IPL : அடுத்த 2 மேட்ச் ஜெயிச்சாலும் சென்னை பிளே ஆஃப் போக முடியாதா? சிஎஸ்கே-வுக்கு காத்திருக்கும் ட்விஸ்ட்

IPL Playoff Scenario : நேற்றைய போட்டியில் சென்னை அணி தோற்றதால், 12 போட்டிகளில் 16 புள்ளிகளுடன் புள்ளிப் பட்டியலில் முதல் இடத்தில் இருக்கும் ஆர்சிபி-யின் பிளேஆஃப் வாய்ப்பு உயர்ந்துள்ளது.

IPL Playoff Scenario

லக்னோ: ஐபிஎல் தொடரின் பிளேஆஃப் சுற்றுக்கான போட்டி உச்சக்கட்டத்தை எட்டியுள்ள நிலையில், முன்னாள் சாம்பியனான சென்னை சூப்பர் கிங்ஸ் அணிக்கு பெரும் பின்னடைவு ஏற்பட்டுள்ளது. நேற்று லக்னோ சூப்பர் ஜெயண்ட்ஸ் அணிக்கு எதிரான போட்டியில் படுதோல்வி அடைந்ததால், சென்னையின் பிளேஆஃப் கனவு சிக்கலாகியுள்ளது. இந்தத் தோல்வியால், புள்ளிப் பட்டியலில் ராஜஸ்தான் ராயல்ஸ் அணிக்குக் கீழே, ஆறாவது இடத்திற்கு சென்னை தள்ளப்பட்டுள்ளது. இனி பிளேஆஃப் செல்ல வேண்டுமென்றால், மற்ற அணிகளின் வெற்றி-தோல்வியைப் பொறுத்தே சென்னையின் வாய்ப்பு அமையும்.

சென்னை அணியை விட ஒரு போட்டி குறைவாக விளையாடியுள்ள ராஜஸ்தான் ராயல்ஸ், சென்னையை முந்தி ஐந்தாவது இடத்திற்கு முன்னேறியுள்ளது. இரு அணிகளும் 12 புள்ளிகளுடன் இருந்தாலும், நெட் ரன் ரேட் அடிப்படையில் ராஜஸ்தான் (+0.082) சென்னையை (+0.027) முந்தியுள்ளது. சென்னை நிர்ணயித்த 188 ரன்கள் இலக்கை லக்னோ அணி 16.4 ஓவர்களிலேயே எட்டியதுதான் சென்னையின் ரன் ரேட் சரியக் காரணம்.

ஐபிஎல் பிளே ஆஃப் சான்ஸ்

லக்னோ-சென்னை போட்டிக்குப் பிறகு ஸ்டார் ஸ்போர்ட்ஸ் வெளியிட்டுள்ள புள்ளிவிவரங்களின்படி, அணிகளின் பிளேஆஃப் வாய்ப்புகள் இப்படி உள்ளன: நேற்றைய ஆட்டத்தில் சென்னை தோற்றதால், 12 போட்டிகளில் 16 புள்ளிகளுடன் முதல் இடத்தில் இருக்கும் ஆர்சிபி-யின் வாய்ப்பு 94.5%-லிருந்து 96.1% ஆக உயர்ந்துள்ளது. அதேபோல், 16 புள்ளிகளுடன் இரண்டாம் இடத்தில் உள்ள குஜராத் டைட்டன்ஸ் அணியின் வாய்ப்பு 94.9%-லிருந்து 96.6% ஆக அதிகரித்துள்ளது. மூன்றாம் இடத்தில் உள்ள ஹைதராபாத் அணியின் வாய்ப்பும் 67.4%-லிருந்து 70.3% ஆக உயர்ந்துள்ளது.

பஞ்சாப் ராஜஸ்தானுக்கு அதிக சான்ஸ்

சென்னை தோற்றதால் ராஜஸ்தான் ராயல்ஸ் அணியின் பிளேஆஃப் வாய்ப்பு 47.1%-லிருந்து 51.6% ஆக அதிகரித்துள்ளது. ராஜஸ்தான் அணிக்கு அடுத்த மூன்று போட்டிகள் மும்பை, டெல்லி, லக்னோ அணிகளுடன் இருப்பது அவர்களுக்குச் சாதகமாகப் பார்க்கப்படுகிறது. இன்னும் இரண்டு போட்டிகள் மீதமுள்ள பஞ்சாப் அணியின் வாய்ப்பு 42.7%-லிருந்து 48.8% ஆக உயர்ந்துள்ளது. அந்த அணி ராயல் சேலஞ்சர்ஸ் பெங்களூரு மற்றும் லக்னோ சூப்பர் ஜெயண்ட்ஸ் அணிகளை எதிர்கொள்கிறது. இரண்டிலும் வென்றால், பஞ்சாப் 17 புள்ளிகளைப் பெறும். ஆனால், சென்னை அணி மீதமுள்ள இரண்டு போட்டிகளில் வென்றாலும் அதிகபட்சமாக 16 புள்ளிகளை மட்டுமே பெற முடியும்.

சிஎஸ்கே சரிவு

நேற்று லக்னோவிடம் தோற்றதால், சென்னையின் பிளேஆஃப் வாய்ப்பு செங்குத்தாக சரிந்துள்ளது. போட்டிக்கு முன் 47% ஆக இருந்த வாய்ப்பு, தோல்விக்குப் பிறகு 28.4% ஆகக் குறைந்துள்ளது. சென்னையின் இந்தத் தோல்வி, சிறிய அளவில் பிளேஆஃப் நம்பிக்கை கொண்டிருந்த கொல்கத்தா மற்றும் டெல்லி கேப்பிட்டல்ஸ் அணிகளின் வாய்ப்பையும் சற்று அதிகரித்துள்ளது. கொல்கத்தாவின் வாய்ப்பு 2.6%-லிருந்து 3.1% ஆகவும், டெல்லியின் வாய்ப்பு 2.2%-லிருந்து 3.1% ஆகவும் உயர்ந்துள்ளது.