AUS vs ENG: டேவிட் மலான் அதிரடி சதம் வீண்.. வார்னர், ஸ்மித்தின் அபார பேட்டிங்கால் முதல் ODI-யில் ஆஸி., வெற்றி

இங்கிலாந்துக்கு எதிரான முதல் ஒருநாள் போட்டியில் 6 விக்கெட் வித்தியாசத்தில் அபார வெற்றி பெற்று 1-0 என தொடரில் முன்னிலை வகிக்கிறது ஆஸ்திரேலிய அணி.  

டி20 உலக கோப்பைக்கு முன் இங்கிலாந்து அணி ஆஸ்திரேலியாவிற்கு சென்று 3 டி20 போட்டிகள் கொண்ட தொடரில் ஆடியது. அந்த டி20 தொடரை இங்கிலாந்து அணி வென்றது. டி20 தொடர் முடிந்த நிலையில், அதன்பின்னர் டி20 உலக கோப்பை தொடர் நடந்தது. 

அதனால் டி20 உலக கோப்பைக்கு பின் ஆஸ்திரேலியா - இங்கிலாந்து அணிகளுக்கு இடையே ஒருநாள் தொடர் நடக்கிறது. 3 ஒருநாள் போட்டிகள் கொண்ட தொடரின் முதல் போட்டி இன்று அடிலெய்டில் நடந்தது. இந்த போட்டியில் டாஸ் வென்ற ஆஸ்திரேலிய அணி ஃபீல்டிங்கை தேர்வு செய்தது.

ஆஸ்திரேலிய அணி:

டேவிட் வார்னர், டிராவிஸ் ஹெட், ஸ்டீவ் ஸ்மித், மார்னஸ் லபுஷேன், அலெக்ஸ் கேரி (விக்கெட் கீப்பர்), மார்கஸ் ஸ்டோய்னிஸ், கேமரூன் க்ரீன், அஷ்டான் அகர், பாட் கம்மின்ஸ் (கேப்டன்), மிட்செல் ஸ்டார்க், ஆடம் ஸாம்பா.

இங்கிலாந்து அணி:

ஜேசன் ராய், ஃபிலிப் சால்ட், டேவிட் மலான், ஜேம்ஸ் வின்ஸ், சாம் பில்லிங்ஸ், ஜோஸ் பட்லர் (கேப்டன், விக்கெட் கீப்பர்), லியாம் டாவ்சன், கிறிஸ் ஜோர்டான், டேவிட் வில்லி, லூக் உட், ஆலி ஸ்டோன்.

முதலில் பேட்டிங் ஆடிய இங்கிலாந்து அணியின் தொடக்க வீரர்கள் ஜேசன் ராய்(6) மற்றும் ஃபிலிப் சால்ட் (14) ஆகிய இருவரும் ஏமாற்றமளித்தனர். அதன்பின்னர் ஜேம்ஸ் வின்ஸ்(5), சாம் பில்லிங்ஸ்(17), கேப்டன் ஜோஸ் பட்லர்(29), லியாம் டாவ்சன் (11), கிறிஸ் ஜோர்டான் (14) ஆகியோர் சொற்ப ரன்களுக்கு சீரான இடைவெளியில் ஆட்டமிழந்தனர்.

ஒருமுனையில் விக்கெட்டுகள் விழுந்தாலும், மறுமுனையில் நிலைத்து நின்று அடித்து ஆடிய டேவிட் மலான் சதமடித்தார். மிகச்சிறப்பாக பேட்டிங் ஆடி சதமடித்து டேவிட் மலான், 46வது ஓவர் வரை பேட்டிங் ஆடி 128 பந்தில் 134 ரன்களை குவிக்க, பின்வரிசையில் டேவிட் வில்லி சிறப்பாக ஆடி 34 ரன்கள் அடிக்க, 50 ஓவரில் 287 ரன்களை குவித்தது இங்கிலாந்து அணி.

288 ரன்கள் என்ற சவாலான இலக்கை விரட்டிய ஆஸ்திரேலிய அணியின் தொடக்க வீரர்கள் டேவிட் வார்னர் மற்றும் டிராவிஸ் ஹெட் ஆகிய இருவரும் அபாரமாக பேட்டிங் ஆடி அரைசதம் அடித்து நல்ல தொடக்கத்தை அமைத்து கொடுத்தனர். டிராவிஸ் ஹெட் 69 ரன்னில் ஆட்டமிழக்க, டேவிட் வார்னர் அதிரடியாக ஆடி சதத்தை நெருங்கிய நிலையில் 86 ரன்களுக்கு ஆட்டமிழந்து சதத்தை தவறவிட்டார்.

அதன்பின்னர் மார்னஸ் லபுஷேன் (4), அலெக்ஸ் கேரி(21) ஆகியோர் சொற்பரன்களில் ஆட்டமிழந்தாலும்,  அணியின் நட்சத்திர வீரரான ஸ்டீவ் ஸ்மித் நிலைத்து ஆடி கடைசிவரை களத்தில் நின்று 80 ரன்களை குவித்து ஆஸ்திரேலிய அணிக்கு வெற்றியை தேடிக்கொடுத்தார். 6 விக்கெட் வித்தியாசத்தில் வெற்றி பெற்ற ஆஸ்திரேலிய அணி 1-0 என ஒருநாள் தொடரில் முன்னிலை வகிக்கிறது. 

இந்த போட்டியில் ஆஸ்திரேலிய அணி ஜெயித்திருந்தாலும், அபாரமாக பேட்டிங்  ஆடி சதமடித்த இங்கிலாந்து வீரர் டேவிட் மலானுக்கு ஆட்டநாயகன் விருது வழங்கப்பட்டது.