
பாஷா பாய், ராஜு பாய், ராக்கி பாய் என சினிமாவில் பல மாஸ் ஹீரோக்களைப் பார்த்திருப்பீர்கள். அவர்களுடைய அதிரடி வசனங்களும், கம்பீரமான என்ட்ரியும் ரசிகர்களை வெகுவாகக் கவர்ந்திருக்கும். ஆனால், இப்போது இணையத்தையே தன் பக்கம் திரும்பிப் பார்க்க வைத்திருக்கும் ஒரு புது பாய் இருக்கிறார். அவர்தான் ஷேரு பாய்.
சினிமாவில் ஹீரோக்களுக்கு மாஸ் என்ட்ரி கொடுப்பதைப் பார்த்திருப்போம். அரசியல்வாதிகளுக்கு பின்னால் தொண்டர்கள் படை திரள்வதையும் பார்த்திருப்போம். சிங்கத்துக்குக்கூட இப்போது தனி ரசிகர் பட்டாளமா எனக் கேட்கிறீர்களா?
ஆனால், ஒரு சிங்கம் கோட் சூட் அணிந்து, கழுத்தில் தங்கச் சங்கிலியுடன், கோடிக்கணக்கான சொத்துக்களுக்கு அதிபதியாக வலம் வந்து, ஒட்டுமொத்த இணையத்தையும் தன் பக்கம் திரும்பிப் பார்க்க வைத்தால் எப்படி இருக்கும்? அதுதான் இப்போது இணையத்தில் பேசுபொருளாக மாறியிருக்கும் ஷேரு பாய் (Sheru Bhai) என்ற AI சிங்கத்தின் கதை.
இன்ஸ்டாகிராம் ரீல்ஸ், ஃபேஸ்புக் வீடியோக்கள், யூடியூப் ஷார்ட்ஸ் என எங்கு பார்த்தாலும் இந்த சிங்கத்தின் வீடியோக்கள்தான் கண்ணில் படுகின்றன. சாதாரணமாக விலங்குகளின் வீடியோக்களைப் பார்த்து ரசிக்கும் ரசிகர்கள்கூட, இந்த சிங்கத்தின் வித்தியாசமான ஸ்டைல், மாஸ் வசனங்கள், பணக்கார தோரணை ஆகியவற்றைப் பார்த்து ஆச்சரியத்தில் ஆழ்ந்துள்ளனர்.
குறிப்பாக, செயற்கை நுண்ணறிவு தொழில்நுட்பத்தின் உதவியுடன் உருவாக்கப்பட்ட ஒரு கற்பனைக் கதாபாத்திரம் எப்படி இவ்வளவு குறுகிய காலத்தில் இணையத்தில் தனக்கென ஒரு ரசிகர் வட்டத்தை உருவாக்குகிறது என்பதுதான் இப்போது கவனிக்க வேண்டிய விஷயம். குழந்தைகள் முதல் இளைஞர்கள் வரை பலரையும் கவரும் இந்த ஷேரு பாய் டிரெண்ட், தமிழகத்திலும் தமிழ் ரீல்ஸ் வடிவில் கவனம் பெறத் தொடங்கியுள்ளது.
அப்படி என்ன இருக்கிறது இந்த ஷேரு பாயிடம்? இவருடைய வீடியோக்கள் ஏன் இவ்வளவு வைரலாகின்றன? தமிழக ரசிகர்கள் இவரிடம் எதிர்பார்ப்பது என்ன? விரிவாகப் பார்க்கலாம்.
செயற்கை நுண்ணறிவு தொழில்நுட்பத்தின் மூலம் உருவாக்கப்பட்ட கற்பனையான சிங்க மனிதக் கதாபாத்திரம். பொதுவாக இந்தக் கதாபாத்திரம் பெரிய சிங்கத்தின் தலையுடன் மனித உடல் அமைப்பில் காட்சியளிக்கிறது.
வெள்ளை நிற கோட் சூட், கழுத்தில் தடிமனான தங்கச் சங்கிலி, கையில் விலை உயர்ந்த வாட்ச், கண்களில் கூலிங் கிளாஸ் என ஒரு மிகப்பெரிய கோடீஸ்வரருக்கான அனைத்து அடையாளங்களுடனும் வலம் வருகிறது.
அதுமட்டுமல்லாமல், இவருடைய வீடியோக்களில் சொகுசு கார்கள், பிரம்மாண்ட பங்களாக்கள், தனி விமானங்கள், ஏலக்கூடங்கள் என அனைத்துமே ஆடம்பரத்தின் உச்சமாக இருக்கும்.
'ஷேரு' என்பது சிங்கத்தைக் குறிக்கும் இந்தி மொழி சார்ந்த செல்லப்பெயர். 'பாய்' என்றால் சகோதரர். இரண்டையும் சேர்த்தால் ஷேரு பாய் என்ற பொருளில் பயன்படுத்தப்படுகிறது.
ஷேரு பாயின் வீடியோக்களில் அப்படி என்ன ஸ்பெஷல்?
ஷேரு பாயின் ஒவ்வொரு வீடியோவும் ஒரு குட்டிக் கதையைப் போலவே உருவாக்கப்படுகிறது.
மாஸ் என்ட்ரி: விலை உயர்ந்த காரில் இருந்து இறங்கி, பாதுகாவலர்கள் புடைசூழ கம்பீரமாக நடந்து வருவது போன்ற காட்சிகள்.
கோடிக்கணக்கில் பணம்: ஏலத்தில் மற்றவர்கள் ஆயிரம், லட்சம் எனக் கேட்கும்போது, ஷேரு பாய் கோடிக்கணக்கில் விலை சொல்லி அனைவரையும் அதிர வைப்பது.
