காவிரியை யாரும் சொந்தம் கொண்டாடக்கூடாது என உச்சநீதிமன்றம் கூறியிருப்பது நிம்மதி அளிக்கிறது எனவும் ஆனால் காவிரி நீரை குறைத்து தந்திருப்பது வருத்தமும் ஏமாற்றமும் அளிக்கிறது எனவும் நடிகர் கமலஹாசன் தெரிவித்துள்ளார். தமிழகம் – கர்நாடகாவிற்கும் காவிரி விவகாரம் காலம் காலமாக தொடர்ந்துகொண்டே இருந்தது. இதுவரை தமிழகத்திற்கு முழு மனதோடு கர்நாடகா தண்ணீர் திறந்துவிட்டதே இல்லை என்றுதான் கூற வேண்டும்.இதுகுறித்து கர்நாடகாவோடு பேச்சுவார்த்தைகள் நடத்தியும் ஒரு பலனும் இல்லை. ஒவ்வொரு முறையும் உச்ச நீதிமன்றத்தில் தமிழக அரசு வழக்கு தொடர்ந்தே தண்ணீர் வாங்கி வேண்டி இருந்தது. இதையடுத்து, நூற்றாண்டுகளாக நீடித்துவரும் இந்த காவிரி நதிநீர் பிரச்சனைக்காக அமைக்கப்பட்ட நடுவர் மன்றம் 2007-ம் ஆண்டு இறுதித் தீர்ப்பை வழங்கியது. இதில் 192 டி.எம்.சி.நீரை தமிழகத்துக்கு கர்நாடகா திறந்துவிட வேண்டும் என கூறப்பட்டிருந்தது. இத்தீர்ப்பை எதிர்த்து கூடுதல் நீர் கோரி தமிழகம், கர்நாடகா, புதுவை, கேரளா மாநிலங்கள் என மொத்தமாக உச்சநீதிமன்றத்தில் மேல்முறையீடு செய்தது. தொடர்ந்து 10 ஆண்டுகளாக நடைபெற்ற வழக்கின் விசாரணை சில நாட்களுக்கு முன்பு நிறைவடைந்து தீர்ப்பு தேதி குறிப்பிடப்படாமல் ஒத்தி வைக்கப்பட்டது.இந்நிலையில் உச்சநீதிமன்றத்தில் இன்று தீர்ப்பு வழங்கப்பட்டது. அதில், காவிரி ஆற்றை உரிமை கொண்டாட எந்த மாநிலத்திற்கும் உரிமையில்லை எனவும் காவிரியில் இருந்து தமிழகத்திற்கு கர்நாடகா 177.25 டி.எம்.சி நீர் தரவேண்டும் எனவும் உத்தரவிட்டது. இதுகுறித்து கருத்து தெரிவித்த நடிகர் கமல்ஹாசன், காவிரியை யாரும் சொந்தம் கொண்டாடக்கூடாது என உச்சநீதிமன்றம் கூறியிருப்பது நிம்மதி அளிக்கிறது எனவும் ஆனால் காவிரி நீரை குறைத்து தந்திருப்பது வருத்தமும் ஏமாற்றமும் அளிக்கிறது எனவும் தெரிவித்துள்ளார். இதைவைத்து அரசியல் செய்யாமல் இனி கிடைக்கும் நீரை எவ்வாறு உபயோகிக்க வேண்டும் என்பதை தான் யோசிக்க வேண்டும் எனவும் உணர்ச்சியில் ஓட்டு வேட்டைக்காக தேசியத்தை மறக்கக்கூடாது எனவும் வேண்டுகோள் விடுத்துள்ளார்.
