இது தவெகவின் அதிகாரப்பூர்வ கருத்து அல்ல.! நம்பவோ, ஏற்றுக்கொள்ளவோ வேண்டாம்- புஸ்ஸி ஆனந்த் அதிரடி

தமிழக வெற்றிக் கழகத்தின் ஆதரவாளர்கள் என சிலர் ஊடகங்களில் பேட்டி அளிப்பது சர்ச்சையை ஏற்படுத்தியுள்ளது. இதற்கு பதிலளிக்கும் விதமாக, பொதுச்செயலாளர் புஸ்ஸி ஆனந்த் அறிக்கை வெளியிட்டுள்ளார். அதிகாரப்பூர்வமற்றவர்கள் கழகத்தின் பெயரைப் பயன்படுத்தி கருத்து தெரிவிப்பதை நம்ப வேண்டாம் என அவர் கேட்டுக்கொண்டுள்ளார்.

தமிழகத்தில் திராவிட கட்சிகளுக்கு போட்டியாக களத்தில் இறங்கியுள்ளது தவெக, அந்த வகையில் 2026ஆம் ஆண்டு சட்டமன்ற தேர்தல் தான் தங்களது இலக்கு என அறிவித்துள்ளது. அந்த வகையில் சட்டமன்ற தேர்தலை எதிர்கொள்ளும் வகையில் பல வியூகங்களை வகுத்துள்ளது. இந்த நிலையில் தமிழக வெற்றிக்கழகத்தின் ஆதரவாளர்கள் என கூறி தொலைக்காட்சிகளில் சிலர் பேட்டி கொடுத்து வருகிறார்கள். இது சர்ச்சையை ஏற்படுத்தியுள்ளது. இதனையடுத்து தவெக பொதுச்செயலாளர் புஸ்ஸி ஆனந்த் வெளியிட்டுள்ள அறிக்கையில், 

தவெகவின் கருத்து- புஸ்ஸி ஆனந்த் விளக்கம்

 தமிழக வெற்றிக்கழக பொதுச்செயலாளர் புஸ்ஸி ஆனந்த்  வெளியிட்டுள்ள அறிக்கையில், தொலைக்காட்சி, செய்தி ஊடகங்களில் நடைபெறும் விவாத நிகழ்ச்சிகளில் தமிழக வெற்றிக் கழகத்தின் சார்பில் தலைவர் அவர்களால் அதிகாரப்பூர்வமாக அறிவிக்கப்பட்ட கொள்கை பரப்பு மற்றும் செய்தித் தொடர்பு நிர்வாகிகள் தெரிவிக்கும் கருத்துகள் மட்டுமே கழகத்தின் கருத்து மற்றும் நிலைப்பாடாகும்.

தவெகவின் வளர்ச்சியை பொறுக்க முடியவில்லை

தமிழக வெற்றிக் கழகம் என்ற பெயரைக் கழகத் தலைவர் அவர்கள் அறிவித்து, கழகத்தில் உறுப்பினர் சேர்க்கை, மாணவர்களுக்குப் பாராட்டுச் சான்று மற்றும் ஊக்கத் தொகை வழங்கியது, வெற்றிக் கொள்கைத் திருவிழா, கழக ஆண்டு விழா எனத் தமிழக வெற்றிக் கழகம் வீறுநடை போட்டு, மக்களின் பேராதரவுடன் மிகப் பெரிய அளவில் வளர்ந்து வருகிறது. இதனைப் பொறுத்துக்கொள்ள முடியாத சில அரசியல் கட்சிகள், தங்கள் ஆதரவாளர்களை, பத்திரிகையாளர் மற்றும் ஊடகவியலாளர்கள் என்ற போர்வையில்,

தவெகவின் கருத்து அல்ல

தமிழக வெற்றிக் கழகத்தின் ஆதரவாளர்களாகச் சித்திரித்து ஊடக விவாதங்களில் பங்கேற்கச் செய்து, திட்டமிட்ட சில விஷமக் கருத்துகளைத் திணிக்கும் பணியைச் செய்து வருகின்றன. இது வன்மையாகக் கண்டிக்கத்தக்கது. ஊடக விவாதங்களில் பங்கேற்பதற்காக, தமிழக வெற்றிக் கழகத் தலைவர் அவர்களால் அல்லது அவரின் ஒப்புதலோடு தலைமை நிலையச் செயலகத்தால் அதிகாரப்பூர்வமாக அறிவிக்கப்படாதவர்கள், ஊடக விவாதங்களில் கலந்துகொண்டு தெரிவிக்கும் கருத்துகள், தமிழக வெற்றிக் கழகத்தின் அதிகாரப்பூர்வக் கருத்தோ அல்லது நிலைப்பாடோ அல்ல என்பதைக் கழகத் தலைவர் அவர்களின் ஒப்புதலோடு தெரிவித்துக்கொள்கிறேன்.

நம்பவோ ஏற்றுக்கொள்ளவோ வேண்டாம்

எனவே அதிகாரப்பூர்வமற்றவர்கள் கழகத்தின் பெயரைப் பயன்படுத்தி, ஊடக விவாதங்களில் கலந்துகொண்டு தெரிவிக்கும் கருத்து மற்றும் நிலைப்பாடுகளைத் தமிழக மக்களும் கழகத் தோழர்களும் நம்பவோ, ஏற்றுக்கொள்ளவோ வேண்டாம் என்று கேட்டுக்கொள்வதாக புஸ்ஸி ஆனந்த் தெரிவித்துள்ளார்.