ஒல்லியாக, மாநிறமாக இருப்பவர்கள் எந்த மாதிரியான ஆடைகளை அணிய வேண்டும் என்று தெரியாமல் எதையாவது எடுத்து உடுத்திக்கொள்வார்கள். பெண்களோ, ஆண்களோ நம்முடைய உடலமைப்பு நிறம் என்பது இறைவன் அளித்த வரம். அந்த நிறத்தையும் உடலமைப்பையும் எப்படி அழகுபடுத்துகிறோம் என்பதில்தான் சிறப்பே இருக்கிறது.
டிரெண்ட் செட்டர்
ஆள்பாதி ஆடை பாதி என்பார்கள். நாம் அணியும் ஆடைகள் நமக்கு தன்னம்பிக்கையையும் ஒருவித கம்பீரத்தையும் கொடுக்கும். கலராக நல்ல நிறமாக இருப்பவர்களைப் போல நம்மால் எல்லா வண்ண ஆடைகளையும் அணிய முடியவில்லையே என்ற ஏக்கம் சிலருக்கும். ஒல்லியாக டஸ்கி ஸ்கின் கொண்டவர்களுக்கு என்று சில டிசைன்கள், சில நிறங்கள் உள்ளன அந்த மாதிரியான வண்ணங்களை தேர்ந்தெடுத்து நாம் அணிந்து கொண்டால் நம்முடைய தோற்றம் மேலும் அழகாகும். நாம்தான் டிரெண்ட் செட்டராக இருக்க வேண்டும்.
களையான தோற்றம்
டஸ்கி ஸ்கின் கொண்டவர்கள், ஒல்லியான உடல் அமைப்பு கொண்ட பெண்கள் ஸ்டைலான தோற்றம் என்று வரும் போது, உடல் வாகுக்கு ஏற்ற ஆடைகளைத் தேர்வு செய்ய வேண்டியது மிகவும் அவசியம். துணிகளின் அமைப்பு முக்கியம். ஆடைகளை தயாரிக்க தூய பருத்தி முதல் பளபளப்பான ஜார்ஜெட் வரை ஏகப்பட்ட துணி வகைகள் உள்ளன. எனவே, உடல்வாகுக்கு ஏற்ற துணியை தேர்வு செய்வது மிகவும் அவசியம்.
ஒல்லி உடல் அமைப்பு
ஒல்லியான தோற்றம் கொண்ட பெண்கள் தடிமனான ஃபேப்ரிக் வகைகளைத் தேர்வு செய்ய வேண்டும். இத்தகைய துணிவகைகள் உங்கள் மெலிந்த தோற்றத்தை மறைத்து, நேர்த்தியான பூசியது போன்ற தோற்றத்தைக் காட்டும். அடர் வண்ணங்களைத் தேர்ந்தெடுங்கள் அதாவது அடர் நீலம், மரகத பச்சை மற்றும் பர்கண்டி போன்ற அடர் நிறங்கள் மங்கலான தோல் நிறத்தை நிரப்புகின்றன.
என்ன மாதிரி ஆடைகள்
உடல் அமைப்புக்கு ஏற்ப உடைகளை தேர்வு செய்யுங்கள். இடுப்பில் பெல்ட், பெல் பாட்டம் டிரஸ், கவுன் போன்றவை ஒல்லியானவர்களை மேலும் அழகாக்கும். கழுத்து எலும்பு தெரியும் அளவிற்கு ஒல்லியாக இருப்பவர்கள் வி கழுத்து ஆடைகள், டிசைன் கழுத்து ஆடைகள், காலர் வைத்த கவுன், குர்த்தி போன்றவை உங்கள் உடல் அமைப்பை கம்பீரமாக காட்டும். நாம் அணியும் ஆடைகளுக்கு ஏற்ப நகைகளை தேர்ந்தெடுத்து அணிவது அவசியம்.
ஸ்டைலான தோற்றம்
உங்கள் மெலிந்த தோற்றத்தை ஸ்டைலாக மாற்ற நீங்கள் குறைந்தது இரண்டு அல்லது மூன்று அடுக்குகளாக வெவ்வேறு ஆடைகள் அணியலாம். இது ஸ்டைலான தோற்றத்தை தருவதோடு, உங்கள் ஒல்லியான உடல்வாகையும் மறைக்கும். குச்சியான கால்களை மறைக்க நீளமான உடைகளை அணிவது அவசியம்.
தளர்வான ஆடைகள்
ஒல்லியான பெண்கள் எப்போதுமே இறுக்கமான ஆடைகளை அணியக்கூடாது. பாடிகான் ஆடைகள் எனப்படும் உடலைக் கவ்வும் ஆடைகள் உங்களை மேலும் ஒல்லியாகக் காட்டும். எனவே, உங்கள் உடலமைப்பை மறைக்கும் தளர்வான ஆடைகளை அணிவது கச்சிதமாக இருக்கும்.
ஆடைகளில் டிசைன்கள்
தேர்வு செய்யும் ஆடைகள், புடவைகள், குர்த்தி, சல்வார் போன்றவைகளில் பூக்கள், கட்டங்கள், டிஜிட்டல் பிரின்ட் உட்பட பல்வேறு வண்ணமயமான டிசைன்கள் அச்சடிக்கப்பட்ட ஆடைகளை தேர்வு செய்வது, ஒல்லியான பெண்களுக்கு சிறப்பான தோற்றத்தை அளிக்கும். டிசைன் அல்லது பிரிண்ட் இல்லாத பிளைன் கருப்பு நிற ஆடைகளை அணிந்தால் ரொம்பவே ஒல்லியாக காட்டும் எனவே அவற்றை தவிர்க்க வேண்டும்.
கோடுகள், கட்டங்கள்
ஒல்லியான உடல் அமைப்புக் கொண்டவர்கள் நீளவாக்கில் கோடுகள் கொண்ட ஆடைகளைத் தவிர்க்க வேண்டும். இது உங்கள் தோற்றத்தை மேலும் மெலிந்ததாகக் காட்டும். அதற்கு பதிலாக, ஹாரிசாண்டல் (குறுக்கு) அல்லது கிரிஸ் கிராஸ் கோடுகள் உள்ள டிசைனைத் தேர்வு செய்யலாம்.
கருப்பு டிரஸ்:
பெண்கள் பலரும் விரும்பும் நிறம் கருப்பு. ஆனால், கருப்பு நிறம் பெண்களை மேலும் ஒல்லியாகக் காட்டும். எனவே, ஒல்லியான உடல் வாகுள்ள பெண்கள் கருப்பு நிற ஆடைகளை அணியக்கூடாது. அதற்கு பதிலாக, பளிச் நிறங்களில் ஆடை அணியலாம். நாம் அணியும் ஆடைகள் ஒருபக்கம் நம்மை அழகாக உயர்த்தி காட்டினாலும் நாம் தன்னம்பிக்கையோடு இருந்தாலே நம்முடைய தோற்றம் மேலும் அழகாகும்.