பெங்களூரு - சென்னை Expressway: வெறும் 2 மணி நேரத்தில் சென்னை டூ பெங்களூரு

சென்னை, பெங்களூரு என இரு நகரங்களும் நாட்டின் முக்கியமான நகரங்களா இருக்கும் நிலையில் இரு நகரங்கள் இடையேயான பயண நேரத்தை குறைக்கும் பணி முழு வீச்சில் நடைபெற்று வருகிறது.

பெங்களூருவில் இருந்து சென்னைக்குச் செல்லும் தூரத்தையும், பயண நேரத்தையும் கணிசமாகக் குறைக்கும் புதிய விரைவுச்சாலை விரைவில் நனவாகவுள்ளது. இதன் மூலம், இரண்டு நகரங்களுக்கு இடையேயான பயண நேரம் தற்போதைய ஆறு மணி நேரத்தில் இருந்து இரண்டு மணி நேரமாகக் குறையும். ரூ.15,188 கோடி செலவில் 262 கி.மீ. நீளமுள்ள இந்த விரைவுச்சாலை, பெங்களூருவிலிருந்து சென்னைக்குச் செல்லும் தூரத்தை சுமார் 80 கி.மீ. குறைப்பது மட்டுமல்லாமல், தற்போதைய தேசிய நெடுஞ்சாலைகளில் போக்குவரத்து நெரிசலைக் குறைக்கவும் உதவும்.

தற்போது, பெங்களூருவிலிருந்து சென்னைக்குச் செல்ல ஐந்து முதல் ஆறு மணி நேரம் ஆகும். புதிய விரைவுச்சாலை திறக்கப்பட்டதும், வாகனங்கள் மணிக்கு 120 கி.மீ. வேகத்தில் பயணிக்க முடியும். மேலும், இது தென்னிந்தியாவின் இரண்டு முக்கிய நகரங்களுக்கு இடையே வர்த்தகத்தை அதிகரிக்கவும் உதவும். 2022 இல் தொடங்கப்பட்ட இந்தத் திட்டத்தின் முதல் கட்டம் 2023 இல் நிறைவடையும் என எதிர்பார்க்கப்பட்டது. ஆனால், நிலம் கையகப்படுத்துதல் தொடர்பான சிக்கல்கள் மற்றும் சுற்றுச்சூழல் அனுமதிகள் உள்ளிட்ட பல்வேறு சவால்கள் காரணமாக தாமதம் ஏற்பட்டது. சமீபத்தில், மத்திய அமைச்சர் நிதின் கட்கரி, இந்தத் திட்டம் 2026 ஜூலையில் நிறைவடையும் என்று அறிவித்தார். இதுவரை மொத்தப் பாதையில் சுமார் 100 கி.மீ. தூரம் பணிகள் நிறைவடைந்துள்ளன.

தற்போது, கர்நாடகா, ஆந்திரா, தமிழ்நாடு ஆகிய மாநிலங்களில் விரைவுச்சாலையின் பல்வேறு பகுதிகள் கட்டுமானத்தின் பல்வேறு கட்டங்களில் உள்ளன. கர்நாடகாவில், 71.7 கி.மீ. பெங்களூரு-பெத்தமங்களா பாதை நிறைவடைந்துள்ளது. சுந்தரபாளையம் முதல் பைரெட்டிப்பள்ளி வரையிலான 25 கி.மீ. பாதை இந்த ஆண்டு டிசம்பர் மாதத்திற்குள் நிறைவடையும் என எதிர்பார்க்கப்படுகிறது. ஆந்திராவில், 29 கி.மீ. பங்காருப்பாளையம்-குடிப்பாலா பாதை கிட்டத்தட்ட தயாராக உள்ளது. மீதமுள்ள 31 கி.மீ. பாதை 2026 ஜூன் மாதத்திற்குள் நிறைவடையும். தமிழ்நாட்டில், விரைவுச்சாலையின் பல பகுதிகள் கட்டுமானத்தில் உள்ளன. இது 2026 மார்ச் மாதத்திற்குள் நிறைவடையும் என எதிர்பார்க்கப்படுகிறது. கர்நாடகாவில் நிலம் கையகப்படுத்துவதில் உள்ள சிரமங்கள், சுற்றுச்சூழல் சவால்கள் மற்றும் தமிழ்நாட்டில் உள்ள புவியியல் சிக்கல்கள் தாமதத்திற்கு முக்கியக் காரணங்கள் என்று நிதின் கட்கரி விளக்கினார்.

பெங்களூரு-சென்னை விரைவுச்சாலை பணி நிறைவடைந்ததும், NH-44 மற்றும் NH-48 நெடுஞ்சாலைகளில் போக்குவரத்து நெரிசல் குறையும். இரண்டு முக்கிய பெருநகரங்களுக்கு இடையேயான பயணம் விரைவாகவும், வசதியாகவும் இருக்கும். இது சாதாரண பயணிகளுக்கு மட்டுமல்ல, சரக்குப் போக்குவரத்தையும் மேம்படுத்துவதன் மூலம் பொருளாதாரத்திற்கு புதிய உத்வேகத்தை அளிக்கும் என எதிர்பார்க்கப்படுகிறது. இந்தத் திட்டத்திற்கு கூடுதலாக, பெங்களூரு-ஹைதராபாத், பெங்களூரு-புனே உள்ளிட்ட பிற முக்கிய வழித்தடங்களுக்கான விரிவான திட்ட அறிக்கைகளை மத்திய அரசு தயாரித்து வருகிறது. இது தென்னிந்தியாவில் நகரங்களுக்கு இடையேயான இணைப்பை மேம்படுத்தும்.