ஆசிய கோப்பை! வங்கதேசம் போராடி தோல்வி! இந்தியா-பாகிஸ்தான் பைனலில் மோதல்! கோப்பை யாருக்கு?

ஆசியக் கோப்பை சூப்பர் 4 போட்டியில் பாகிஸ்தான் அணி வங்கதேசத்தை தோற்கடித்து பைனலுக்கு சென்றுள்ளது. இதன்மூலம் ஆசிய கோப்பை பைனலில் இந்தியாவும், பாகிஸ்தானும் முதன் முறையாக விளையாட உள்ளன. 

Asia Cup 2025: India vs Pakistan

ஆசியக் கோப்பையின் இறுதிப் போட்டியாளர்களை தீர்மானிக்கும் வாழ்வா சாவா போட்டியில் பாகிஸ்தான் அணி வங்கதேசத்தை வீழ்த்தியது. இதனால் ஆசிய கோப்பை இறுதிப் போட்டியில் இந்தியாவும், பாகிஸ்தானும் முதன்முறையாக மோத உள்ளன. டாஸ் தோற்று முதலில் பேட்டிங் செய்த பாகிஸ்தான், 20 ஓவர்களில் எட்டு விக்கெட் இழப்பிற்கு 135 ரன்கள் எடுத்தது.

பாகிஸ்தான் 135 ரன்கள்

முன்னணி பேட்ஸ்மேன்கள் ஏமாற்றிய நிலையில், 23 பந்துகளில் 31 ரன்கள் எடுத்த முகமது ஹாரிஸ் பாகிஸ்தானின் அதிகப்பட்ச ஸ்கோர் எடுத்தார். முகமது நவாஸ் 15 பந்துகளில் 25 ரன்கள் எடுத்தார். ஷஹீன் அப்ரிடியும் கேப்டன் சல்மான் ஆகாவும் தலா 19 ரன்கள் எடுத்தனர். வங்கதேசத்திற்காக தஸ்கின் அகமது மூன்று விக்கெட்டுகளையும், மெஹ்தி ஹசன் மற்றும் ரிஷாத் ஹொசைன் தலா இரண்டு விக்கெட்டுகளையும் வீழ்த்தினர்.

தடுமாறிய வங்கதேசம்

பின்பு எளிய இலக்கை நோக்கி களமிறங்கிய வங்கதேச அணி தொடக்கத்தில் இருந்தே தடுமாறியது. தொடக்க வீரர் பர்வேஸ் ஹொசைன் எமோன், ஷகின் அப்ரிடி பந்தில் டக் அவுட் ஆனார். இதன்பின்பு டோஹித் ஹிரிதோயயும் (5) ஷகின் அப்ரிடி காலி செய்தார். தொடர்ந்து ஓரளவு சிறப்பாக ஆடிய சைஃப் ஹாசன் (15 பந்தில் 18), மஹேதி ஹசன் (11) என வங்கதேச வீரர்கள் அடுத்தடுத்து ஆட்டமிழந்ததால் அந்த அணி 44/4 என பரிதவித்தது.

பாகிஸ்தான் வெற்றி

ஆனால் இந்த சரிவில் இருந்து அந்த அணியால் மீள முடியவில்லை. நூருல் ஹசன் (11), கேப்டன் ஜேக்கர் அலி (5) அடுத்தடுத்து அவுட் ஆனார்கள். ஓரளவு தாக்குப்பிடித்து ஆடிய ஷமிம் ஹொசைன் 30 ரன்னில் வெளியேறினார். இதன்பின்பு வந்த வீரர்களும் ரன்கள் அடிக்க தடுமாற வங்கதேச அணி 20 ஓவரில் 9 விக்கெட் இழந்து 124 மட்டுமே எடுத்தது. இதன்மூலம் பாகிஸ்தான் 11 ரன்கள் வித்தியாசத்தில் வெற்றி பெற்றது. பாகிஸ்தான் தரப்பில் ஷகீன் அப்ரிடி 3 விக்கெட்டும், சயூப் அயூப் 2 விக்கெட் வீழ்த்தினர்.

இந்தியா-பாகிஸ்தான் பைனல்

இந்த வெற்றியின் மூலம் பாகிஸ்தான் அணி பைனலுக்கு சென்றுள்ளது. இந்தியா ஏற்கெனவே பைனலுக்கு சென்றுள்ள நிலையில், இரு அணிகளும் ஆசிய கோப்பை இறுதிப் போட்டியில் முதன் முறையாக மோத உள்ளன. இந்த போட்டி வருகிற 29ம் தேதி (ஞாயிற்றுக்கிழமை) நடைபெற உள்ளது.