 ஓவர்களில் ஒரு விக்கெட் இழப்புக்கு 91 ஓட்டங்கள் எடுத்திருந்தது.

பி.கே.பன்சால் 40, ஷ்ரேயஸ் ஐயர் 29 ஓட்டங்களுடன் களத்தில் இருந்தனர்.

2-ஆவது நாளான திங்கள்கிழமை தொடர்ந்து ஆடிய இந்திய "ஏ' அணியில் வேகமாக ஓட்டங்கள் சேர்த்த ஷ்ரேயஸ் ஐயர் சதமடித்தார். அவர் 92 பந்துகளில் 4 சிக்ஸர், 12 பவுண்டரிகளுடன் 100 ஓட்டங்கள் எடுத்து மற்ற வீரர்களுக்கு வாய்ப்பு கொடுப்பதற்காக வெளியேறினார்.

ஷ்ரேயஸ் - பன்சால் ஜோடி 2-ஆவது விக்கெட்டுக்கு 159 ஓட்டங்கள் குவித்தது.

இதன்பிறகு பி.கே.பன்சால் 148 பந்துகளில் 1 சிக்ஸர், 11 பவுண்டரிகளுடன் 103 ஓட்டங்கள் சேர்த்து ரிட்டையர்ட் அவுட் முறையில் வெளியேற, பின்னர் வந்த ரிஷப் பந்த் 19, ஜக்கி 23, இஷன் கிஷான் 11, ஹார்திக் பாண்டியா 7 ஓட்டங்களில் நடையைக் கட்டினர்.

அப்போது இந்திய "ஏ' அணி 60.4 ஓவர்களில் 7 விக்கெட் இழப்புக்கு 287 ஓட்டங்கள் எடுத்திருந்தது.

இதன்பிறகு 8-ஆவது விக்கெட்டுக்கு சங்கருடன் இணைந்தார் சைனி. இந்த ஜோடி அசத்தலாக ஆட, இந்திய "ஏ' அணி 400 ஓட்டங்களைக் கடந்தது. சைனி 66 ஓட்டங்களில் ஆட்டமிழந்தார். சங்கர் - சைனி ஜோடி 115 ஓட்டங்கள் குவித்தது. சங்கர் சதமடித்தவுடன் இந்திய கேப்டன் அபிநவ் முகுந்த் டிக்ளேர் செய்தார்.

அப்போது இந்தியா 90 ஓவர்களில் 8 விக்கெட் இழப்புக்கு 461 ஓட்டங்கள் குவித்திருந்தது. சங்கர் 103, ஜெயந்த் யாதவ் 6 ஓட்டங்களுடன் களத்தில் இருந்தனர்.

வங்கதேசம் தரப்பில் சுபாஷிஸ் ராய், தைஜுஸ் இஸ்லாம் ஆகியோர் தலா 3 விக்கெட்டுகளை சாய்த்தனர்.

இந்த ஆட்டத்தில் வங்கதேச அணி 8 பெளலர்களை பயன்படுத்தியபோதும், இந்திய பேட்ஸ்மேன்களை கட்டுப்படுத்த முடியவில்லை.

பின்னர் ஆடிய வங்கதேச அணி ஆட்டநேர முடிவில் 15 ஓவர்களில் 2 விக்கெட் இழப்புக்கு 73 ஓட்டங்கள் எடுத்தது.

தமிம் இக்பால் 42, மகமதுல்லா 1 ஓட்டங்களுடன் ஆட்டமிழக்காமல் இருந்தனர்.

இந்தியத் தரப்பில் குல்தீப் யாதவ் 2 விக்கெட் வீழ்த்தினார்.

இறுதியில் ஆட்டம் சமனில் முடிந்தது.