விண்வெளி வீரர்கள் நோயால் பாதிக்கப்பட்டால் எப்படி சிகிச்சை பெறுவார்கள்? முழு விவரம்!

சர்வதேச விண்வெளி நிலையத்தில் மருத்துவர்கள் இல்லை. ஆனால் விண்வெளி வீரர்கள் நோயால் பாதிக்கப்பட்டால் எப்படி மருத்துவ சிகிச்சை பெறுவார்கள்? என்பது குறித்து விரிவாக பார்ப்போம்.

How Astronauts Get Medical Treatment In Space

'ஆக்சியம் மிஷன் 4' திட்டத்தின் மூலம் இந்திய வீரர் சுபான்ஷு சுக்லா உள்ளிட்ட நான்கு பேர் அடங்கிய குழுவினர் பூமியில் இருந்து சர்வதேச விண்வெளி நிலையம் சென்றுள்ளனர். அங்கு அவர்கள் 16 நாள் தங்கி பல்வேறு ஆராய்ச்சிகளை மேற்கொள்கின்றனர். அவர்கள் கையோடு சில உணவுப் பொருட்களையும் கொண்டு சென்றுள்ளனர். 

இது ஒருபக்கம் இருக்க, விண்வெளியில் மருத்துவர் இல்லை என்றால் விண்வெளி வீரர்கள் எப்படி சிகிச்சை பெறுவார்கள் என்ற கேள்வி உங்களுக்கு வரலாம். விண்வெளியில் ஒரு முழுநேர மருத்துவர் எப்போதும் இல்லை என்றாலும், விண்வெளி வீரர்களுக்குத் தேவையான மருத்துவ உதவி கிடைக்கும். அது எப்படி என்பது குறித்து விரிவாக பார்க்கலாம்.

விண்வெளி வீரர்களுக்கு மருத்துவ பரிசோதனை

விண்வெளிக்குச் செல்லும் முன், விண்வெளி வீரர்கள் மிக விரிவான மருத்துவப் பரிசோதனைகளுக்கு உட்படுத்தப்படுகிறார்கள். உடல் ரீதியாக மிகவும் தகுதியானவர்கள் மட்டுமே விண்வெளி பயணத்திற்குத் தேர்ந்தெடுக்கப்படுகிறார்கள். ஆரோக்கியமான உணவு, உடற்பயிற்சி மற்றும் தொடர்ச்சியான உடல்நலக் கண்காணிப்பு ஆகியவை நோய்களின் அபாயத்தைக் குறைக்கின்றன.

அடிப்படை மருத்துவ பயிற்சிகள்

மேலும் ஒவ்வொரு விண்வெளி வீரர் குழுவிலும், குறைந்தது ஒரு விண்வெளி வீரர் குழு மருத்துவ அதிகாரியாக (CMO) நியமிக்கப்படுகிறார். இந்த அதிகாரிக்கு முதலுதவி, காயங்களுக்கு சிகிச்சை, ஊசி போடுவது, பல் பிடுங்குவது போன்ற அடிப்படை மருத்துவ பயிற்சிகள் சுமார் 40 மணி நேரம் வழங்கப்படுகின்றன. 

இது தவிர அனைத்து விண்வெளி வீரர்களுக்கும் அடிப்படை முதலுதவி, சி.பி.ஆர் (CPR) மற்றும் காயங்களுக்கு சிகிச்சை அளிக்கும் பயிற்சி அளிக்கப்படுகிறது. இது தவிர விண்வெளி வீரர்கள் தங்கள் உடல்நலனை சுயமாக மதிப்பிட்டு, சில சிகிச்சைகளை மேற்கொள்ளவும் தனியாக பயிற்சி பெறுகின்றனர்.

விண்வெளியில் மருந்துகள் இருக்குமா?

இது மட்டுமின்றி சர்வதேச விண்வெளி நிலையம் (ISS) மற்றும் பிற விண்கலங்களில் வலி நிவாரணிகள், ஒவ்வாமை மருந்துகள் உள்ளிட்ட அத்தியாவசிய மருந்துகள் உள்ளன. மேலும் இரத்த அழுத்த மானிட்டர்கள், இரத்த சர்க்கரை பரிசோதனை கருவிகள், காயங்களை சுத்தம் செய்யும் பொருட்கள் போன்ற அடிப்படை மருத்துவ உபகரணங்களும் அங்கு உள்ளன. நோயறிதலுக்கான சிறிய அல்ட்ராசவுண்ட் கருவிகள் போன்றவையும் சர்வதேச விண்வெளி நிலையத்தில் இருக்கும்.

வாரம் ஒருமுறை மருத்துவ கண்காணிப்பு

இது தவிர விண்வெளி வீரர்களுக்கு சிகிச்சை அளிக்கும் பூமியில் உள்ள சிறப்பு மருத்துவர்கள் குழு விண்வெளி வீரர்களின் உடல்நிலையை தொடர்ந்து கண்காணிப்பார்கள். அது மட்டுமின்றி விண்வெளி வீரர்கள் தங்களுக்கு ஒதுக்கப்பட்டுள்ள மருத்துவர்களுடன் வாரம் ஒருமுறை மருத்துவ ஆலோசனைகளை பெற்றுக் கொள்வார்கள். 

விண்வெளி வீரர்களுக்கு உடல்நலக்குறைவு அல்லது உடலில் காயம் ஏற்பட்டால் அவர்கள் ஆடியோ மற்றும் வீடியோ இணைப்புகள் மூலம் தொடர்பு கொண்டு மருத்துவ நிபுணர்களின் வழிகாட்டுதலை பெறுவார்கள்.

என்னென்ன உடல்நலக்குறைவு ஏற்படும்?

ஒருவேளை விண்வெளி வீரர்களுக்கு குணமாக முடியாத அளவுக்கு உடல்நிலை பாதிப்பு ஏற்பட்டால் அவர்கள் அவசரமாக விண்கலம் மூலம் பூமிக்கு திரும்ப முடியும். விண்வெளி வீரர்களுக்கு விண்வெளியில் என்னென்னெ உடல்நலக்குறைவுகள் ஏற்படும்? என நீங்கள் கேட்கலாம்.

 பூமிக்கும், விண்வெளிக்கும் நிறைய மாறுபாடுகள் இருப்பதால் அங்கு செட் ஆகும் வரை சிறு உடல்நலக்குறைவு ஏற்படும். விண்வெளி வீரர்களுக்கு எலும்பு அடர்த்தி மற்றும் தசை இழப்பு ஏற்படும். நோய் எதிர்ப்பு சக்தி குறையும். கதிர்வீச்சு தாக்கமும் ஏற்படும்.