அதலபாதாளத்துக்குப் போன இந்தியாவின் உற்பத்தி வளர்ச்சி ! 8 துறைகளில் கடும் சரிவு !!

இந்தியாவின் பொருளாதாரத்திற்கு தூணாக விளங்கும் மின்சாரம், ஸ்டீல், நிலக்கரி, இயற்கை எரிவாயு உள்ளிட்ட 8 முக்கிய தொழில்துறைகளின் வளர்ச்சியில் கடும் சரிவடைந்துள்ளது.

பொருளாதாரத்திற்கு முக்கிய பங்காற்றும் நிலக்கரி, கச்சா  எண்ணெய், இயற்கை எரிவாயு, சுத்திகரிப்பு பொருட்கள், உரம், எஃகு, சிமென்ட் மற்றும் மின்சாரம் ஆகிய 8 முக்கிய துறைகளின் ஜூலை மாத வளர்ச்சி 2.1% ஆக குறைந்துள்ளதாக அரசு வெளியிட்டுள்ள  செய்திக்குறிப்பில் தெரிவிக்கப்பட்டுள்ளது.

கடந்த ஆண்டின் இதே காலகட்டத்தில்) இது 7.3% ஆக இருந்தது. இந்த ஆண்டின் ஏப்ரல் - ஜூலை மாத காலகட்டத்தில் இந்த வளர்ச்சி 3% ஆக இருந்தது. முந்தைய ஆண்டின் இதே காலகட்டத்தில் 5.9% ஆக வளர்ச்சி விகிதம்  இருந்தது.வாங்கும் திறன் மற்றும் குறைந்துவிட்ட உற்பத்தி திறனின் காரணமாக 6 ஆண்டுகளில் இல்லாத வகையில் ஜிடிபி 5% ஆக சமீபத்தில் குறைந்தது.

தற்போது வெளிவந்துள்ள தரவுகளின் படி இந்த 8 முக்கிய துறைகளில் 5 துறைகளின் வளர்ச்சி விகிதம் வெகுவாக குறைந்துள்ளது. இது ஒட்டுமொத்த பொருளாதாரத்தில் தாக்கத்தை ஏற்படுத்தியுள்ளது. 

குறிப்பாக, நிலக்கரி, கச்சா எண்ணெய்,  இயற்கை எரிவாயு மற்றும் சுத்திகரிப்பு பொருட்கள், ஜூலை மாதத்தில் எதிர்மறையான வளர்ச்சியை பதிவு செய்துள்ளன. இத்துறைகளின் வளர்ச்சி கடந்த 2018 ஏப்ரல் - ஜூலை மாதங்களில் 5.9 சதவீதம் வளர்ச்சி அடைந்திருந்த நிலையில், 2019  ஏப்ரல் - ஜூலை மாதங்களில், 3 சதவீதம் மட்டுமே வளர்ச்சி அடைந்துள்ளது.

இது இந்திய பொருளாதார வல்லுநர்களிடையே கடும் அதிர்ச்சியை ஏற்படுத்தியுள்ளது.