MS Dhoni: “பிளேயரா? மென்டரா?” தோனியின் அடுத்த ரோல் என்ன..? CSK வெளியிட்ட முக்கிய அப்டேட்..!

சிஎஸ்கே அணியில் தோனியின் அடுத்தகட்ட பங்கு குறித்து நிலவி வந்த குழப்பத்திற்கு தற்போது முற்றுப்புள்ளி வைக்கப்பட்டுள்ளது. ஜாகீர் கான் தலைமைப் பயிற்சியாளராக பொறுப்பேற்றுள்ள நிலையில், தோனி வீரராகவே அணியில் தொடர்வார் என சிஎஸ்கே நிர்வாகம் தெரிவித்துள்ளது.

சென்னை அணியின் பயிற்சியாளரான ஜாகீர் கான்..

சென்னை சூப்பர் கிங்ஸ் அணியில் மகேந்திர சிங் தோனியின் அடுத்த கட்டம் குறித்த முக்கிய தகவல் வெளியாகியுள்ளது. முன்னாள் இந்திய வேகப்பந்து வீச்சாளர் ஜாகீர் கான் அணியின் புதிய தலைமைப் பயிற்சியாளராக நியமிக்கப்பட்டுள்ள நிலையில், தோனி வீரராகவே அணியில் தொடருவார் என சிஎஸ்கே நிர்வாகம் உறுதி செய்துள்ளது.

ஸ்டீபன் பிளெமிங் பதவியில் இருந்து விலகியதைத் தொடர்ந்து, அவரது இடத்தை நிரப்ப தோனியின் பெயரும் பரிசீலிக்கப்பட்டதாக தகவல்கள் வெளியாகின. அதேபோல், பல ஆண்டுகளாக அணியின் முடிவுகளில் முக்கியப் பங்கு வகித்து வந்த தோனி, அதிகாரப்பூர்வமாக ஆலோசகர் அல்லது வழிகாட்டி (Mentor) பொறுப்பை ஏற்கலாம் என்றும் செய்திகள் வெளியாகின.

ஆனால், இந்த தகவல்களுக்கு முற்றுப்புள்ளி வைக்கும் வகையில் சிஎஸ்கே நிர்வாக இயக்குநர் காசி விஸ்வநாதன் விளக்கம் அளித்துள்ளார்.

“அவர் ஒரு வீரராக கிடைக்கிறார்” என்று காசி விஸ்வநாதன் The Indian Express நாளிதழிடம் தெரிவித்துள்ளார்.

2026 சீசனில் களமிறங்காத தோனி

காயம் தொடர்பான சில பிரச்சினைகள் காரணமாக தோனி 2026 ஐபிஎல் சீசன் முழுவதையும் தவறவிட்டார். மேலும், இளம் வீரர்கள் மீது கவனம் செல்ல வேண்டும் என்பதற்காக சென்னை சேப்பாக்கத்தில் உள்ள எம்.ஏ. சிதம்பரம் மைதானத்திற்கும் அவர் செல்லாமல் இருந்ததாக தகவல்கள் வெளியாகின.

இதன் மூலம் அணியின் மீது தேவையற்ற கவனம் தனது பக்கம் திரும்புவதை அவர் தவிர்க்க விரும்பியதாக கூறப்பட்டது.

ஜாகீர் கானுடன் தோனியின் பங்கு என்ன?

தோனி அதிகாரப்பூர்வமாக பயிற்சியாளர் அல்லது ஆலோசகர் பொறுப்பை ஏற்கவில்லை என்றாலும், அணியின் முடிவெடுப்புகளில் அவரது அனுபவம் தொடர்ந்து முக்கியத்துவம் பெறும் என எதிர்பார்க்கப்படுகிறது.

ஜாகீர் கானின் நியமனத்திலும் தோனியின் கருத்துக்கு முக்கியத்துவம் இருந்ததாக தகவல்கள் தெரிவிக்கின்றன. குறிப்பாக, ஜாகீர் கானை தோனி நீண்டகாலமாக மதித்து வந்தவர் என்பதால், இருவரும் இணைந்து அணியின் எதிர்காலத் திட்டங்களில் பணியாற்ற வாய்ப்பு இருப்பதாக கூறப்படுகிறது.

தோனிக்கு பிளேயிங் லெவனில் இடம் கிடைக்குமா?

இந்நிலையில், ஜாகீர் கானுக்கு முன் இருக்கும் முக்கியமான கேள்விகளில் ஒன்று தோனியை அணியின் பிளேயிங் லெவனில் எவ்வாறு பயன்படுத்துவது என்பதாகும்.

45 வயதான தோனியின் அனுபவமும் தலைமைத்துவத் திறனும் அணிக்கு மிகப்பெரிய பலமாக இருக்கலாம். அதே நேரத்தில், நீண்ட இடைவெளிக்குப் பிறகு களமிறங்கும்போது அவரது உடற்தகுதி, ஆட்டத்திறன் மற்றும் தொடர்ச்சியான செயல்பாடு ஆகியவையும் கவனத்தில் கொள்ள வேண்டிய அம்சங்களாக இருக்கும்.

இம்பேக்ட் பிளேயர் விதி போன்ற வாய்ப்புகள் இருப்பதால், தோனியை அணியில் பயன்படுத்துவதற்கு சிஎஸ்கேவுக்கு கூடுதல் உத்திகள் இருக்கலாம்.

தோனி - ஜாகீர் கூட்டணி எப்படி இருக்கும்?

சிஎஸ்கே அணியின் அடுத்த கட்டத்தை உருவாக்கும் பொறுப்பு தற்போது ஜாகீர் கான் தலைமையிலான பயிற்சிக் குழுவிடம் உள்ளது. அதேசமயம், அணியின் மூத்த வீரராக தோனியின் அனுபவத்தை எவ்வாறு பயன்படுத்துவது என்பதும் முக்கியமானதாக இருக்கும்.

தோனி வீரராகத் தொடர்வது உறுதியாகியுள்ள நிலையில், அடுத்த ஐபிஎல் சீசனில் அவர் எத்தனை போட்டிகளில் களமிறங்குவார், பிளேயிங் லெவனில் அவருக்கு என்ன பங்கு வழங்கப்படும் என்பதுதான் சிஎஸ்கே ரசிகர்களின் முக்கிய எதிர்பார்ப்பாக உள்ளது.