New Aadhaar App: புதிய ஆதார் மொபைல் ஆப் அறிமுகம் – முக்கிய அம்சங்கள் என்னென்ன?

New Aadhaar App: UIDAI, மேம்பட்ட பாதுகாப்பு அம்சங்களுடன் புதிய ஆதார் செயலியை அறிமுகப்படுத்தியுள்ளது. பல்வேறு வசதிகளுடன் கூடிய இந்த புதிய செயலியைப் பதிவிறக்கம் செய்யுமாறு பயனர்கள் அறிவுறுத்தப்படுகிறார்கள்.

காலாவதியாகும் பழைய செயலி

இந்திய தனித்துவ அடையாள ஆணையம் (UIDAI) பாதுகாப்பை மேம்படுத்தும் வகையில் முற்றிலும் புதிய அம்சங்களுடன் கூடிய ‘ஆதார்’ (Aadhaar) மொபைல் செயலியை அதிகாரப்பூர்வமாக அறிமுகப்படுத்தியுள்ளது. அதே வேளையில், தற்போதைய பயன்பாட்டில் இருக்கும் பழைய ‘mAadhaar’ செயலி விரைவில் நிறுத்தப்படும் என்றும், பொதுமக்கள் அனைவரும் இந்த புதிய செயலியைப் பதிவிறக்கம் செய்து பயன்படுத்துமாறும் UIDAI தனது அதிகாரப்பூர்வ எக்ஸ் (X) பக்கத்தில் அறிவுறுத்தியுள்ளது.

டிஜிட்டல் தனிநபர் தரவுப் பாதுகாப்பு (DPDP) சட்டத்தின் விதிகளுக்கு உட்பட்டு, பயனர்களின் தனியுரிமைக்கு (Privacy) முக்கியத்துவம் அளிக்கும் வகையில் இந்த புதிய செயலி வடிவமைக்கப்பட்டுள்ளது.

புதிய ஆதார் செயலியின் முக்கிய அம்சங்கள்

1. கட்டுப்படுத்தப்பட்ட தரவுப் பகிர்வு (Selective Sharing): பழைய செயலியைப் போல முழு ஆதார் விவரங்களையும் காட்ட வேண்டிய அவசியமில்லை. ஹோட்டல் முன்பதிவு, மருத்துவமனை அனுமதி அல்லது வயதுச் சான்று போன்ற தேவைகளுக்கு, பெயர், புகைப்படம் அல்லது பிறந்த தேதி போன்ற குறிப்பிட்ட விவரங்களை மட்டும் தேர்ந்தெடுத்துப் பகிரும் வசதி இதில் உள்ளது.

2. க்யூஆர் கோட் சரிபார்ப்பு (QR-based Verification): இதன் மூலம் உங்கள் ஆதார் அட்டையின் நகலை எங்கும் சமர்ப்பிக்க வேண்டியதில்லை. செயலியில் உள்ள க்யூஆர் கோடை காண்பித்து அடையாளத்தைச் சரிசெய்து கொள்ளலாம். இந்த அம்சம் இணைய வசதி இல்லாத இடங்களிலும் (Offline) வேலை செய்யும்.

3. முக அங்கீகார வசதி (Face Authentication): முன்பு ஒடிபி (OTP) மட்டுமே முக்கியச் சரிபார்ப்பு முறையாக இருந்த நிலையில், தற்போது கூடுதல் பாதுகாப்பிற்காக இந்த செயலியில் முக அங்கீகார (Face ID) வசதி சேர்க்கப்பட்டுள்ளது.

4. பயோமெட்ரிக் லாக் மற்றும் அன்லாக்: பயனர்கள் தங்களின் கைரேகை மற்றும் முக அங்கீகாரப் பதிவுகளைத் தேவைக்கேற்ப ஒரே கிளிக்கில் செயலியில் இருந்தபடியே லாக் (Lock) அல்லது அன்லாக் (Unlock) செய்து கொள்ள முடியும். இது தவறான பயன்பாடுகளைத் தடுக்கும்.

5. பயன்பாட்டு வரலாறு (Authentication History): உங்கள் ஆதார் விவரங்கள் எங்கு, எப்போது பயன்படுத்தப்பட்டன என்பதைச் செயலியின் மூலம் துல்லியமாகக் கண்காணிக்க முடியும்.

6. ஒரே செயலியில் குடும்ப உறுப்பினர்களின் விவரங்கள்: ஒரே மொபைல் எண்ணுடன் இணைக்கப்பட்ட குடும்ப உறுப்பினர்களின் (குழந்தைகள் அல்லது முதியவர்கள்) அதிகபட்சமாக 5 ஆதார் ப்ரொஃபைல்களை இந்த ஒரே செயலியில் நிர்வகிக்கலாம்.

7. முகவரி மற்றும் மொபைல் எண் மாற்றம்: ஆதார் மையங்களுக்குச் செல்லாமல், இந்தச் செயலியின் மூலமாகவே முகவரி மற்றும் மொபைல் எண் போன்ற விவரங்களைப் புதுப்பித்துக் கொள்ள முடியும்.

செயலியின் அமைப்புச் செயல்முறை (Setup Process)

பாதுகாப்பு அடுக்குகள் அதிகரித்துள்ளதால், இந்த புதிய செயலியின் அமைப்புச் செயல்முறை சற்று விரிவானதாக மாற்றப்பட்டுள்ளது:

1. கூகுள் பிளே ஸ்டோர் (Play Store) அல்லது ஆப்பிள் ஆப் ஸ்டோரில் (App Store) இருந்து அதிகாரப்பூர்வ புதிய ‘Aadhaar’ செயலியைப் பதிவிறக்கம் செய்யவும்.

2. உங்களுக்கு விருப்பமான மொழியைத் தேர்ந்தெடுத்து, உங்கள் அதாருடன் இணைக்கப்பட்ட மொபைல் எண்ணை உள்ளிடவும்.

3. மொபைல் எண்ணிற்கு வரும் OTP-ஐப் பதிவிட்டு சரிபார்க்கவும்.

4. பாதுகாப்பு அமைப்பின் ஒரு பகுதியாக, செயலி உங்கள் முக அங்கீகாரத்தைக் (Face Authentication) கேட்கும்.

5. அதன் பின்னர், 6 இலக்க PIN எண்ணை உருவாக்கி, கூடுதல் பாதுகாப்பிற்காக பயோமெட்ரிக் அன்லாக்கையும் (Biometric Unlock) ஆன் செய்து கொள்ளலாம்.

6. மீண்டும் ஒருமுறை OTP சரிபார்ப்பு முடிந்தவுடன் உங்கள் கணக்கு முழுமையாகச் செயல்பாட்டிற்கு வரும்.

கூடுதல் தகவல் (இலவச ஆவணப் புதுப்பிப்பு நீட்டிப்பு):

புதிய செயலி அறிமுகத்துடன், மைஆதார் (myAadhaar) இணையத்தளம் மூலம் ஆதார் ஆவணங்களை (அடையாளம் மற்றும் முகவரிச் சான்று) இலவசமாகப் புதுப்பிப்பதற்கான காலக்கெடுவை 2027 ஜூன் 14 ஆம் தேதி வரை UIDAI நீட்டித்துள்ளது. இதற்கு முன் இச்சேவை 2026 ஜூன் 15 வரை மட்டுமே இலவசமாக வழங்கப்படும் என அறிவிக்கப்பட்டிருந்தது குறிப்பிடத்தக்கது.