சென்னை மெட்ரோவின் இரண்டாம் கட்ட திட்டத்தின் கீழ், பூந்தமல்லி முதல் போரூர் வரையிலான புதிய வழித்தடத்தில் 2026 ஜனவரியில் சேவை தொடங்குகிறது. ஒவ்வொரு 6 நிமிடங்களுக்கும் ஒரு ரயில் இயக்கப்படும் என்றும் அறிவிக்கப்பட்டுள்ளது.
சென்னை மாநகரின் போக்குவரத்து தேவையை கருத்தில் கொண்டு, சென்னை மெட்ரோ ரயில் லிமிடெட் (CMRL) தனது இரண்டாம் கட்ட திட்டத்தின் முக்கிய பகுதியாக பூந்தமல்லி முதல் போரூர் வரை புதிய மெட்ரோ சேவையை தொடங்க திட்டமிட்டுள்ளது. இந்த வழித்தடத்தில் உச்ச நேரங்களில் ஒவ்வொரு 6 நிமிடங்களுக்கும் ஒரு ரயில் இயக்கப்படும் என அதிகாரிகள் தெரிவித்துள்ளனர். இந்த சேவை 2026 ஜனவரியில் பொதுமக்கள் பயன்பாட்டிற்கு வர உள்ளது.
25
ஓட்டுநர் இல்லாத முறைக்கு மாற்றப்படும்
பூந்தமல்லி முதல் போரூர் வரை நீளும் இந்த 9 கிலோமீட்டர் பாதை, கலங்கரை விளக்கத்தை இணைக்கும் காரிடார்–4 இன் ஒரு பகுதியாகும். இந்த வழித்தடத்தில் மொத்தம் 13 மூன்று பெட்டிகள் கொண்ட மெட்ரோ ரயில்கள் இயக்கப்படும். தினசரி இயக்கத்திற்காக சுமார் 30 பயிற்சி பெற்ற ஆபரேட்டர்கள் நியமிக்கப்படுவார்கள். எதிர்காலத்தில் இந்த ரயில்கள் முழுமையாக ஓட்டுநர் இல்லாத (Driverless) முறைக்கு மாற்றப்படும் என்றாலும், அது படிப்படியாக மட்டுமே அமல்படுத்தப்படும் என CMRL தெரிவித்துள்ளது.
35
புதிய அனுபவம் தரும் அதிவேக சேவை
சென்னை மெட்ரோவில் இதுபோன்ற அடிக்கடி சேவை புதியது அல்ல. ஏற்கனவே கட்டம்–I மற்றும் அதன் நீட்டிப்புகளில், உச்ச நேரங்களில் ஒவ்வொரு 6 நிமிடங்களுக்கும் ரயில்கள் இயக்கப்பட்டு வருகின்றன. வண்ணாரப்பேட்டை–ஆலந்தூர் போன்ற குறுகிய பாதைகளில் 3 நிமிட இடைவெளியில் கூட ரயில்கள் இயக்கப்படுவது குறிப்பிடத்தக்கது. இதன் தொடர்ச்சியாகவே பூந்தமல்லி–போரூர் பாதையிலும் அடிக்கடி சேவை வழங்கப்படுகிறது.
இந்த புதிய வழித்தடத்தின் இயக்க மேலாண்மை பொறுப்பு டெல்லி மெட்ரோ ரயில் நிறுவனத்திடம் வழங்கப்பட்டுள்ளது. அவர்கள் விரைவில் நிலைய வசதிகளை கையகப்படுத்தி, சோதனை ஓட்டங்கள் மற்றும் பணியாளர் பயிற்சிகளை மேற்கொண்டு வருகின்றனர். புதிய நிலையங்கள், கட்டம்–I நிலையங்களை விட சிறியதாக வடிவமைக்கப்பட்டுள்ளதால், பயணிகள் விரைவாக நடைமேடைகளை அடைய முடியும்.
55
நவீன போக்குவரத்து அனுபவத்தை வழங்கும்
இந்த திட்டத்திற்கு ஆசிய வளர்ச்சி வங்கி (ADB) 240 மில்லியன் அமெரிக்க டாலர் கடனை ஒப்புதல் வழங்கியுள்ளது. இந்த நிதியுதவி மெட்ரோ பாதைகள் 3, 4 மற்றும் 5 ஆகியவற்றின் முக்கிய பிரிவுகளுக்கு பயன்படுத்தப்பட உள்ளது. மொத்தத்தில், இந்த புதிய மெட்ரோ சேவை சென்னை மக்களுக்கு வேகமான, வசதியான மற்றும் நவீன போக்குவரத்து அனுபவத்தை வழங்கும் என எதிர்பார்க்கப்படுகிறது.
