MI vs LSG: 5 முறை சாம்பியன் மும்பை இந்தியன்ஸுக்கு 6வது தோல்வி..! லக்னோ அணி அபார வெற்றி
சுருக்கம்
மும்பை இந்தியன்ஸுக்கு எதிரான போட்டியில் 18 ரன்கள் வித்தியாசத்தில் அபார வெற்றி பெற்றது லக்னோ சூப்பர் ஜெயிண்ட்ஸ் அணி.
ஐபிஎல் 15வது சீசனில் மும்பை இந்தியன்ஸ் மற்றும் லக்னோ சூப்பர் ஜெயிண்ட்ஸ் அணிகளுக்கு இடையேயான போட்டி மும்பை ப்ரபோர்ன் மைதானத்தில் நடந்தது. இந்த போட்டியில் டாஸ் வென்ற மும்பை இந்தியன்ஸ் கேப்டன் ரோஹித் சர்மா ஃபீல்டிங்கை தேர்வு செய்தார்.
மும்பை இந்தியன்ஸ் அணி:
ரோஹித் சர்மா (கேப்டன்), இஷான் கிஷன் (விக்கெட் கீப்பர்), டிவால்ட் பிரெவிஸ், திலக் வர்மா, சூர்யகுமார் யாதவ், கைரன் பொல்லார்டு, ஃபேபியன் ஆலன், ஜெய்தேவ் உனாத்கத், முருகன் அஷ்வின், ஜஸ்ப்ரித் பும்ரா, டைமல் மில்ஸ்.
லக்னோ சூப்பர் ஜெயிண்ட்ஸ் அணி:
கேஎல் ராகுல் (கேப்டன்), குயிண்டன் டி காக் (விக்கெட் கீப்பர்), மனீஷ் பாண்டே, தீபக் ஹூடா, மார்கஸ் ஸ்டோய்னிஸ், ஆயுஷ் பதோனி, ஜேசன் ஹோல்டர், க்ருணல் பாண்டியா, துஷ்மந்தா சமீரா, ஆவேஷ் கான், ரவி பிஷ்னோய்.
முதலில் பேட்டிங் ஆடிய லக்னோ அணியின் தொடக்க வீரர் குயிண்டன் டி காக் 24 ரன்கள் அடித்தார். 3ம் வரிசையில் இறங்கிய மனீஷ் பாண்டே அடித்து ஆடி 29 பந்தில் 38 ரன்கள் அடித்தார். தொடக்கம் முதலே சிறப்பாக பேட்டிங் ஆடினார் கேப்டன் ராகுல். மார்கஸ் ஸ்டோய்னிஸ் 10 ரன்களுக்கு ஆட்டமிழந்தார்.
ஒருமுனையில் விக்கெட்டுகள் விழுந்தாலும் மறுமுனையில் அடித்து ஆடிய கேஎல் ராகுல் ஐபிஎல்லில் 3வது சதத்தை பதிவு செய்தார். 2வது முறையாக மும்பை இந்தியன்ஸுக்கு எதிராக சதம் விளாசினார் கேஎல் ராகுல். தீபக் ஹூடா 8 பந்தில் 15 ரன்கள் அடித்தார். கடைசி ஓவரை அருமையாக வீசிய ஜெய்தேவ் உனாத்கத், அந்த ஓவரில் வெறும் 4 ரன்கள் மட்டுமே விட்டுக்கொடுத்தார். கேஎல் ராகுல் 60 பந்தில் 9 பவுண்டரிகள் மற்றும் 5 சிக்ஸர்களுடன் 103 ரன்களை குவித்தார். 20 ஓவரில் 199 ரன்களை குவித்தது லக்னோ சூப்பர் ஜெயிண்ட்ஸ் அணி.
200 ரன்கள் என்ற கடின இலக்கை விரட்டிய மும்பை இந்தியன்ஸ் அணியின் தொடக்க வீரரும் கேப்டனுமான ரோஹித் சர்மா 6 ரன்னில் ஆட்டமிழக்க, இஷான் கிஷன் 13 ரன்னில் ஆட்டமிழந்தார். 13 பந்தில் 6 பவுண்டரிகள் மற்றும் ஒரு சிக்ஸருடன் 31 ரன்கள் அடித்து பேபி ஏபி என்றழைக்கப்படும் டிவால்ட் ப்ரெவிஸ் ஆட்டமிழந்தார்.
அதன்பின்னர் சூர்யகுமார் யாதவ்(37), திலக் வர்மா(26), பொல்லார்டு (25) ஆகியோர் சிறு சிறு பங்களிப்பு செய்தாலும், மும்பை அணி இலக்கை எட்டுவதற்கு அது போதவில்லை. எனவே 20 ஓவரில் 181 ரன்கள் அடித்த மும்பை அணி 18 ரன் வித்தியாசத்தில் படுதோல்வி அடைந்தது.
5 முறை சாம்பியனான மும்பை இந்தியன்ஸுக்கு இந்த சீசனில் இது தொடர்ச்சியாக 6வது தோல்வி. இந்த சீசனில் இதுவரை ஆடியதில் ஒரு போட்டியில் கூட மும்பை அணி வெற்றி பெறவில்லை.