ஹாங்காங் ஓபன் சூப்பர் சீரிஸ்: இந்தியாவின் பி.வி.சிந்து காலிறுதிச் சுற்றுக்கு முன்னேற்றம்...

Hong Kong Open Super Series Indias PV sindu advanced

ஹாங்காங் ஓபன் சூப்பர் சீரிஸ் பாட்மிண்டன் போட்டியில் இந்தியாவின் பி.வி.சிந்து காலிறுதிச் சுற்றுக்கு முன்னேறி அசத்தியுள்ளார்.

இந்திய வீராங்கள் சாய்னா நெவால் மற்றும் ஹெச்.எஸ். பிரணய் தங்களது 2-வது சுற்றில் தோல்வி கண்டு போட்டியிலிருந்து வெளியேறினார்.

ஹாங்காங் ஓபன் சூப்பர் சீரிஸ் பாட்மிண்டன் போட்டியின் மகளிர் ஒற்றையர் பிரிவு காலிறுதிக்கு முந்தைய சுற்றில் போட்டித் தரவரிசையில் 2-வது இடத்தில் இருக்கும் சிந்து, ஜப்பானின் அயா ஒஹோரியை எதிர்கொண்டார்.

இருவருக்கும் இடையே நடைபெற்ற இந்த ஆட்டத்தின் முடிவில் சிந்து 21-14, 21-17 என்ற செட் கணக்கில் வெற்றி பெற்று காலிறுதிக்கு முன்னேறினார்.

அயா ஒஹோரிக்கு எதிராக சிந்து பதிவு செய்யும் 3-வது வெற்றி இது. சிந்து தனது காலிறுதியில், போட்டித் தரவரிசையில் 5-வது இடத்தில் இருக்கும் ஜப்பானின் அகானே யமாகுசியை எதிர்கொள்கிறார்.

உலகின் 10-ஆம் நிலை வீராங்கனையான சாய்னா நெவால், தனது 2-வது சுற்றில் போட்டித் தரவரிசையில் 8-ஆவது இடத்தில் இருக்கும் சீனாவின் சென் யுஃபெயிடம் 21-18, 19-21, 10-21 என்ற செட் கணக்கில் வீழ்ந்து போட்டியில் இருந்து வெளியேறினார்.

ஆடவர் ஒற்றையர் பிரிவில் உலகின் 10-ஆம் நிலை வீரரும் இந்தியருமான ஹெச்.எஸ்.பிரணாய் தனது 2-வது சுற்றில் ஜப்பானின் கஸுமாஸா ஸகாயிடம் 21-11, 10-21, 15-21 என்ற செட் கணக்கில் தோல்வி கண்டு வெளியேறினார்.