Mohini Ekadashi 2026 மோகினி ஏகாதசி 2026: துன்பங்களை போக்கி மங்களம் தரும் மகா விரதம்

வளர்பிறை, தேய்பிறை என மாதத்தில் இரண்டு முறை ஏகாதசி விரதம் வருவது உண்டு. இவற்றில் சித்திரை மாதம் வளர்பிறையில் வரக் கூடிய ஏகாதசிக்கு மோகினி ஏகாதசி என்று பெயர். அனைத்து ஏகாதசி விரதங்களும் பாவங்களை போக்கக் கூடியது என்றாலும் மோகினி ஏகாதசி, பாவங்களை போக்குவதுடன், நாம் இழந்த விஷயங்களையும் நமக்கு மீட்டுத் தரும் அற்புதமான விரதமாகும்.

விரதங்களில் உயர்வான புண்ணிய பலனை தரும் விரதமாக கருதப்படுவது ஏகாதசி விரதம் ஆகும். பெருமாளின் அருளை பெறவும், பாவங்களில் இருந்து விடுபடவும் ஏகாதசி விரதம் கடைபிடிக்கப்படுகிறது. அதிலும் சித்திரை மாத வளர்பிறையில் வரும் மோகினி ஏகாதசி மிகவும் தனித்துவமானது. "மோகினி" என்பது மகாவிஷ்ணுவின் அற்புதமான அவதாரங்களில் ஒன்று. இந்த ஆண்டு ஏப்ரல் 27ம் தேதி திங்கட்கிழமையில் மோகினி ஏகாதசி விரதம் கடைபிடிக்கப்படுகிறது.

ஏகாதசி விரதம் :

ஏகாதசி விரதம், அமாவாசை மற்றும் பவுர்ணமியை அடுத்து வரும் 11-வது திதியில் மகாவிஷ்ணுவை நோக்கி கடைபிடிக்கப்படும் மிகவும் புனிதமான விரதமாகும். இது பாவங்களைப் போக்கி, மன அமைதியை அளித்து, உடலை நச்சுத்தன்மையாக்கி ஆரோக்கியத்தை மேம்படுத்துகிறது. வைகுண்ட ஏகாதசி, நிரஜலா ஏகாதசி போன்றவை மிகவும் சிறப்பு வாய்ந்தவை. ஒரு வருடத்தில் வரும் 24 ஏகாதசிகளிலும் விரதம் இருந்து வழிபட முடியாதவர்கள், குறிப்பிட்ட இந்த 2 ஏகாதசிகளில் மட்டுமாவது விரதம் இருக்க வேண்டும் என வலியுறுத்தப்படுகிறது.

மோகினி ஏகாதசி தோன்றிய வரலாறு:

பாற்கடலைக் கடைந்த போது வெளிவந்த பொருட்களை அசுரர்களும், தேவர்களும் மாறி மாறி பங்கிட்டு கொண்டார்கள். அசுரர்களின் முறை வரும் போது அமிர்தம் வெளிப்பட்டது. தேவர்களிடம் இருந்து அமிர்தத்தை அசுரர்கள் அபகரித்துச் சென்றனர். மரணம் இல்லாத வாழ்வை தரும் அமிர்தம் அசுரர்களுக்கு கிடைத்தால் பெரும் தீமை ஏற்படும் என்பதால் உலகைக் காக்கும் பரந்தாமன், அசுரர்களை மயக்கி அமிர்தத்தைத் தேவர்களுக்குப் பகிர்ந்தளிக்க எடுத்த அவதாரமே மோகினி அவதாரம். இந்த அவதாரம் தோன்றிய தினமே மோகினி ஏகாதசியாகக் கொண்டாடப்படுகிறது. மேலும், வசிஷ்ட முனிவர் தர்மபுத்திரருக்கு உபதேசித்த கதையின்படி, திருஷ்டபுத்தி என்ற கொடிய பாவங்களை செய்தவன் தனது பாவங்களிலிருந்து விடுபட்டு மோட்சம் அடைய இந்த விரதமே கைகொடுத்தது என்பது வரலாறு.

