World Cup 2030: அடுத்த உலகக் கோப்பையில் 64 அணிகளா? FIFA தலைவர் கொடுத்த மெகா அப்டேட்!

FIFA World Cup : 2030-ல் நடைபெற உள்ள 100-வது உலகக் கோப்பையை 64 அணிகளுடன் நடத்த FIFA தலைவர் ஜியானி இன்ஃபான்டினோ திட்டமிட்டுள்ளார். இந்த யோசனை தீவிர பரிசீலனையில் உள்ளதாக அவர் தெரிவித்துள்ளார்.

FIFA World Cup expansion

கால்பந்து உலகை மீண்டும் ஒருமுறை பரபரப்பாக்கியிருக்கிறார் FIFA தலைவர் ஜியானி இன்ஃபான்டினோ. 2030-ல் நடக்கப்போகும் 100-வது உலகக் கோப்பையில் அணிகளின் எண்ணிக்கையை 64 ஆக உயர்த்தும் திட்டம் தீவிர பரிசீலனையில் இருப்பதாக அவர் கூறியுள்ளார். அமெரிக்கா, கனடா, மெக்சிகோவில் முதல்முறையாக 48 அணிகளுடன் நடந்த உலகக் கோப்பை மிகப்பெரிய வெற்றி பெற்றதை அடுத்து இந்த யோசனை முன்வைக்கப்பட்டுள்ளது.

2026 உலகக் கோப்பையின் காலிறுதிப் போட்டிகள் முடிந்து, அர்ஜென்டினா, பிரான்ஸ், ஸ்பெயின், இங்கிலாந்து ஆகிய அணிகள் அரையிறுதிக்கு முன்னேறிய உடனேயே இன்ஃபான்டினோ இந்த முக்கிய அறிவிப்பை வெளியிட்டுள்ளார். சுவிஸ் ஊடகமான 'ப்ளூவின்' (Bluewin) க்கு அளித்த பேட்டியில், "உலகக் கோப்பை என்பது ஒரு சில நாடுகளுக்கு மட்டும் சொந்தமானதல்ல," என்று அவர் திட்டவட்டமாகத் தெரிவித்தார்.

64 அணிகளா?

தற்போதைய 48 அணிகள் கொண்ட வடிவத்தை '100 சதவிகித வெற்றி' என்று இன்ஃபான்டினோ குறிப்பிட்டார். "உலகக் கோப்பை என்பது முழு உலகிற்குமானது, ஐரோப்பாவிற்கும் தென் அமெரிக்காவிற்கும் மட்டுமல்ல. உலகக் கோப்பையில் விளையாடுவது ஒவ்வொரு நாட்டின் கனவு. சிறிய நாடுகளுக்கு நாம் வாய்ப்பு கொடுக்கவில்லை என்றால், அவர்கள் தங்கள் கால்பந்து தரத்தை மேம்படுத்துவதற்கான உத்வேகத்தை இழந்துவிடுவார்கள். இந்த உலகக் கோப்பைக்குப் பிறகு, FIFA-வின் சம்பந்தப்பட்ட குழுக்கள் 64 அணிகள் கொண்ட வடிவத்திற்கு மாறுவது குறித்து விரிவாக விவாதிக்கும்," என்று இன்ஃபான்டினோ கூறினார்.

கிளம்பும் எதிர்ப்பு

64 அணிகள் கொண்ட உலகக் கோப்பை நடைமுறைக்கு வந்தால், தற்போதுள்ள சிக்கலான குரூப் நிலை சமன்பாடுகள் (சிறந்த மூன்றாவது இடத்தைப் பிடிக்கும் அணிகளைத் தேர்ந்தெடுப்பது போன்றவை) முற்றிலுமாக நீக்கப்படும். தலா நான்கு அணிகள் கொண்ட 16 குழுக்கள் உருவாக்கப்படும். ஒவ்வொரு குழுவிலும் முதல் இரண்டு இடங்களைப் பிடிக்கும் அணிகள் நேரடியாக நாக்-அவுட் சுற்றுக்கு (ரவுண்ட் ஆஃப் 32) தகுதி பெறும். இதனால், போட்டியின் மொத்த ஆட்டங்களின் எண்ணிக்கை 104-லிருந்து 128 ஆக உயரும். அணிகளின் எண்ணிக்கையை அதிகரிப்பதன் மூலம் அதிக நாடுகளுக்கு உலக அரங்கில் விளையாட வாய்ப்பு கிடைக்கும் என்றாலும், இதற்கு கடுமையான எதிர்ப்புகளும் எழுந்துள்ளன.

அடுத்த உலகக்கோப்பை

ஐரோப்பிய கால்பந்து சம்மேளனமான UEFA, முக்கிய உள்நாட்டு லீக்குகள் மற்றும் வீரர்கள் சங்கங்கள் FIFA-வின் இந்த விரிவாக்க நடவடிக்கையை கடுமையாக எதிர்க்கின்றன. ஏற்கனவே அதிகப்படியான போட்டிகளால் வீரர்கள் கடுமையான உடல் மற்றும் மன அழுத்தத்தில் இருப்பதாக அவர்கள் கூறுகின்றனர். போட்டிகளை மேலும் அதிகரிப்பது வீரர்களின் கெரியரை பாதிக்கும் என்பது அவர்களின் முக்கிய கவலையாக உள்ளது. 2030 உலகக் கோப்பை, வரலாற்றில் முதல்முறையாக மூன்று கண்டங்களில் உள்ள ஆறு நாடுகளில் (ஸ்பெயின், போர்ச்சுகல், மொராக்கோ, உருகுவே, அர்ஜென்டினா, பராகுவே) நடத்த திட்டமிடப்பட்டுள்ளது. இதில் முதல் மூன்று போட்டிகள் மட்டுமே அர்ஜென்டினா, உருகுவே மற்றும் பராகுவேயில் நடைபெறும். தென் அமெரிக்க கால்பந்து கூட்டமைப்பு முன்மொழிந்த இந்த 64 அணிகள் திட்டத்திற்கு FIFA பச்சைக்கொடி காட்டினால், 2030-ஆம் ஆண்டு கால்பந்து வரலாற்றில் மிகப்பெரிய விளையாட்டுத் திருவிழாவாக அது மாறும்.