அடி தூள்.. மோடியின் மாஸ்டர் பிளான்! பெண் சுகாதாரத்தில் 3 கின்னஸ் சாதனைகள்!!

'ஸ்வஸ்த் நாரி, சஷக்த் பரிவார் அபியான்' என்ற தேசிய சுகாதார இயக்கத்தின் கீழ் இந்தியா மூன்று கின்னஸ் உலக சாதனைகளை படைத்துள்ளது. பெண்கள் மற்றும் குழந்தைகளின் ஆரோக்கியத்தை மேம்படுத்தும் இந்த முயற்சியில், அதிகபட்ச ஆன்லைன் பதிவுகள் செய்யப்பட்டுள்ளன.

தடுப்பு சுகாதார பராமரிப்பு மற்றும் பெண்களை மையமாகக் கொண்ட 'ஸ்வஸ்த் நாரி, சஷக்த் பரிவார் அபியான்' என்ற தேசிய அளவிலான சுகாதார இயக்கத்தின் கீழ் இந்தியா மூன்று கின்னஸ் உலக சாதனைகளை படைத்துள்ளது.

மத்திய சுகாதார அமைச்சகம் வெளியிட்ட அறிக்கையின்படி, இந்த திட்டத்தின் மூலம் டிஜிட்டல் தளத்திலும், கள அளவிலும் மகத்தான பங்களிப்பை அளித்து இந்த சாதனைகள் எட்டப்பட்டுள்ளன.

3 கின்னஸ் உலக சாதனைகள்

இந்தச் சாதனைகள், பொது சுகாதார முயற்சிகளை டிஜிட்டல் கண்டுபிடிப்பு மற்றும் சமூகப் பங்கேற்புடன் இணைப்பதில் இந்தியாவின் அர்ப்பணிப்பைக் காட்டுகின்றன.

ஒரு மாதத்தில் சுகாதாரத் தளத்தில் பதிவு செய்த அதிகபட்ச நபர்கள் (3.21 கோடி), ஒரு வாரத்தில் மார்பகப் புற்றுநோய் பரிசோதனைக்கு ஆன்லைனில் பதிவு செய்த அதிகபட்ச நபர்கள் (9.94 லட்சம்) மற்றும் மாநில அளவில் ஒரு வாரத்தில் முக்கிய உடல் அடையாளங்கள் (Vital Signs) பரிசோதனைக்கு ஆன்லைனில் பதிவு செய்த அதிகபட்ச நபர்கள் (1.25 லட்சம்) ஆகிய மூன்று பிரிவுகளில் கின்னஸ் சாதனைகள் நிகழ்த்தப்பட்டுள்ளன.

மகத்தான மக்கள் இயக்கம்

'போஷன் மாஹ்' (ஊட்டச்சத்து மாதம்) திட்டத்தின் ஒரு பகுதியாகத் தொடங்கப்பட்ட இந்த இயக்கம், செப்டம்பர் 17 முதல் அக்டோபர் 2 வரை நாடு முழுவதும் உள்ள பெண்கள், இளம் பெண்கள் மற்றும் குழந்தைகளின் ஆரோக்கியத்தை மேம்படுத்துவதில் கவனம் செலுத்தியது.

இந்த மாபெரும் சுகாதார முயற்சியில் 5 லட்சத்துக்கும் மேற்பட்ட பஞ்சாயத்து ராஜ் பிரதிநிதிகள், 1.14 கோடி பள்ளி மற்றும் கல்லூரி மாணவர்கள், 94 லட்சம் சுயஉதவிக் குழு உறுப்பினர்கள் மற்றும் பிற சமூக தளங்களில் இருந்து சுமார் 5 லட்சம் பேர் பங்கேற்றனர்.

காசநோயாளிகளுக்கு ஆதரவளிக்கும் அரசுத் திட்டமான 'தேசிய காசநோய் ஒழிப்புத் திட்டத்தின் (NTEP)' கீழ் 2.68 லட்சத்துக்கும் அதிகமான தன்னார்வலர்கள் பதிவுகளுக்குப் பங்களித்தனர்.