இந்த விரதத்தை ஏன் கடைபிடிக்க வேண்டும்?

இன்றைய பரபரப்பான உலகில் நாம் தெரிந்தோ, தெரியாமலோ செய்யும் சிறு பிழைகள் நம் மன நிம்மதியைக் குலைக்கின்றன. இவற்றில் இருந்து விடுபட சிறந்த, அதே சமயம் எளிமையான வழியாக இருப்பது மோகினி ஏகாதசி விரதம் ஆகும். வாழ்வில் கர்மவினைகளால் நமக்கு கிடைக்காமல் போன நல்ல விஷயங்களை, நமக்கு உரியவற்றை நமக்கு கிடைக்க செய்யும் அற்புதமான விரதமாக மோகினி விரதம் கருதப்படுகிறது.

மோகினி ஏகாதசி விரதத்தின் சிறப்பம்சங்கள் :

பாவ விமோசனம்- பல பிறவிகளாகத் தொடரும் பாவ வினைகளை நீக்கும் சக்தி கொண்டது.

மன அமைதி- மோகினி என்ற சொல்லுக்கு 'மயக்குதல்' என்று பொருள். உலகியல் மாயைகளில் சிக்கியிருக்கும் நம் மனதை பரம்பொருளின் பக்கம் திருப்பி, அமைதியை வழங்குகிறது.

கோ தானம் - புராணங்களின்படி, இந்த ஒரு நாள் விரதம் ஆயிரம் பசுக்களைத் தானம் செய்த புண்ணியத்தை ஒருவருக்குத் தரும்.

விரதம் கடைபிடிக்கும் முறை :

மோகினி ஏகாதசி விரதத்தை முழுமையாகவும், பக்தியுடனும் கடைபிடிக்க சில எளிய வழிமுறைகள்: - ஏகாதசிக்கு முந்தைய நாள் (தசமி) இரவே எளிமையான உணவை உட்கொண்டு விரதத்தைத் தொடங்க வேண்டும். - ஏகாதசி அன்று அதிகாலையில் நீராடி, மகாவிஷ்ணுவின் திருவுருவப் படத்திற்கு துளசி மற்றும் மலர்களால் அர்ச்சனை செய்ய வேண்டும். 'ஓம் நமோ நாராயணாய' எனும் மந்திரத்தை உச்சரிப்பது நலம். - அன்று முழுவதும் நீர் மட்டும் அருந்தியோ அல்லது பழங்கள் மட்டும் உட்கொண்டோ விரதம் இருக்கலாம். தானியங்கள் மற்றும் வெங்காயம், பூண்டு தவிர்க்கப்பட வேண்டும். - அன்று இரவு முழுவதும் கண் விழித்து விஷ்ணு சகஸ்ரநாமம் அல்லது பகவத் கீதை வாசிப்பது கூடுதல் பலன் தரும். - மறுநாள் (துவாதசி) காலையில் ஏழை எளியவர்களுக்கு அன்னதானம் அளித்துவிட்டு, முறைப்படி விரதத்தை நிறைவு செய்ய வேண்டும்.

மோகினி ஏகாதசி விரத பலன்கள் :

மோகினி ஏகாதசி அன்று விரதம் இருப்பவர்களுக்கு எம பயம் இருக்காது என்றும், அவர்களின் முன்னோர்கள் நற்கதி அடைவார்கள் என்றும் நம்பப்படுகிறது. சீதா தேவியைப் பிரிந்து வாடிய ஸ்ரீராமபிரான் கூட, தன் துயரம் நீங்க வசிஷ்டரின் அறிவுரைப்படி இந்த விரதத்தை அனுஷ்டித்தார் என்பது குறிப்பிடத்தக்கது. வாழ்க்கையில் இழந்த செல்வம், நிம்மதி மற்றும் கௌரவத்தை மீண்டும் பெற மோகினி ஏகாதசி ஒரு சிறந்த வாய்ப்பு. நம்பிக்கையுடன் இந்த விரதத்தை மேற்கொண்டு, விஷ்ணுவின் அருளால் வாழ்வில் எல்லா வளங்களையும் பெற முடியும்.