ககன்யான் திட்டத்தின் 80,000 சோதனைகள் நிறைவு: இஸ்ரோ தலைவர் நாரயணன் தகவல்
சுருக்கம்
இந்தியாவின் முதல் மனித விண்வெளிப் பயணமான ககன்யான் திட்டத்தின் ஆளில்லா விண்கலம் ஏவத் தயாராக உள்ளதாக இஸ்ரோ தலைவர் அறிவித்துள்ளார். மேலும், நிலவிலிருந்து மாதிரிகளை கொண்டுவரும் சந்திரயான்-4 போன்ற எதிர்காலத் திட்டங்களையும் அவர் விவரித்தார்.
இந்தியாவின் முதல் மனிதர்கள் கொண்ட விண்வெளிப் பயணமான ககன்யான் திட்டத்திற்காக சுமார் 80,000 சோதனைகள் நிறைவடைந்துள்ள நிலையில், இதன் முதல் ஆளில்லா விண்கலத்தை எந்த நேரத்திலும் ஏவுவதற்கு இஸ்ரோ விஞ்ஞானிகள் தயாராக இருப்பதாக இஸ்ரோ தலைவர் வி. நாராயணன் இன்று (புதன்கிழமை) அறிவித்துள்ளார். இந்த ஆளில்லா விண்கலம் டிசம்பர் 2025-ல் ஏவப்பட திட்டமிடப்பட்டுள்ளது.
பெங்களூரு டெக் உச்சி மாநாடு-2025-ன் இரண்டாவது நாளில், 'இந்தியாவின் விண்வெளி தொலைநோக்கு 2047 – தொழில்நுட்பங்கள், சவால்கள் மற்றும் முன்னோக்கிய வழி' என்ற அமர்வில் பேசிய அவர், இந்தத் திட்டத்தின் கால அட்டவணை குறித்த முக்கியத் தகவல்களைப் பகிர்ந்து கொண்டார்.
ககன்யான், பாரதிய விண்வெளி நிலையம்
ககன்யான் திட்டத்தின் மூன்று ஆளில்லாப் பயணங்களில் முதலாவதை ஏவ இஸ்ரோ முழுமையாகத் தயாராக இருந்தாலும், ஏவுதல் தேதியை பிரதமர் நரேந்திர மோடி இன்னும் இறுதி செய்யவில்லை என்று அவர் மீண்டும் வலியுறுத்தினார்.
ககன்யான் திட்டத்தின் முதல் மனிதப் பயணம் 2027 ஆம் ஆண்டின் முதல் காலாண்டில் ஏவத் திட்டமிடப்பட்டுள்ளது.
2035 ஆம் ஆண்டிற்குள் பாரதிய விண்வெளி நிலையத்தை (BAS) அமைக்கும் திட்டமும் கால அட்டவணைப்படி உள்ளது. 52 டன் எடையுள்ள இந்த நிலையம், விண்வெளியில் ஒன்றிணைக்கப்பட்டு 2035-க்குள் முடிக்கப்படும். இதன் முதல் தொகுதிக்கான ஏவுதல் 2028-ல் நிகழும்.
சந்திரயான் திட்டங்களின் விரிவாக்கம்
நாரயணன், வரவிருக்கும் சந்திரயான் திட்டங்கள் பற்றிய விவரங்களை விளக்கினார்.
சந்திரயான்-4 (2027): இந்த விண்கலத்தின் வடிவம் இறுதி கட்டத்தில் உள்ளது. இதன் முக்கிய நோக்கம் நிலவில் இருந்து மாதிரிகளை பூமிக்குத் திரும்பக் கொண்டுவருவதே ஆகும். சந்திரயான்-3-ன் மொத்த எடை 3,900 கிலோவாக இருந்த நிலையில், சந்திரயான்-4-ன் எடை 9,600 கிலோவாக இருக்கும்.
சந்திரயான்-5 (லுபெக்ஸ் - 2028): இது ஜப்பானுடன் இணைந்து மேற்கொள்ளப்படும் நிலவு துருவ ஆய்வுப் பயணமாகும். இதற்காக அதிக எடை தாங்கும் லேண்டர் மற்றும் ரோவர்களைத் தயாரிக்கும் பணிகள் நடந்து வருகின்றன.
சந்திரயான்-3 லேண்டரின் எடை 1,747 கிலோவாக இருந்த நிலையில், சந்திரயான்-5 லேண்டரின் எடை 6,150 கிலோவாக இருக்கும்.
சந்திரயான்-3 ரோவரின் எடை 25 கிலோ, ஆனால் சந்திரயான்-5 ரோவரின் எடை 350 கிலோவாக இருக்கும்.
சந்திரயான்-3-ன் பயண காலம் 14 நாட்கள் மட்டுமே, ஆனால் சந்திரயான்-5-ன் நிலவுப் பயண காலம் 100 நாட்களாக இருக்கும்.