இந்நிலையில் தமிழக சட்டமன்றத்திலும் குடியுரிமையை திருத்தச் சட்டத்துக்கு எதிராக தீர்மானம் நிறைவேற்ற வேண்டும் என திமுக உள்ளிட்ட எதிர்க்கட்சிகள் வலியுறுத்தி வருகின்றனர் .
குடியுரிமைச் சட்டத்தை எதிர்த்து மாநில சட்டமன்றங்களில் நிறைவேற்றும் தீர்மானங்கள் சாதாரண லயன்ஸ் கிளப் , ரோட்டரி கிளப்புகளில் கொண்டு வரும் தீர்மானங்களுக்கு சமம் என பாஜக தேசிய செயலாளர்களில் ஒருவரான எச். ராஜா கிண்டலடித்துள்ளார் . குடியுரிமை திருத்த சட்டத்தை எதிர்த்து பாஜக ஆட்சியில் இல்லாத மாநிலங்களின் சட்டமன்றங்களில் தீர்மானங்கள் நிறைவேற்றி வரும் நிலையில் அவர் இவ்வாறு கூறியுள்ளார் .
மத்திய அரசு கொண்டு வந்துள்ள இந்திய குடியுரிமை திருத்த சட்டம் , தேசிய குடிமக்கள் பதிவேடு , மக்கள் தொகை கணக்கெடுப்பு , உள்ளிட்ட சட்டங்களை எதிர்த்து நாடு முழுவதும் போராட்டம் நடைபெற்று வருகிறது . இஸ்லாமியர்களை குறிவைத்து இச்சட்டம் கொண்டு வரப்பட்டுள்ளது ஆகவே இந்தச் சட்டத்தை உடனே திரும்பப் பெறவேண்டும் என போராட்டத்தில் வலியுறுத்தப்பட்டு வருகிறது. குறிப்பாக பாஜக ஆட்சியில் இல்லாத மாநிலங்களில் இச்சட்டங்களை எதிர்த்து தீர்மானங்கள் நிறைவேற்றப்பட்டு வருகிறது . மேற்கு வங்கம் , கேரளா உள்ளிட்ட மாநில அரசுகள் இச்சட்டத்தை தங்களது மாநிலத்தில் அமல்படுத்த அனுமதிக்கமாட்டோம் என எதிர்ப்பு தெரிவித்துள்ளனர். இந்நிலையில் தமிழக சட்டமன்றத்திலும் குடியுரிமையை திருத்தச் சட்டத்துக்கு எதிராக தீர்மானம் நிறைவேற்ற வேண்டும் என திமுக உள்ளிட்ட எதிர்க்கட்சிகள் வலியுறுத்தி வருகின்றனர் .
இந்நிலையில் இதுகுறித்து சென்னையில் செய்தியாளர்களுக்கு பேட்டியளித்த பாஜகவின் தேசிய செயலாளர் ஹெச் ராஜா , குடியுரிமை திருத்த சட்டம் ஏற்கனவே பாராளுமன்ற உறுப்பினர்களின் ஏகோபித்த ஆதரவால் நிறைவேற்றப்பட்டுள்ள சட்டமாகும், இந்நிலையில் இச் சட்டங்களை எதிர்த்து மாநில சட்டமன்றங்களில் நிறைவேற்றப்படும் தீர்மானங்கள் சாதாரண ஒரு லயன்ஸ் கிளப் , ரோட்டரி கிளப்புகளில் நிறைவேற்றப்படும் தீர்மானங்களுக்கு சமமானது. அவைகளுக்கு எந்த அதிகாரமும் இல்லை என அவர் விமர்சித்துள்ளார் . மத்திய அரசு சட்டத்தை கொண்டு வந்து விட்டாள் மாநில அரசுகள் அதில் அதிகாரம் செலுத்த முடியாது என அவர் தெரிவித்துள்ளார்.