14 வயது சர்ச்சை: சூர்யவன்ஷியின் கோச் கொடுத்த நச் பதில்!

14 வயதான சூர்யவன்ஷி, ஐபிஎல் போட்டியில் அசத்தலான ஆட்டத்தை வெளிப்படுத்திய நிலையில், அவரது வயது குறித்த சர்ச்சைகள் எழுந்துள்ளன. பயிற்சியாளர் மனீஷ் ஓஜா, வயது சரிபார்ப்பு நெறிமுறைகள் பின்பற்றப்பட்டதாக உறுதிப்படுத்தியுள்ளார்.

ஐபிஎல் 2025 தொடரில் ராஜஸ்தான் ராயல்ஸ் அணிக்காக விளையாடும் சூர்யவன்ஷி குஜராத் அணிக்கு எதிரான போட்டியில் அதிரடி ஆட்டத்தை வெளிப்படுத்தி அனைவரையும் வியப்பில் ஆழ்த்தினார். வெறும் 35 பந்துகளில் சதம் விளாசிய அவர், விமர்சகர்களின் வாயை அடைத்ததுடன், கிரிக்கெட் ஜாம்பவான்களையும் பிரமிக்க வைத்தார்.

இருப்பினும், இந்த அபாரமான ஆட்டத்திற்கு மத்தியிலும், சூர்யவன்ஷி ஒரு சர்ச்சையில் சிக்கியுள்ளார். 14 வயது சிறுவனான இவர், களத்தில் காட்டும் முதிர்ச்சியான ஆட்டத் திறனும் அவரது உடல்வாகும் உண்மையான வயதை விட அதிகமாக இருப்பதாகப் பலரும் கேள்வி எழுப்பி வருகின்றனர். அவரது வயது சான்றிதழ்களின் நம்பகத்தன்மையையும் பலர் வெளிப்படையாகச் சந்தேகித்து வருகின்றனர்.

ஆனால், சூர்யவன்ஷியின் பயிற்சி பெற்ற ஜெனித் அகாடமியின் பயிற்சியாளர் மனீஷ் ஓஜா இந்த வதந்திகளுக்கு உறுதியான மறுப்பு தெரிவித்துள்ளார். "பிசிசிஐ மேற்பார்வையில் நடத்தப்பட்ட எலும்பு அடர்த்தி பரிசோதனை உட்பட அனைத்து வயது சரிபார்ப்பு நெறிமுறைகளையும் அவர் பூர்த்தி செய்துள்ளார்," என்று கூறினார்.

"அனைவரையும் திருப்திபடுத்த வேண்டிய அவசியம் இல்லை," என்று கூறிய அவர், பிசிசிஐ நம்பகமான நிறுவனம் என்றும், அனைத்து ஆவணங்களையும் ஆய்வு செய்த பின்னரே அவரது வயதை அங்கீகரித்துள்ளது என்றும் தெரிவித்தார்.

"வைபவ் சூர்யவன்ஷி வெறும் கிரிக்கெட் வீரர் மட்டுமல்ல - அவர் நாட்டிற்கு ஒரு சொத்து. ஆதாரமற்ற விமர்சனங்களிலிருந்து அவரைப் பாதுகாப்பதும், அவர் முழு கவனத்தையும் விளையாட்டில் செலுத்த அனுமதிப்பதும் நமது கடமை," என்றும் அவர் மேலும் கூறினார்.

ஐபிஎல் வெற்றி சூர்யவன்ஷியை நட்சத்திர அந்தஸ்தை நோக்கி அழைத்துச் சென்றாலும், சர்வதேச கிரிக்கெட் கவுன்சிலின் (ஐசிசி) ஒரு விதி அவரது சர்வதேச அறிமுகத்தை தாமதப்படுத்தலாம். 2020 இல் அறிமுகப்படுத்தப்பட்ட விதியின்படி, சர்வதேச போட்டிகளில் விளையாட வீரர்களுக்கு குறைந்தபட்சம் 15 வயது இருக்க வேண்டும். சூர்யவன்ஷி 2026 ஆம் ஆண்டு மார்ச் 27 ஆம் தேதி 15 வயதை எட்டுகிறார். இதனால், வரவிருக்கும் சர்வதேச போட்டிகளில் விளையாடுவதற்கான தகுதியை அவர் தவறவிடுகிறார்.

இருப்பினும், ஐசிசி விதியில் ஒரு சிறப்பு விலக்கு அளிக்கும் ஷரத்து உள்ளது. போதுமான மன மற்றும் உடல் முதிர்ச்சி மற்றும் கணிசமான விளையாட்டு அனுபவம் உள்ள இளம் வீரர்களுக்கு சர்வதேச அளவில் அறிமுகமாக இந்த ஷரத்து அனுமதிக்கிறது. பிசிசிஐ முறையான கோரிக்கையை சமர்ப்பித்தால், இது குறித்து முடிவெடுக்கும் அதிகாரம் ஐசிசிக்கு உள்ளது.