14,000 அடி உயரத்தில் மேட்டை நோக்கித் தானாக நகரும் கார்கள்: லடாக் மேக்னடிக் ஹில்-லின் பின்னணியில் உள்ள அறிவியல் உண்மை!

சுமார் 14,000 அடி உயரத்தில் லே-கார்கில் தேசிய நெடுஞ்சாலையில் லடாக்கின் 'மேக்னடிக் ஹில்' பகுதியில், நியூட்ரலில் நிறுத்தப்படும் வாகனங்கள் புவியீர்ப்பு விசைக்கு எதிராகத் தானாகவே மேட்டை நோக்கி நகர்வது பயணிகளை வியப்பில் ஆழ்த்துகிறது.

அமைவிடம் மற்றும் பின்னணி

இமயமலையின் நடுவே, பிராணவாயு குறையும் உச்சிப் பகுதிகளில், ஒரு காலத்தில் கடலுக்கு அடியில் இருந்து தற்போது உயர்ந்த பாலைவனமாக மாறிய நிலப்பரப்பில் லடாக் அமைந்துள்ளது. கடல் மட்டத்திலிருந்து சுமார் 14,000 அடி உயரத்தில், லே-கார்கில்-பால்டிக் தேசிய நெடுஞ்சாலையில் இந்த மேக்னடிக் ஹில் அமைந்துள்ளது.

'இன்க்ரெடிபிள் இந்தியா' (Incredible India) தகவலின்படி, இமயமலைத் தொடர்களால் சூழப்பட்டு, கிழக்கு பகுதியில் சிந்து நதியால் தழுவிச் செல்லப்படும் இந்த இடம், பல தலைமுறைகளாகப் பயணிகளையும் விஞ்ஞானிகளையும் ஒருசேர ஆச்சரியத்தில் ஆழ்த்தி வருகிறது.

லடாக் மேக்னடிக் ஹில்லின் அறிவியல் உண்மை என்ன?

சுமார் 14,000 அடி உயரத்தில் அமைந்துள்ள லடாக்கின் 'மேக்னடிக் ஹில்' பகுதியில், நியூட்ரலில் நிறுத்தப்படும் வாகனங்கள் தானாகவே மேட்டை நோக்கி நகர்வது போன்ற விசித்திரமான காட்சி பயணிகளை வியப்பில் ஆழ்த்தி வருகிறது. புவியீர்ப்பு விதியை மீறுவது போல் தோன்றும் இந்த நிகழ்வின் பின்னணியில் உள்ள அறிவியல் உண்மைகள் மற்றும் சுவாரஸ்யமான தகவல்கள் வெளியாகியுள்ளன.

இயற்பியல் விதியா அல்லது பார்வை மாயையா?

புவியீர்ப்பு விசைக்கு எதிராக வாகனங்களை மேட்டை நோக்கி இழுக்கும் விசித்திர ஆற்றலுக்காகவே இந்த இடம் புகழ்பெற்றது. குறிப்பிட்ட சாலையில் குறிக்கப்பட்ட ஒரு பகுதிக்கு வாகனத்தை ஓட்டிச் சென்று, இன்ஜினை ஆஃப் செய்துவிட்டு நியூட்ரலில் போட்டால், வண்டி தானாகவே மேட்டுப்பகுதியை நோக்கி நகரத் தொடங்குவதைக் காண முடிகிறது.

ஆனால், புவியீர்ப்பு விசை செயல்படாமல் போவது இதற்குக் காரணமல்ல என்றும், அந்த நிலப்பரப்பு ஏற்படுத்தும் ஒரு பார்வை மாயையே (Optical Illusion) இதற்குக் காரணம் என்றும் 'இன்க்ரெடிபிள் இந்தியா' விளக்கம் அளித்துள்ளது.

அங்குள்ள சாலை உண்மையில் கீழ்நோக்கிய இறக்கத்தில்தான் உள்ளது. ஆனால், கண்ணுக்குத் தெரியும் எல்லைக் கோடு (Horizon) தெளிவாக இல்லாததாலும், சாலையின் உண்மையான சரிவை அளவிட உதவும் நிலப்பரப்பு அடையாளங்கள் அங்கு அமையாததாலும், அந்த இறக்கம் பார்ப்பதற்கு மேல்நோக்கிய மேடு போல மனிதக் கண்களைத் தவறாக நம்ப வைக்கிறது. இதனால், இறக்கத்தில் வண்டி உருள்வது மேட்டில் ஏறுவது போன்ற தோற்றத்தை ஏற்படுத்துகிறது.

உலாவும் நம்பிக்கைகளும் கதைகளும்

அறிவியல் விளக்கம் இவ்வாறு இருக்க, இந்த மலையைச் சுற்றிப் பல்வேறு நம்பிக்கைகளும் கதைகளும் உலவுகின்றன. இந்த மலையில் அபாரமான காந்தப்புலம் இருப்பதால்தான் வண்டிகள் இழுக்கப்படுகின்றன என்று சிலர் நம்புகின்றனர்.

அதேபோல், இயற்பியல் விதிகளைத் தாண்டிய ஆன்மீக சக்தி கொண்ட இடம் இது என்றும், மனித உலகுக்கும் அமானுஷ்ய சக்திக்கும் இடையேயான எல்லைக் கோடு மறையும் புனிதம் வாய்ந்த இடம் என்றும், ஒரு காலத்தில் இது சொர்க்கத்திற்குச் செல்லும் பாதையாக இருந்தது என்றும் அங்கு உள்ளூர் அளவில் கதைகள் கூறப்படுகின்றன.

பயணிப்பது எப்படி?

சுற்றிலும் பரந்து விரிந்த மலைகளும் பள்ளத்தாக்குகளும் நிறைந்த அழகிய நிலப்பரப்பைக் கொண்டுள்ளதால், சுற்றுலாப் பயணிகளுக்கும் புகைப்படக் கலைஞர்களுக்கும் இது விருப்பமான இடமாக உள்ளது. மேக்னடிக் ஹில் பகுதிக்குச் செல்ல மே முதல் செப்டம்பர் வரையிலான காலமே மிகச் சிறந்ததாகக் கருதப்படுகிறது.லே நகரிலிருந்து மேற்கு நோக்கி சுமார் 27 முதல் 30 கிலோமீட்டர் தூரத்தில் அமைந்துள்ள இந்த இடத்திற்கு, கார் அல்லது பைக்கில் சென்றால் 45 முதல் 50 நிமிடங்களில் சென்றடையலாம். அங்கு சாலையில் வெள்ளைக் கோடு போட்டு குறிக்கப்பட்டிருக்கும் பெட்டிக்குள் வாகனத்தை நிறுத்தி, நியூட்ரலுக்கு மாற்றி பிரேக்கை விட்டால், வாகனம் தானாக மேட்டை நோக்கி ஏறுவது போன்ற பிரமிப்பான அனுபவத்தை உணர முடியும்.