மராத்தி பேச மறுத்தால் கன்னத்தில் அறை கிடைக்கும்: ராஜ் தாக்கரே எச்சரிக்கை!

மகாராஷ்டிராவில் மராத்தி பேச மறுப்பவர்களை கன்னத்தில் அறைய வேண்டும் என்று ராஜ் தாக்கரே எச்சரித்துள்ளார். மராத்தி மொழியை மதிக்க வேண்டும் என்றும், சாதி அடிப்படையில் பிளவுபடுவதை நிறுத்த வேண்டும் என்றும் அவர் வலியுறுத்தினார்.

மகாராஷ்டிராவில் வசிக்கும் மக்கள் மராத்தி பேச மறுத்தால் அவர்களின் கன்னத்தில் அறைய வேண்டும் என்று மகாராஷ்டிர நவநிர்மாண் சேனா (எம்என்எஸ்) தலைவர் ராஜ் தாக்கரே தெரிவித்துள்ளார். இதிலிருந்து தங்கள் கட்சி பின்வாங்காது எனவும் அவர் கூறினார்.

மத்திய மும்பையில் உள்ள சிவாஜி பூங்காவில் நடைபெற்ற கட்சி நிகழ்ச்சியில் பேசிய ராஜ் தாக்கரே, “மும்பையில் வந்து மராத்தி பேசத் தெரியாது என்று சொல்கிறார்கள். அப்படிச் சொல்பவர்களின் கன்னத்தில் அறை கொடுப்போம். நாட்டைப் பற்றியும் மற்ற அனைத்தையும் பற்றியும் என்னிடம் சொல்லாதீர்கள். ஒவ்வொரு மாநிலத்திற்கும் அதன் சொந்த மொழி உண்டு, அது மதிக்கப்பட வேண்டும். மும்பையில், மராத்தி மதிக்கப்பட வேண்டும்” என அவர் தெரிவித்தார்.

மராத்திக்காக உறுதியாக இருக்கவேண்டும்:

"நாளை முதல், ஒவ்வொரு வங்கியையும், ஒவ்வொரு நிறுவனத்தையும் கவனிப்போம். மராத்தி மொழியில் பேசுகிறார்களா என்று பார்ப்போம். அனைவரும் மராத்திக்காக உறுதியாக நிற்க வேண்டும்," என்று ராஜ் தாக்கரே கேட்டுக்கொண்டார்.தொடர்ந்து தமிழ்நாட்டை முன்னுதாரணம் காட்டிப் பேசிய அவர், "தமிழ்நாட்டைப் பாருங்கள். அவர்கள் இந்தி வேண்டாம் என்று துணிவுடன் சொல்கிறார்கள். அவர்களுடன் கேரளாவும் இருக்கிறது" என்றார்.

மகாராஷ்டிர மக்கள் சாதி அடிப்படையில் பிளவுபடுவதை நிறுத்த வேண்டும் என்று அழைப்பு விடுத்த ராஜ் தாக்கரே, மாநில ஆட்சியாளர்கள் உண்மையான பிரச்சினைகளை புறக்கணிப்பதற்காக, வேண்டுமென்றே மக்களை சாதி அடிப்படையில் பிளவுபடுத்துகிறார்கள் என்று சாடினார்.

வாட்ஸ்அப் வரலாற்றைப் படிக்காதீர்கள்:

"முதலில் வாட்ஸ்அப் வரலாற்றைப் படிப்பதையும், சாதிக் கண்ணோட்டத்தில் சிந்திப்பதையும் நிறுத்துமாறு மகாராஷ்டிர இளைஞர்களிடம் நான் வேண்டுகோள் விடுக்கிறேன். அரசியல் ரீதியாக உங்களைப் பிரிக்கவும், மராத்தியர்களாக ஒன்று சேர்வதைத் தடுக்கவும்தான் இது வசதியாக இருக்கிறது. உங்கள் கவனத்தைத் திசைதிருப்புகிறது. அதே நேரத்தில் அதானிக்கு நிலங்களை வழங்குவது போன்ற வேலைகள் அமைதியாக நடக்கின்றன" என்று ராஜ் தாக்கரே குறிப்பிட்டார்.

"தொழிலதிபர் கௌதம் அதானி மும்பை விமான நிலையத்தை எவ்வாறு நடத்துகிறார், நவி மும்பை விமான நிலையத்தைக் கட்டுகிறார், தாராவியை மறுவடிவமைப்பு செய்கிறார். அதானி நம் அனைவரையும் விட மிகவும் புத்திசாலியாக மாறிவிட்டார்," என்றும் அவர் கூறினார்.

திடீரென்று ஔரங்கசீப் நினைவுக்கு வந்தது எப்படி?

ஔரங்கசீப்பின் கல்லறையைப் பற்றி எழுந்துள்ள சர்ச்சையைக் குறிப்பிட்டுப் பேசிய ராஜ் தாக்கரே, "மராட்டியர்களால் தோற்கடிக்கப்பட்டவர்களின் கட்டமைப்புகளை நாம் அழிக்கக்கூடாது. நாம் அவர்களை அடக்கம் செய்தோம் என்பதை உலகம் அறிய வேண்டும்" என்றார்.

"எல்லோருக்கும் திடீரென்று ஔரங்கசீப் நினைவுக்கு வருவது எப்படி? படம் பார்த்து விழித்தெழுந்த இந்துவால் எந்தப் பயனும் இல்லை. வரலாற்றை வாட்ஸ்அப்பில் படிக்கக் கூடாது, புத்தகங்களில் படிக்க வேண்டும். இன்றைய காலகட்டத்தில் 400 ஆண்டுகால வரலாறு புதிய மோதலுக்கு இடமளிப்பதாக மாறக்கூடாது" என்றும் அவர் கவலை தெரிவித்தார்.