Nilgiri Mountain Railway: கடல் மட்டத்திலிருந்து 2,240 மீட்டர் உயரத்தில் இருக்கும் ஊட்டிக்கு வரும் சுற்றுலா பயணிகளை ஈர்க்கக்கூடிய மற்றொரு விஷயம் என்றால் அது ஊட்டி மலை ரயில் பயணம்.
மலைகளின் அரசி என்று அழைக்கப்படும் ஊட்டி இந்தியாவின் மிகவும் பிரபலமான மலைவாசஸ்தலங்களில் ஒன்றாக உள்ளது. அழகிய மலைகள், நினைத்தாலே சிலிர்க்க வைக்கும் குளிர்ச்சியான காலநிலை, பனிபோர்வை போன்ற புல்வெளிகள், ஏரிகள் மற்றும் பசுமையான காடுகள் உள்ளிட்ட பல்வேறு காரணங்களால் தினமும் ஆயிரக்கணக்கான சுற்றுலா பயணிகள் ஊட்டிக்கு படையெடுத்து வருகின்றனர்.
25
மலை ரயில் சேவை
கோடை விடுமுறை மட்டுமின்றி, தொடர் விடுமுறைகள், பண்டிகை காலங்கள் என்றாலே பலரின் நினைவுக்கு வருது ஊட்டியாகும். கடல் மட்டத்திலிருந்து 2,240 மீட்டர் உயரத்தில் இருக்கும் ஊட்டிக்கு வரும் சுற்றுலா பயணிகளை ஈர்க்கக்கூடிய மற்றொரு விஷயம் என்றால் அது ஊட்டி மலை ரயில் பயணம். ஊட்டிக்கு செல்பவர்கள் ஒருமுறையாவது ஊட்டி மலை ரயிலில் பயணிக்க வேண்டும் என்று நினைப்பார்கள். இயற்கை அழகை ரசித்த படி செல்வதால் அதிகளவில் சுற்றுலா பயணிகள் மலை ரயில் சேவையை தேர்வு செய்கின்றனர்.
35
தெற்கு ரயில்வே முக்கிய அறிவிப்பு
இந்நிலையில், நீலகிரி மலை ரயில் நஷ்டத்தில் இயங்கியதால் 2020-ல் ரயில் கட்டணம் உயர்த்தப்பட்ட நிலையில் 6 ஆண்டுகளுக்கு பிறகு மீண்டும் உயர்த்தப்பட்டுள்ளது. இதுகுறித்து தெற்கு ரயில்வே வெளியிட்டுள்ள செய்தி குறிப்பில்: பிரபலமான நீலகிரி மலை ரயில் சேவை 1899-ல் தொடங்கப்பட்டது. 2005-ல் யுனெஸ்கோவால் இது உலகப் பாரம்பரிய தளமாக சேர்க்கப்பட்டது. தற்போது, நீலகிரி மலை ரயில் பாதையில் 3 வகையான ரயில்கள் இயக்கப்படுகின்றன. ஒரு நாளைக்கு 8 பயணங்கள், கோடை மற்றும் பிற விடுமுறை நாட்கள், வார இறுதி நாட்கள், திருவிழாக்களின் போது சிறப்பு ரயில்கள் இயக்கப்படுகின்றன.
நீலகிரி மலை ரயில் பிரிவில் சரக்கு கட்டணம் கணிசமாக அதிகரித்துள்ளது. மேட்டுப்பாளையம் - குன்னூர் இடையே சரக்கு கட்டணம் 204% அதிகரித்துள்ளது. கூடுதலாக, பிற செயல்பாடுகள், பராமரிப்பு செலவுகள் மற்றும் ஊழியர்களின் செலவுகளும் கணிசமாக அதிகரித்துள்ளன. இருப்பினும், வழக்கமான ரயில்களுக்கான டிக்கெட் கட்டணம் கடந்த 2020-ம் ஆண்டு முதல் மாற்றியமைக்கப்படவில்லை.
55
ரயில் கட்டண உயர்வு விவரம்
இதனால் ஏற்படும் வருவாய் இழப்பை நிர்வகிக்க இன்று முதல் வழக்கமான ரயில்களின் அடிப்படைக் கட்டணம் 5 சதவீதம் அதிகரிக்கப்படுகிறது. முதல் வகுப்பு சாதாரண கட்டணம் ரூ.520லிருந்து ரூ.550ஆகவும், முன்பதிவு முதல் வகுப்பு ரூ.600லிருந்து ரூ.630ஆகவும் உயர்ந்துள்ளது. ஏற்கனவே டிக்கெட் முன்பதிவு செய்தவர்களுக்கு கூடுதல் தொகை வசூலிக்கப்படாது என தெரிவிக்கப்பட்டுள்ளது.