ஆடம்பர வாழ்க்கை: அரண்மனை போன்ற வீடு, சொகுசு கார்கள், தனி விமானம் என கற்பனைக்கும் எட்டாத வாழ்க்கை.
குடும்பக் கதைகள்: மகன், நண்பர்கள், பாதுகாவலர்கள் எனப் பல கதாபாத்திரங்களுடன் தொடர்ச்சியான கதைகள்.
குறிப்பாக, சாதாரண விஷயங்களைக்கூட பல கோடி ரூபாய் மதிப்புள்ள விஷயங்களாக மாற்றி, அதில் ஷேரு பாய் காட்டும் அலட்டல் இல்லாத கம்பீரம்தான் ரசிகர்களைச் சிரிக்க வைக்கிறது.
சமூக வலைதளங்களில் ஷேரு பாய்க்கு கிடைக்கும் வரவேற்பு
ஒரு காலத்தில் பூனை, நாய் போன்ற செல்லப்பிராணிகளின் குறும்பு வீடியோக்கள் இணையத்தில் வைரலாகின. அதன்பிறகு AI தொழில்நுட்பத்தில் உருவாக்கப்பட்ட மனித உருவம் கொண்ட விலங்குகளின் வீடியோக்கள் கவனம் பெற்றன. அந்த வரிசையில் இப்போது ஷேரு பாய் தனி இடத்தைப் பிடித்து வருகிறார்.
இதற்குக் காரணம் அவருடைய தோற்றம் மட்டுமல்ல. ஒவ்வொரு வீடியோவிலும் ஒரு கதை இருக்கிறது. ஒரு வீடியோவில் ஏலத்தில் கோடிக்கணக்கில் பணம் கொடுத்து பொருளை வாங்குகிறார். மற்றொரு வீடியோவில் சொகுசு காரில் கம்பீரமாக வருகிறார்.
இன்னொரு வீடியோவில் தனது நண்பர்களுடன் சேர்ந்து நகைச்சுவையான சம்பவங்களில் ஈடுபடுகிறார். இந்த வீடியோக்கள் தொடர்கதையைப் போல அமைந்திருப்பதால், அடுத்த பாகத்தில் என்ன நடக்கப்போகிறது என்ற ஆர்வமும் பார்வையாளர்களிடம் உருவாகிறது.
ஷேரு பாய் தனது மனைவிக்காக கோயம்புத்தூரிலேயே ஒரு பிரம்மாண்டமான பீச் அமைக்க முடிவு செய்தார். ஆனால் கோயம்புத்தூரில் அது முடியாததால் தனது மனைவியின் ஆசையை நிறைவேற்றுவதற்காக ஒட்டுமொத்த கோயம்புத்தூர் நகரத்தையே தூக்கி சென்னைக்கு அருகில் கொண்டு சென்று வைத்துவிடுகிறார் ஷேரு பாய்.
நிஜத்தில் சாத்தியமில்லாத இந்தக் கற்பனைக் காட்சியை AI தொழில்நுட்பம் மூலம் நகைச்சுவையாக உருவாக்கியுள்ளனர். குறிப்பாக, கோயம்புத்தூர் மக்களையும் தமிழ் ரசிகர்களையும் கவரும் வகையில் அமைந்துள்ள இந்த வீடியோ, ஷேரு பாயின் ஆடம்பரத்தையும், எதையும் சாதித்துவிடலாம் என்ற மாஸ் பில்டப்பையும் கலகலப்பாக வெளிப்படுத்துகிறது.
தனது மனைவிக்காக கோயம்புத்தூர் நகரத்தையே சென்னைக்கு அருகில் தூக்கி வைக்கும் அளவுக்கு பில்டப் காட்டும் இவரது வீடியோ வேற லெவல்.
AI தொழில்நுட்பத்தின் அடுத்தகட்ட வளர்ச்சிக்கு ஓர் உதாரணம்
ஷேரு பாய் டிரெண்ட் வெறும் பொழுதுபோக்குடன் முடிந்துவிடவில்லை. செயற்கை நுண்ணறிவு தொழில்நுட்பம் மூலம் கற்பனைக் கதாபாத்திரங்களை உருவாக்கி, அவற்றை வைத்து முழுமையான கதைகளையும் உருவாக்க முடியும் என்பதை இது எடுத்துக்காட்டுகிறது.
ஒரு கதாபாத்திரத்தின் தோற்றத்தை உருவாக்குவது, அதற்குப் பொருத்தமான குரலைச் சேர்ப்பது, உதடசைவுக்கு ஏற்ப வசனங்களைப் பேச வைப்பது, பின்னணி இசை மற்றும் காட்சிகளை இணைப்பது என அனைத்தையும் AI கருவிகள் மூலம் செய்ய முடிகிறது.
இதனால் பெரிய பட்ஜெட், படப்பிடிப்புக் குழு, நடிகர்கள் என எதுவுமே இல்லாமல் தனிநபர்கள்கூட வித்தியாசமான வீடியோக்களை உருவாக்கும் வாய்ப்பு கிடைத்துள்ளது.
அதேநேரத்தில், AI மூலம் உருவாக்கப்பட்ட கற்பனைக் காட்சிகளை உண்மையான சம்பவங்கள் என்று நம்பிவிடக் கூடாது. அவற்றை உருவாக்கியவர்கள் தெளிவாக AI உள்ளடக்கம் என்று குறிப்பிடுவதும் அவசியம்.