IND vs PAK: U19 உலகக்கோப்பை.. பாகிஸ்தானை பந்தாடிய இளம் சிங்கங்கள்.. இந்திய அணி 'மாஸ்' வெற்றி!

இந்த வெற்றியின் மூலம், ஆயுஷ் மத்ரே தலைமையிலான இந்திய அணி, நடப்பு ஐசிசி தொடரின் அரையிறுதிக்கு தகுதி பெற்றது. அதேசமயம் பாகிஸ்தான் வெளியேறியது.

ஐசிசி U19 உலகக் கோப்பையில் சூப்பர் சிக்ஸ் போட்டியில் பாகிஸ்தானை 58 ரன்கள் வித்தியாசத்தில் வீழ்த்தி இந்திய அணி அபார வெற்றி பெற்றது. இந்த வெற்றியின் மூலம், ஆயுஷ் மத்ரே தலைமையிலான இந்திய அணி, நடப்பு ஐசிசி தொடரின் அரையிறுதிக்கு தகுதி பெற்றது. அதேசமயம் பாகிஸ்தான் வெளியேறியது.

இந்திய அணி வெற்றி

253 ரன்கள் இலக்கை துரத்திய பாகிஸ்தான் அணி, 48.2 ஓவர்களில் 194 ரன்களுக்கு ஆட்டமிழந்தது. விக்கெட் கீப்பர்-பேட்டர் ஹம்சா ஜாஹூர் (49 பந்துகளில் 42 ரன்கள், எட்டு பவுண்டரிகள்) மற்றும் உஸ்மான் கான் (92 பந்துகளில் 66 ரன்கள், ஏழு பவுண்டரிகள்) ஆகியோரின் ஆட்டம் வீணானது. இந்தியா சார்பில், கேப்டன் ஆயுஷ் மத்ரே (3/21) மற்றும் கிலான் படேல் (3/35) தலா மூன்று விக்கெட்டுகளை வீழ்த்தினர். கனிஷ்க் சவுகான் ஆட்ட நாயகனாக தேர்வு செய்யப்பட்டார்.

வைபவ் சூர்யவன்ஷி ஏமாற்றம்

முன்னதாக முதலில் பேட்டிங் செய்த இந்தியா 49.5 ஓவரில் 252 ரன்களுக்கு ஆல் அவுட் ஆனது. தொடக்க ஆட்டக்காரர்களான வைபவ் சூர்யவன்ஷி மற்றும் ஆரோன் ஜார்ஜ் இந்தியாவிற்கு நல்ல தொடக்கத்தை அளித்தனர். எட்டாவது ஓவரில் 22 பந்துகளில் 30 ரன்கள் எடுத்திருந்த சூர்யவன்ஷியை (ஐந்து பவுண்டரிகள், ஒரு சிக்ஸர்) முகமது சய்யாம் ஆட்டமிழக்கச் செய்து பாகிஸ்தானுக்கு முதல் திருப்புமுனையை ஏற்படுத்தினார்.

வேதாந்த் திரிவேதியின் அரைசதம்

அதே ஓவரில் கேப்டன் ஆயுஷ் மத்ரேயை இரண்டு பந்துகளில் டக் அவுட் ஆக்கி சய்யாம் தனது இரண்டாவது விக்கெட்டை வீழ்த்த, இந்தியா 47/2 என சரிந்தது. அடுத்த ஓவரிலேயே, வேகப்பந்து வீச்சாளர் அப்துல் சுபான், ஜார்ஜை (25 பந்துகளில் 16 ரன்கள்) கிளீன் போல்ட் ஆக்கினார். 10 ஓவர்கள் முடிவில், இந்தியா 49/3 ரன்கள் எடுத்திருந்தது.

பின்னர் வேதாந்த் திரிவேதியின் அரைசதம் மற்றும் கனிஷ்க் சவுகான் - கிலான் படேல் இடையேயான முக்கிய பார்ட்னர்ஷிப், இந்திய அணி 252 ரன்கள் குவிக்க உதவியது. பாகிஸ்தான் தரப்பில், அலி ரஸா (1/56), முகமது சய்யாம் (2/69), அகமது ஹுசைன் (1/33), மோமின் கமர் (1/41), அலி ஹசன் பலோச் (1/19) மற்றும் அப்துல் சுபான் (3/33) ஆகியோர் விக்கெட்டுகளை வீழ்த்தினர்.