இது பட்ஜெட் இல்லை.. மாபெரும் காது குத்தும் விழா..! திமுக அரசை பத்திரிகை அடித்து கலாய்த்த அதிமுக

தமிழக அரசின் இடைக்கால நிதிநிலை அறிக்கை இன்று தாக்கல் செய்யப்படும் நிலையில், இது நிதிநிலை அறிக்கை கிடையாது, மாபெரும் காது குத்தும் விழா என பிரதான எதிர்க்கட்சியான அதிமுக விமர்சித்துள்ளது.

தேர்தலுக்கு முந்தைய இடைக்கால பட்ஜெட்

ஒவ்வொரு ஆண்டும் பிப்ரவரி இறுதி வாரம் அல்லது மார்ச் தொடக்கத்தில் தமிழகத்திற்கான நிதிநிலை அறிக்கை தாக்கல் செய்யப்படுவது வழக்கம். ஆனால் இந்த ஆண்டு அடுத்த சில மாதங்களில் சட்டமன்ற தேர்தல் நடைபெறவுள்ளதால் இடைக்கால பட்ஜெட்டை மாநில நிதித்துறை அமைச்சர் தங்கம் தென்னரசு இன்று தாக்கல் செய்கிறார். விரைவில் தேர்தல் நடைபெறவுள்ளதால் இந்த பட்ஜெட்டில் கவர்ச்சிகரமான அறிவிப்புகள் இடம் பெறலாம் என்ற எதிர்பார்ப்பு அதிகரித்துள்ளது.

மாபெரும் காது குத்தும் விழா

இந்த நிலையில் நிதிநிலை அறிக்கை தொடர்பாக தமிழகத்தின் பிரதான எதிர்க்கட்சியான அதிமுக, இது ஒரு மாபெரும் காது குத்தும் விழா என விமர்சித்துள்ளது. இதனை குறிப்பிட்டு அழைப்பிதழாகவே அச்சிட்டுள்ள அக்கட்சி சட்டமன்ற உறுப்பினர்கள், தங்கள் கைகளில் பத்திரிகையுடன் சட்டமன்றத்திற்கு வந்தனர்.

காது குத்துபவர்., தலைமை தாங்குபவர்..

அந்த பத்திரிகையில் குறிப்பிடப்பட்டுள்ளதாவது, “மாபெரும் காது குத்தும் விழா.. கடந்த நான்கரை ஆண்டுகளாக பட்ஜெட் எனும் பெயரில் தமிழ்நாடு மக்களுக்கு நடத்தப்படும் மாபெரும் காது குத்தும் விழா இந்த வருடமும் வெகு விமரிசையாக நடைபெற உள்ளது.

நாள் பிப்ரவரி 17 – 2026. இடம் - தமிழக சட்டமன்றம். நேரம் காலை 10 மணி முதல்.

இவ்விழாவிற்கு தலைமை தாங்குபவர் மாண்புமிகு தமிழ்நாடு முதலமைச்சர் திரு. மு.க.ஸ்டாலின்.

மாண்புமிகு நிதியமைச்சர் திரு. தங்கம் தென்னரசு அவர்கள் முன்னின்று காது குத்துவார்.

மேற்படி விழாவில் கூவம் சுத்திகரிப்பிற்கு நிதி, சென்னை மழைநீர் வடிகால் திட்டத்திற்கு நிதி, சிங்காரச் சென்னை திட்டத்திற்கு நிதி என்று விதவிதமாக காது குத்தப்படும் என்று மகிழ்ச்சியோடு தெரிவித்துக் கொள்கிறோம்.

பின் குறிப்பு.. சொத்து வரி, வீட்டு வரி, குடிநீர் வரி, மின் கட்டணம் என்று பல்வேறு முறைகளில் “மொய்” வைக்கலாம்” என்று குறிப்பிடப்பட்டுள்ளது.