பொய் கல்யாணம் உண்மைதான்… பாசமும் உண்மைதான்.! தங்க மயிலின் உருக்கமான ஒப்புதல்!
Pandian Stores: ஐபிஎஸ் ஆகும் கனவுடன் ராஜி, கதிரின் முழு ஆதரவுடன் பயிற்சி மையத்தில் சேர்ந்து சென்னைக்கு பயணமாகிறார். மறுபுறம், சரவணன் டைவர்ஸ் நோட்டீஸ் அனுப்பியதால் மனமுடைந்த தங்க மயில், மீனாவிடம் தன் தவறுகளை ஒப்புக்கொண்டு கண்ணீர் விடுகிறார்.
இன்றைய பாண்டியன் ஸ்டோர்ஸ் சீசன் 2 எபிசோடு, ராஜி மற்றும் அவரது கணவர் கதிரின் உரையாடலுடன் தொடங்குகிறது. ஐபிஎஸ் ஆக வேண்டும் என்ற ராஜியின் கனவுக்கு கதிர் முழு ஆதரவுடன் நிற்கிறார். காரைக்குடியில் உள்ள ஐபிஎஸ் கோச்சிங் சென்டரில் கண்டிப்பாக சேர வேண்டும் என்று உறுதியுடன் கூறும் கதிர், ராஜியின் எதிர்காலத்தை மாற்றும் ஒரு முக்கிய முடிவை எடுக்கிறார். கணவரின் நம்பிக்கையும் உறுதியும் ராஜிக்கு புதிய தைரியத்தையும் நம்பிக்கையையும் அளிக்கிறது.
மீனாவிடம் மனதை திறக்கும் தங்க மயில்
மறுபுறம், அலுவலக மீட்டிங் முடிந்து வெளியே வரும் மீனாவை சந்திக்கிறார் தங்க மயில். அலுவலகத்தின் எதிரே காத்திருந்த தங்க மயில், தனது வாழ்க்கை முழுவதும் குழப்பமாக மாறிவிட்டதாக கண்ணீர் மல்க புலம்புகிறார். சரவணன் டைவர்ஸ் நோட்டீஸ் கொடுத்ததால் மன அழுத்தம் அதிகரித்து, என்ன செய்வது என்று தெரியாமல் போலீஸ் ஸ்டேஷன் வரை சென்றதாக மீனாவிடம் சொல்கிறார்.
“நாங்க செய்தது எல்லாமே தப்புதான்” – தங்க மயிலின் குற்ற உணர்வு
பொய் சொல்லி கல்யாணம் செய்தது உண்மைதான் என்று ஒப்புக்கொள்ளும் தங்க மயில், அதே சமயம் சரவணன் வீட்டில் உள்ள அனைவரின் மீதும் உண்மையான பாசம் வைத்திருந்ததாக உருக்கமாக பேசுகிறார். தன்னுடைய தவறுகளை திருத்திக்கொள்ள ஒரு வாய்ப்பு மட்டும் வேண்டும் என கெஞ்சும் தங்க மயிலின் கண்ணீர், அவரது மன வேதனையை வெளிப்படுத்துகிறது.
அமைதியே தீர்வு – மீனாவின் அறிவுரை
தங்க மயிலின் கதையை அமைதியாக கேட்கும் மீனா, உணர்ச்சிவசப்படாமல் அறிவுரையுடன் பேசுகிறார். “அமைதியாக இரு… உங்க அம்மா பேச்சை கேட்டு அவசர முடிவு எதுவும் எடுக்காதே. நல்லது நடக்கும்” என கூறும் மீனா, பொறுமையே இப்போதைக்கு ஒரே தீர்வு என வலியுறுத்துகிறார். ஆனால், “நான் பொறுமையா இருந்தா எல்லாம் மாறிடுமா?” என்று மீண்டும் மீண்டும் கேட்கும் தங்க மயில், இன்னும் தீராத குழப்பத்தில் இருப்பதை காட்டுகிறது.
ஐபிஎஸ் கோச்சிங் அட்மிஷன்: மகிழ்ச்சியும் தயக்கமும்
இதற்கிடையில், ராஜியும் கதிரும் ஐபிஎஸ் கோச்சிங் சென்டருக்கு சென்று அட்மிஷன் போடுகின்றனர். ஒரு லட்சம் ரூபாய் பயிற்சி கட்டணம் என்றதும் ராஜி தயங்குகிறார். ஆனால், “இது உன் கனவு… பணம் பற்றி கவலைப்படாதே” என்று கதிர் கூறி, ராஜிக்கு மன உறுதி அளிக்கிறார். இந்த தருணம், கணவன்–மனைவி உறவின் ஆழத்தை வெளிப்படுத்துகிறது.