Assam Election: அசாமில் அடிச்சு தூக்கும் பாஜக.. 3வது முறையாக ஆட்சியைப் பிடிக்கும்.. பரபர கருத்து கணிப்பு

அசாம் சட்டமன்றத் தேர்தலுக்குப் பிந்தைய கருத்துக் கணிப்பு முடிவுகள் வெளியாகியுள்ளன. இதில், முதல்வர் ஹிமந்தா பிஸ்வா சர்மா தலைமையிலான பாஜக கூட்டணி, தொடர்ந்து மூன்றாவது முறையாக ஆட்சியைப் பிடித்து ஹாட்ரிக் சாதனை படைக்கும்.

ஐந்து மாநில சட்டமன்றத் தேர்தல்களின் கடைசி கட்டமாக மேற்கு வங்கத் தேர்தல் முடிந்தவுடன், பல்வேறு நிறுவனங்களின் எக்சிட் போல் முடிவுகள் வெளியாகத் தொடங்கியுள்ளன. இந்த புள்ளிவிவரங்களின்படி, அசாமில் முதல்வர் ஹிமந்தா பிஸ்வா சர்மா தலைமையிலான பாஜக கூட்டணி பெரும்பான்மையுடன் தொடர்ந்து மூன்றாவது முறையாக ஆட்சிக்கு வரும் வாய்ப்புள்ளதாக கருத்து  கணிப்பு முடிவுகள் வெளியாகியுள்ளன. அசாம் சட்டமன்றத்தில் மொத்தம் 126 இடங்கள் உள்ள நிலையில், பெரும்பான்மைக்கு 63 இடங்கள் தேவை.

• ஆக்சிஸ் மை இந்தியா (Axis My India) கணிப்பு:

இந்தக் கணிப்பின்படி, பாஜக கூட்டணிக்கு எதிரிகளே இல்லை என்பது போல் தெரிகிறது. பாஜக கூட்டணி மூன்றில் இரண்டு பங்கு பெரும்பான்மையுடன் மிகப்பெரிய கூட்டணியாக உருவெடுக்கும் என்று இந்த கணிப்பு கூறுகிறது.

பாஜக கூட்டணி (BJP+): 88 முதல் 100 இடங்கள்

காங்கிரஸ் கூட்டணி (CONG+): 24 முதல் 36 இடங்கள்

மற்றவை (OTH): 0

* மேட்ரைஸ் (Matrize) கணிப்பு:

மேட்ரைஸ் நிறுவனமும் பாஜகவுக்கு தெளிவான பெரும்பான்மை கிடைக்கும் என்று கணித்துள்ளது. இந்தக் கணிப்பின்படி, காங்கிரஸ் தலைமையிலான கூட்டணி, பாஜகவுக்கு வலுவான போட்டியைத் தருவதில் தோல்வியடைந்துள்ளது என்பது தெளிவாகிறது.

பாஜக கூட்டணி (BJP+): 85 முதல் 95 இடங்கள்

காங்கிரஸ் கூட்டணி (CONG+): 25 முதல் 32 இடங்கள்

மற்றவை (OTH): 6 - 12 இடங்கள்

கடந்த பத்து ஆண்டுகளில் செய்யப்பட்ட வளர்ச்சிப் பணிகளும், 'டபுள் இன்ஜின்' அரசின் மீதான நம்பிக்கையும்தான் பாஜகவுக்கு சாதகமாக அமைந்துள்ளதாக அரசியல் நோக்கர்கள் கருதுகின்றனர். காங்கிரஸ் தனது கூட்டணிக் கட்சிகளுடன் சேர்ந்து அமைத்த 'மகாஜோத்' வியூகம், வாக்காளர்கள் மத்தியில் பெரிய தாக்கத்தை ஏற்படுத்தவில்லை என்றே தெரிகிறது. அனைத்து கருத்துக் கணிப்புகளுமே, பாஜக கூட்டணி பெரும்பான்மைக்குத் தேவையான 63 இடங்களை எளிதாகத் தாண்டும் என்றே கூறுகின்றன.

தற்போது 'போல் ஆஃப் எக்சிட் போல்ஸ்' (Poll of Exit Polls) உட்பட மற்ற நிறுவனங்களின் முடிவுகளுக்காகவும் காத்திருக்கிறோம். இறுதியாக, வாக்காளர்களின் தீர்ப்பு என்ன என்பது வாக்கு எண்ணிக்கை நாளில்தான் தெளிவாகத் தெரியும். அதுவரை, இந்தக் கணிப்புகள் பாஜக தரப்புக்கு கொண்டாட்டத்தையும், காங்கிரஸ் முகாமுக்கு கலக்கத்தையும் ஏற்படுத்தியுள்ளது.