320 கிமீ வேகத்தில் சீறிப்பாயும் புல்லட் ரயில்.. தேதி குறித்த மத்திய அமைச்சர்..!

இந்தியாவின் முதல் புல்லட் ரயில் சேவை குஜராத்தின் சூரத்திலிருந்து பிலிமோரா வரை முதல் கட்ட சேவை இயக்கப்படுமென மத்திய அமைச்சர் அஸ்வினி வைஷ்ணவ் தெரிவித்துள்ளார். மேலும் இந்த அதிநவீன ரயில்கள் மணிக்கு 320 கிலோமீட்டர் வேகத்தில் பயணிக்கும் திறன் கொண்டவை.

இந்தியாவும் புல்லட் ரயில் யுகத்திற்குள் நுழைகிறது. இந்தியாவின் கனவுத் திட்டம் ஒன்றரை ஆண்டுகளில் நனவாகும் என மத்திய ரயில்வே அமைச்சர் அஸ்வினி வைஷ்ணவ் தெரிவித்துள்ளார். முதல் புல்லட் ரயில் 2027 ஆகஸ்ட் 15 அன்று சேவையைத் தொடங்கும் என மத்திய ரயில்வே அமைச்சர் அறிவித்துள்ளார். குஜராத்தின் சூரத்திலிருந்து பிலிமோரா வரை முதல் கட்ட சேவை இயக்கப்படும். மணிக்கு 320 கிலோமீட்டர் வேகத்தில் பயணிக்கக்கூடிய அதிநவீன மாடல் ரயில்கள் நாட்டிற்கு வரவுள்ளன. இது இந்தியாவின் பயணத் துறையில் ஒரு புரட்சிகரமான மாற்றத்தை ஏற்படுத்தும் திட்டம் என்று அமைச்சர் குறிப்பிட்டார்.

இந்தியா புல்லட் ரயில் யுகத்திற்குள்

ஆரம்பத்தில் சூரத் - பிலிமோரா வழித்தடத்தில் இயக்கப்பட்டாலும், விரைவில் வாபி முதல் அகமதாபாத் வரையிலும், தானே முதல் அகமதாபாத் வரையிலும் சேவைகள் விரிவுபடுத்தப்படும். இதைத் தொடர்ந்து மும்பை - அகமதாபாத் வழித்தடத்தில் முழுமையான சேவை தொடங்கும். தற்போது கட்டுமானப் பணிகள் வேகமாக நடைபெற்று வருவதாகவும், குறிப்பிட்ட காலத்திற்குள் நாடு புல்லட் ரயில் யுகத்திற்குள் நுழையும் என்றும் மத்திய அரசு தெரிவித்துள்ளது. அவ்வாறு நடந்தால், 2027 சுதந்திர தினத்தில் முதல் புல்லட் ரயிலுக்கான டிக்கெட்டை முன்பதிவு செய்யலாம். இந்த அறிவிப்பை புத்தாண்டின் முதல் நாளன்றே வெளியிட்டதால், இது இந்தியாவிற்கான புத்தாண்டுப் பரிசாகப் பலராலும் பார்க்கப்படுகிறது. 

வந்தே பாரத் ஸ்லீப்பர் ரயில்

ரயில் பயணிகள் ஆவலுடன் எதிர்பார்த்திருந்த வந்தே பாரத் ஸ்லீப்பர் ரயில் சேவையின் முதல் வழித்தடத்தை மத்திய ரயில்வே அமைச்சர் அஸ்வினி வைஷ்ணவ் அறிவித்துள்ளார். நாட்டின் முதல் வந்தே பாரத் ஸ்லீப்பர் ரயில் குவஹாத்தி - கொல்கத்தா வழித்தடத்தில் இயக்கப்படும். வரும் நாட்களில் பிரதமர் நரேந்திர மோடி இந்த ரயிலை கொடியசைத்து தொடங்கி வைப்பார் என்று இன்று நடைபெற்ற செய்தியாளர் சந்திப்பில் அவர் தெரிவித்தார். நீண்ட தூரப் பயணிகளுக்கும், இரவுப் பயணத்தை விரும்புபவர்களுக்கும் உலகத் தரம் வாய்ந்த வசதிகளை இந்த புதிய ரயில் உறுதி செய்கிறது. கோட்டா - நாக்டா பிரிவில் நடைபெற்ற அதிவேக சோதனையில், இந்த ரயில் மணிக்கு 180 கி.மீ வேகத்தை எட்டி தனது சோதனையை நிறைவு செய்தது. ரயிலில் மொத்தம் 16 பெட்டிகள் இருக்கும். இதில் 11 மூன்று அடுக்கு ஏசி பெட்டிகள் (611 இருக்கைகள்), 4 இரண்டு அடுக்கு ஏசி பெட்டிகள் (188 இருக்கைகள்), மற்றும் ஒரு முதல் வகுப்பு ஏசி பெட்டி (24 இருக்கைகள்) ஆகியவை அடங்கும். இதன் மொத்த பயணிகளின் எண்ணிக்கை 823 என ரயில்வே தெரிவித்துள்ளது.