#BREAKING: முன்னாள் ஆளுநர் உடல்நலக்குறைவால் காலமானார்! யார் இந்த சத்யபால் மாலிக்?
சுருக்கம்
ஜம்மு-காஷ்மீர் முன்னாள் ஆளுநர் சத்யபால் மாலிக் (79) கிட்னி பாதிப்பு காரணமாக டெல்லியில் சிகிச்சை பலனின்றி உயிரிழந்தார். 370வது பிரிவு ரத்து செய்யப்பட்டபோது ஜம்மு-காஷ்மீரின் ஆளுநராக இருந்தவர்.
ஜம்மு - காஷ்மீர் முன்னாள் ஆளுநர் சத்யபால் மாலிக் (79) கிட்னி பாதிப்பு காரணமாக டெல்லியில் உள்ள ராம் மனோகர் லோகியா மருத்துவமனையில் சிகிச்சை பெற்று வந்த அவர் இன்று மதியம் 1 மணியளவில் சிகிச்சை பலனின்றி உயிரிழந்தார்.
370வது பிரிவு ரத்து
ஆகஸ்ட் 2018 முதல் அக்டோபர் 2019 வரை ஜம்மு-காஷ்மீரின் கடைசி ஆளுநராக மாலிக் பணியாற்றினார். அவரது ஆட்சிக் காலத்தில்தான் 370வது பிரிவு ரத்து செய்யப்பட்டு, மாநிலத்தின் சிறப்பு அந்தஸ்து ஆகஸ்ட் 5, 2019 அன்று ரத்து செய்யப்பட்டது. இன்று அந்த முடிவின் ஆறாவது ஆண்டு நிறைவு. பின்னர் அவர் கோவா ஆளுநராக நியமிக்கப்பட்டார். அதைத் தொடர்ந்து அக்டோபர் 2022 வரை மேகாலயா ஆளுநராக பணியாற்றினார்.
ஆரம்பகால வாழ்க்கை மற்றும் அரசியல் பிரவேசம்
சத்ய பால் மாலிக் ஜூலை 24, 1946 அன்று உத்தரப் பிரதேசத்தில் உள்ள பாக்பத் மாவட்டத்தில் உள்ள ஹிசாலியில் பிறந்தார். அவரது அரசியல் பயணம் 1970களில் தொடங்கியது, 1974 இல் பாக்பத் தொகுதியிலிருந்து உத்தரப் பிரதேச சட்டமன்றத்திற்கு தேர்ந்தெடுக்கப்பட்டார். பல ஆண்டுகளாக பல்வேறு அரசியல் கட்சிகளுடன் தொடர்பு கொண்டிருந்தார். பாரதிய கிராந்தி தளத்தில் தொடங்கி, லோக் தளம், ஜனதா தளம், பின்னர் பாஜகவுடன் இணைந்தார்.
மாலிக் 1980-89 க்கு இடையில் உத்தரப் பிரதேசத்திலிருந்து மாநிலங்களவை உறுப்பினராகவும், பின்னர் 1989 முதல் 1991 வரை அலிகாரில் இருந்து மக்களவை உறுப்பினராகவும் பணியாற்றினார். நாடாளுமன்றத்தில் இருந்த காலத்தில், கிராமப்புற மேம்பாடு மற்றும் விவசாயிகளின் உரிமைகள் தொடர்பான பல பிரச்சினைகளில் பணியாற்றினார்.
வரலாற்றில் பதிவு செய்யப்பட்ட செயல்பாடுகள்
ஜம்மு-காஷ்மீரில் இருந்து சிறப்பு உரிமைச் சட்டத்தை நீக்குவதில் மாலிக் தீவிர பங்கு வகித்தார். 35A பிரிவு நீக்கப்பட்ட காலத்தில் ஜம்மு-காஷ்மீரின் ஆளுநராக இருந்த ஒரே நபர் மாலிக். அதை நீக்குவதற்கு முன்பே அவர் ஜம்மு-காஷ்மீரின் ஆளுநராக இருந்தார், இந்தப் பிரிவு நீக்கப்பட்ட பிறகும் நீண்ட காலம் ஆளுநராக இருந்தார். பிரதமர் மோடிக்கு எதிராக தொடர்ந்து கருத்துக்களை தெரிவித்து வந்தவர் சத்யபால் மாலிக் என்பது குறிப்பிடத்தக்கது.