தீபாவளி பண்டிகையை முன்னிட்டு, ஊழியர்களுக்கு 20% போனஸ் அறிவிக்கப்பட்டுள்ளது. இதன்படி, தகுதியுள்ள ஊழியர்கள் குறைந்தபட்சம் ரூ.8,400 முதல் அதிகபட்சம் ரூ.16,800 வரை போனஸ் பெறுவார்கள். இதற்கு முன்னர், அரசு மற்றும் பொதுத்துறை ஊழியர்களுக்கு 3% அகவிலைப்படி உயர்வும் அறிவிக்கப்பட்டது.
அரசு ஊழியர்களுக்கு தீபாவளி பரிசு
தீபாவளி பண்டிகையையொட்டி மத்திய மற்றும் மாநில அரசுகள் ஊழியர்களுக்கு அடுத்தடுத்து இனிப்பான செய்திகளை வழங்கி வருகிறது. அந்த வகையில் கடந்த சில நாட்களுக்கு முன்பாக மத்திய அரசு ஊழியர்களுக்கு 3 சதவிகித அகவிலைப்படி உயர்வு அறிவித்தது. இதனை தொடர்ந்து மத்திய அரசு ஊழியர்களுக்கு இணையாக மாநில அரசு ஊழியர்களுக்கும் 3 சதவிகித அகவிலைப்படி உயர்த்தி வழங்கப்பட்டது.
50 சதவீதமாக உள்ள அகவிலைப்படி 3 சதவீதம் உயர்ந்து 01.07.2024 முதல் 53 சதவீதமாக உயர்த்தி வழங்கப்படும் என அறிவிக்கப்பட்டது. இந்த அகவிலைப்படி உயர்வால், சுமார் 16 இலட்சம் அரசு அலுவலர்கள், ஆசிரியர்கள். ஓய்வூதியதாரர்கள் மற்றும் குடும்ப ஓய்வூதியதாரர்கள் பயன்பெறுவார்கள் என தெரிவிக்கப்பட்டது.
20 சதவிகித போனஸ்
இதனையடுத்து தீபாவளி பண்டிகையையொட்டி அரசு பொதுத்துறை நிறுவனங்களில் பணியாற்றும் சி மற்றும் டி பிரிவு ஊழியர்களுக்கு 20 சதவீதம் போனஸ் வழங்கப்படும் என்று தமிழ்நாடு முதலமைச்சர் மு க ஸ்டாலின் கடந்த வாரம் அறிவித்திருந்தார்.
லாபம் ஈட்டியுள்ள பொதுத்துறை நிறுவனங்களில் பணிபுரியும் சி மற்றும் டி பிரிவு ஊழியர்களுக்கு அந்தந்த நிறுவனங்களில் ஒதுக்கப்படும் உபரி தொகையை கணக்கில் கொண்டு 8.33 சதவீதம் மிகை ஊதியம் மற்றும் 11.67 சதவீதம் கருணைத்தொகை வழங்கப்படும் எனவும் ஒட்டுமொத்தமாக 20 சதவீதம் வரை தீபாவளி போனஸ் வழங்கப்படவுள்ளதாக தெரிவிக்கப்பட்டது.
டாஸ்மாக் ஊழியர்களுக்கு போனஸ்
இதில் தமிழ்நாடு மின் உற்பத்தி மற்றும் பகிர்மான கழகம், தமிழ்நாடு அரசு போக்குவரத்து கழகம், தமிழ்நாடு நுகர்பொருள் வாணிபக் கழகம், தமிழ்நாடு பால் உற்பத்தியாளர்கள் கூட்டுறவு இணையம் ஆகியவற்றில் பணிபுரியும் சி மற்றும் டி பிரிவு ஊழியர்களுக்கு தீபாவளி போனஸாக 20 சதவீதம் வழங்கப்படும் எனவும் அறிவிக்கப்பட்டிருந்தது. இதன் தொடர்ச்சியாக,ஒவ்வோர் துறையும் தனித்தனியாக தங்கள் ஊழியர்களுக்கு போனஸ் அறிவித்து வருகின்றன. அந்த வகையில், டாஸ்மாக் ஊழியர்களுக்கு 20 சதவீதம் போனஸ் வழங்கப்படும் என அறிவிக்கப்பட்டுள்ளது.
அதிகபட்சமாக 16800 ரூபாய் போனஸ்
அதன் படி தகுதியுள்ள டாஸ்மாக் ஊழியர்கள் குறைந்தபட்சம் 8,400 ரூபாயும், அதிகபட்சம் 16,800 ரூபாயும் போனஸ் தொகையாக பெறுவார்கள். தீபாவளி போனஸ் மூலம் 25,824 டாஸ்மாக் பணியாளர்கள் பயனடைய உள்ளனர். டாஸ்மாக் மேற்பார்வையாளர், விற்பனையாளர், உதவி விற்பனையாளர் என்ற அடிப்படையில் தீபாவளி போனஸ் கிடைக்கப்பெறும். தமிழக அரசின் போனஸ் அறிவிப்பில் பொதுத்துறை ஊழியர்கள் உற்சாகத்தில் உள்ளனர். இந்தநிலையில் கடந்த ஆண்டும் தமிழக அரசு ஊழியர்களுக்கு 20 சதவீத தீபாவளி போனஸ் வழங்கப்பட்டது குறிப்பிடத்தக்கது.