Meta-வால் ஷாக் ஆன ரீல்ஸ் திருடர்கள்! அசல் கண்டென்ட்-க்கு அங்கீகாரம்... காப்பிக்கு சங்கு! புதிய டூல் அறிமுகம்

Content Protection மெட்டா நிறுவனம், கிரியேட்டர்களின் ரீல்ஸ் திருடப்படுவதைத் தடுக்க 'Facebook Content Protection' என்ற புதிய கருவியை அறிமுகப்படுத்தியுள்ளது. இதன் மூலம் திருடப்பட்ட உள்ளடக்கத்தை பிளாக் செய்யலாம் அல்லது கண்காணிக்கலாம்

Content Protection காப்பி செய்யப்பட்டால் உடனே அலர்ட்!

கிரியேட்டர்களின் (படைப்பாளிகள்) அனுமதியின்றி அவர்களது ரீல்ஸ் (Reels) உள்ளடக்கங்கள் நகலெடுக்கப்படுவதைத் தடுக்க, Meta நிறுவனம் புதிய கருவி ஒன்றை அறிவித்துள்ளது. அதன் பெயர்தான் Facebook Content Protection. ஒரு ரீல் அசல் உள்ளடக்கத்துடன் மிகவும் ஒத்திருக்கும்போது, இந்த அமைப்பு உடனடியாக அதை கண்டறிந்து, அசல் உள்ளடக்கத்தை உருவாக்கியவருக்குத் தெரிவிக்கும்.

இந்த எச்சரிக்கையைப் பெற்ற கிரியேட்டர்கள், நகலெடுக்கப்பட்ட உள்ளடக்கத்தை எங்கும் தோன்றாதவாறு தடை செய்யலாம் (Block), அதன் பார்வைகள் மற்றும் பரவலை கண்காணிக்கலாம் (Track), அல்லது அசல் உள்ளடக்கத்தைக் குறிப்பிட்டுக் காட்டும் இணைப்புகளை (Attribution Links) சேர்க்கலாம். ஒருவேளை அவர்கள் அந்த உள்ளடக்கத்தை பயன்படுத்த அனுமதிக்க விரும்பினால், உரிமைகோரலை விடுவிக்கலாம் (Release).

கருவி எப்படி வேலை செய்கிறது?

இந்தச் செயல்முறை வேலை செய்ய, கிரியேட்டர்கள் தங்கள் ரீல்ஸ்களை முதலில் Facebook-ல் பதிவேற்ற வேண்டும் (நேரடியாகவோ அல்லது Instagram-ன் 'Share to Facebook' அம்சத்தைப் பயன்படுத்தியோ). ஒருமுறை அசல் ரீல் இந்த அமைப்பில் வந்த பிறகு, Meta-வின் Right Manager கருவியில் பயன்படுத்தப்படும் அதே தொழில்நுட்பத்தைப் பயன்படுத்தி, இந்த கருவி இரண்டு தளங்களிலும் (Facebook மற்றும் Instagram) பொருந்தக்கூடிய உள்ளடக்கத்தை ஸ்கேன் செய்கிறது.

நகலெடுக்கப்பட்ட ரீல் அசல் உள்ளடக்கத்துடன் எவ்வளவு நெருக்கமாக பொருந்துகிறது என்பது பற்றிய விரிவான அறிக்கைகளையும், பார்வையாளர்களின் எண்ணிக்கை மற்றும் நகலெடுக்கப்பட்ட ரீலை பகிர்ந்த கணக்கின் ஃபாலோவர் எண்ணிக்கை போன்ற புள்ளிவிவரங்களையும் கிரியேட்டர்கள் பெறுவார்கள். மேலும், கிரியேட்டர்கள் தங்களுக்குப் பிடித்தமான பார்ட்னர்கள் அல்லது அங்கீகரிக்கப்பட்ட கணக்குகள் தங்கள் வீடியோக்களைப் பயன்படுத்த அனுமதிக்கும் ஒரு 'அனுமதிப் பட்டியலையும்' (Allow List) உருவாக்கலாம்.

அசல் உள்ளடக்கத்தை ஊக்குவிக்க Meta-வின் திட்டம்

சமீப காலமாக, Meta தனது தளங்களில் அசல் உள்ளடக்கத்தை (Original Content) ஊக்குவிக்க அதிக கவனம் செலுத்தி வருகிறது. இந்த புதிய அமைப்பும் அதன் முயற்சிகளுடன் ஒத்துப்போகிறது. ஷார்ட்-ஃபார்ம் வீடியோ உள்ளடக்கம் பெரும் புகழ் பெற்றுள்ள நிலையில், உண்மையான கிரியேட்டர்கள் தங்கள் உழைப்புக்குரிய அங்கீகாரத்தையும், அதன் மீதான கட்டுப்பாட்டையும் பெறுவதை Meta உறுதி செய்ய விரும்புகிறது. இந்த ஆண்டின் தொடக்கத்தில், போலிச் செயல்பாடுகள் மற்றும் ஸ்பேம் ஈடுபட்ட 5,00,000 கணக்குகளுக்கு எதிராக Meta நடவடிக்கை எடுத்ததுடன், 10 மில்லியன் ஆள்மாறாட்ட சுயவிவரங்களையும் நீக்கியது குறிப்பிடத்தக்கது.

இந்த வசதி யாருக்கு கிடைக்கும்?

இந்த உள்ளடக்கப் பாதுகாப்பு வசதியானது, Meta-வின் Content Monetisation திட்டத்தில் உள்ள கிரியேட்டர்களுக்கு, அவர்கள் அசல் உள்ளடக்கத்திற்கான விதிமுறைகளை பூர்த்தி செய்தால், தானாகவே கிடைக்கும். மேலும், Right Manager கருவியைப் பயன்படுத்தும் பயனர்களுக்கும் இது கிடைக்கும். தகுதியுள்ள கிரியேட்டர்களுக்கு அவர்களின் ஃபீட், Professional Dashboard அல்லது புரொஃபைலில் அறிவிப்புகள் காட்டப்படும். மற்றவர்கள், Content Protection பிரிவின் மூலம் அல்லது Meta-வின் அதிகாரப்பூர்வ இணையதளம் வழியாக விண்ணப்பித்துப் பெறலாம்.

தவறான பயன்பாட்டிற்கு எதிராக பாதுகாப்பு

நகலெடுக்கப்பட்ட ரீல்ஸ்களைத் தடைசெய்வது என்பது, அதன் பரவலைக் குறைக்குமே தவிர, அந்தக் கணக்கிற்குத் தண்டனை அல்ல என்று Meta தெளிவுபடுத்தியுள்ளது. அதாவது, இந்த அம்சத்தைத் தவறாகப் பயன்படுத்தும் வாய்ப்பைத் தவிர்க்கவே இந்த ஏற்பாடு. இருப்பினும், இந்த அமைப்பைத் தவறாகப் பயன்படுத்துவோர் தங்கள் அணுகலை இழக்க நேரிடும். தவறான உரிமைகோரல்களுக்கான மேல்முறையீடுகளையும் Meta-வின் IP அறிக்கையிடல் சேனல் வழியாக அல்லது 'Can't find a specific match?' என்ற புதிய விருப்பத்தின் மூலம் கிரியேட்டர்கள் சமர்ப்பிக்கலாம்.

தற்போது, இந்த கருவி மொபைல் செயலிகளில் மட்டுமே கிடைக்கிறது; இருப்பினும், எதிர்காலத்தில் டெஸ்க்டாப் Professional Dashboard-ல் இதைக் கொண்டுவர Meta சோதனை செய்து வருகிறது.