WTC Points Table: ஆஸ்திரேலியா படுதோல்வியால் இந்தியாவுக்கு சாதகமா? டேட்டா என்ன சொல்கிறது?

WTC Points Table: டார்வினில் நடந்த டெஸ்டில் ஆஸ்திரேலியாவை வீழ்த்தி வங்கதேசம் வரலாற்று வெற்றி பெற்றுள்ளது. படுதோல்வியால் ஆஸ்திரேலியா உலக டெஸ்ட் சாம்பியன்ஷிப் புள்ளிப் பட்டியலில் சறுக்கியுள்ளது. இதனால் இந்தியாவுக்கு லாபமா? என பார்ப்போம்.

WTC Points Table: ஆஸ்திரேலியாவுக்கு எதிரான முதல் டெஸ்ட் போட்டியில் வங்கதேச அணி ஒரு வரலாற்று சிறப்புமிக்க வெற்றியை பதிவு செய்துள்ளது. ஆஸ்திரேலிய மண்ணில் முதல் முறையாக டெஸ்ட் போட்டியில் ஜெயித்த வங்கதேசம், உலக டெஸ்ட் சாம்பியன்ஷிப் (WTC) புள்ளிப் பட்டியலிலும் பெரிய முன்னேற்றம் கண்டுள்ளது.

உலக டெஸ்ட் சாம்பியன்ஷிப் (WTC) புள்ளிப் பட்டியல்

டார்வினில் உள்ள மர்ராரா கிரிக்கெட் மைதானத்தில் நடந்த இந்த போட்டியில், 9 விக்கெட் வித்தியாசத்தில் வங்கதேசம் அபார வெற்றி பெற்றது. முதல் இன்னிங்ஸில் 228 ரன்கள் பின்தங்கியிருந்த ஆஸ்திரேலியா, இரண்டாவது இன்னிங்ஸில் 284 ரன்களுக்கு ஆல்-அவுட் ஆனது. இதனால், 57 ரன்கள் எடுத்தால் வெற்றி என்ற எளிய இலக்குடன் களமிறங்கிய வங்கதேசம், ஒரு விக்கெட்டை மட்டும் இழந்து எளிதாக இலக்கை எட்டியது.

இந்த வரலாற்று வெற்றியின் மூலம், வங்கதேசம் 40 புள்ளிகளுடன், 66.67% வெற்றி சதவீதத்துடன் புள்ளிப் பட்டியலில் நான்காவது இடத்தைப் பிடித்துள்ளது. உலக டெஸ்ட் சாம்பியன்ஷிப் தொடரில் இதுவரை 5 டெஸ்ட்களில் விளையாடியுள்ள வங்கதேசம், 3 வெற்றி, ஒரு டிரா மற்றும் ஒரு தோல்வியைப் பதிவு செய்துள்ளது.

இதையும் படிங்க: Devdutt Padikkal: நம்பர் 3 இடத்துக்கு நான் ரெடி! முதல் டெஸ்ட் சதத்தால் விவாதத்தை கிளப்பிய படிக்கல்

ஆஸ்திரேலியாவின் வெற்றி சதவீதம் குறைந்தது

மறுபுறம், சொந்த மண்ணில் தோல்வியடைந்தாலும், ஆஸ்திரேலியா 84 புள்ளிகள் மற்றும் 77.78% வெற்றி சதவீதத்துடன் முதலிடத்தில் நீடிக்கிறது. இருப்பினும், இந்த தோல்வியால் ஆஸ்திரேலியாவின் வெற்றி சதவீதம் 87.50%-லிருந்து 77.78% ஆகக் குறைந்துள்ளது. 2025-27 உலக டெஸ்ட் சாம்பியன்ஷிப் சுழற்சியில் ஆஸ்திரேலியா விளையாடிய ஒன்பது டெஸ்ட்களில் இது இரண்டாவது தோல்வியாகும். இந்த இரண்டு தோல்விகளுமே சொந்த மண்ணில் கிடைத்தது என்பது குறிப்பிடத்தக்கது.

A look at the current #WTC27 standings after Bangladesh's stellar victory against Australia 👀

📝: https://t.co/TJt9cbipMe pic.twitter.com/STlrZu6ZUy

— ICC (@ICC) August 16, 2026

இந்தியா மற்றும் இலங்கையின் நிலை என்ன?

இந்திய அணியைப் பொறுத்தவரை, 9 போட்டிகளில் நான்கு வெற்றி, நான்கு தோல்வி, ஒரு டிரா என 52 புள்ளிகளுடன் 48.15% வெற்றி சதவீதத்துடன் புள்ளிப் பட்டியலில் ஐந்தாவது இடத்தில் உள்ளது. தற்போது காலேவில் இலங்கைக்கு எதிராக நடக்கும் முதல் டெஸ்டில் இந்தியா வெற்றி பெற்றால், வெற்றி சதவீதம் 53.33% ஆக உயரும், ஆனாலும் ஐந்தாவது இடத்திலேயே நீடிக்கும். மாறாக, இந்த டெஸ்டில் இலங்கை வெற்றி பெற்றால், அவர்கள் 53.33% வெற்றி சதவீதத்துடன் இந்தியாவைப் பின்னுக்குத் தள்ளி ஐந்தாவது இடத்திற்கு முன்னேறுவார்கள். அப்போது, இந்திய அணி ஆறாவது இடத்திற்கு தள்ளப்படும். ஒருவேளை காலே டெஸ்ட் டிராவில் முடிந்தால், இந்தியா ஐந்தாவது இடத்திலும், இலங்கை ஆறாவது இடத்திலும் தற்போதைய நிலைகளில் தொடரும்.