Height Growth: ஸ்கிப்பிங் வேணாம்! உங்க குழந்தை உயரமா வளர இந்த 10 நிமிஷ ஸ்ட்ரெச்சிங் போதும்!

குழந்தைகளின் உயரத்தை அதிகரிக்க, கடினமான பயிற்சிகளை விட சில எளிய யோகாசனங்களும் ஸ்ட்ரெச்சிங் பயிற்சிகளும் ரொம்பவே சிறந்தது. வீட்டிலேயே தினமும் தாடாசனம், புஜங்காசனம் போன்ற ஆசனங்களைச் செய்தால், தண்டுவடம் நேராகும், வளர்ச்சி ஹார்மோன்கள் சுரக்கும். சரியான உணவு மற்றும் தூக்கத்துடன் இது உயரத்தை அதிகரிக்க உதவும்.

தங்களுடைய குழந்தை உயரமாக இல்லையே என்ற கவலை பெரும்பாலான பெற்றோருக்கு இருக்கிறது. நிறைய பேர், ஸ்கிப்பிங் அல்லது கடினமான உடற்பயிற்சிகள் செய்தால் மட்டுமே குழந்தைகள் உயரமாக வளர முடியும் என்று நினைக்கிறார்கள். ஆனால் உண்மை அதுவல்ல. தினமும் சில எளிய ஸ்ட்ரெச்சிங் மற்றும் சரியான யோகாசனங்கள் செய்வது, குழந்தைகளின் தண்டுவடத்தை நேராக்கி, தசைகளை வலுப்படுத்தும். இது வளர்ச்சி ஹார்மோன்கள் சுரக்கவும் உதவும். இதற்கு ஜிம்முக்கு எல்லாம் போகத் தேவையில்லை. வீட்டிலேயே தினமும் ஒரு 10-15 நிமிடங்கள் ஒதுக்கினால் போதும், நல்ல பலன் கிடைக்கும்.

முதலில், தாடாசனம். நேராக நின்று, இரண்டு கைகளையும் தலைக்கு மேல் உயர்த்தி, கால் விரல்களில் உடலை பேலன்ஸ் செய்து, எவ்வளவு முடியுமோ அவ்வளவு உயரத்திற்கு உடலை நீட்ட வேண்டும். இது தண்டுவடத்தை நீளமாக்கி, உடல் முழுவதும் ரத்த ஓட்டத்தை அதிகரிக்கும். இரண்டாவது, கேட்-கௌ ஸ்ட்ரெச் (Cat-Cow Stretch). பூனை, மாடு போல நான்கு கால்களில் நின்று, தண்டுவடத்தை மெதுவாக மேலும் கீழும் வளைக்க வேண்டும். இது முதுகு மற்றும் இடுப்புப் பகுதியில் உள்ள இறுக்கத்தைக் குறைக்கும்.

மூன்றாவதாக, புஜங்காசனம் அல்லது கோப்ரா போஸ். தரையில் குப்புறப் படுத்து, இரண்டு கைகளின் உதவியுடன் மார்புப் பகுதியை மட்டும் தூக்க வேண்டும். இந்த நிலையில் கழுத்தையும், முதுகையும் நேராக வைத்திருப்பது, உடலின் தோரணையை அழகாக்கும். நான்காவது, திரிகோணாசனம். இரண்டு கால்களையும் அகலமாக வைத்து, ஒரு கையால் தரையைத் தொட்டு, மற்றொரு கையை வானத்தை நோக்கி உயர்த்த வேண்டும். இது உடலின் இரு பக்க தசைகளையும் சமமாக நீட்ட உதவும்.

இந்த நான்கு ஆசனங்களையும் 20-30 வினாடிகள் வரை வைத்திருக்க வேண்டும். குழந்தைகளை ஒருபோதும் கட்டாயப்படுத்தி, உடலை அதிகமாக வளைக்கச் சொல்லக் கூடாது. அவர்கள் இயல்பாக சுவாசிக்க வேண்டும். இந்த பயிற்சிகளை வெறும் வயிற்றில், குறிப்பாக காலையில் செய்வது மிகவும் நல்லது.

வெறும் உடற்பயிற்சி மட்டும் போதாது. போதுமான தூக்கம், புரோட்டீன், கால்சியம் மற்றும் வைட்டமின் டி நிறைந்த உணவுகளையும் கொடுக்க வேண்டும். பால், முட்டை, நட்ஸ், கீரைகள் மற்றும் காய்கறிகளை தினமும் உணவில் சேர்த்துக் கொள்ளுங்கள். அதேபோல, மொபைல் அல்லது டிவி பார்க்கும் போது கூன் போட்டு உட்காரும் பழக்கத்தையும் மாற்ற வேண்டும்.

இதை எல்லாம் தொடர்ந்து செய்தால், 3-4 மாதங்களில் குழந்தையின் உடல் தோரணையிலும் உயரத்திலும் நல்ல மாற்றத்தைக் காணலாம். மரபணுக்களும் ஒரு முக்கிய பங்கு வகிக்கிறது என்பதை நினைவில் கொள்ளுங்கள். ஆனால், இந்த சரியான பழக்கவழக்கங்கள், குழந்தைகள் தங்களின் முழு உயரத்தை அடைய நிச்சயம் உதவும்.