Hitman Rohit Sharma's 8 World Records: ரோகித் சர்மாவின் பெயரில் உள்ள இந்த 8 உலக சாதனைகளைப் பார்த்தால், ரோகித் வெறும் ஹிட்மேன் என்று அழைக்கப்படுவதில்லை, உண்மையிலேயே ஒரு ஹிட்மேன் என்பதை நீங்கள் அனைவரும் புரிந்துகொள்வீர்கள். அப்படி என்ன 8 உலக சாதனைகள், வாங்க தெரிந்துகொள்வோம்.
2014 ஆம் ஆண்டு இலங்கைக்கு எதிரான ஒருநாள் போட்டியில் ரோகித் சர்மா 264 ரன்கள் குவித்து உலக சாதனை படைத்தார். ஒருநாள் கிரிக்கெட் வரலாற்றில் இதுவே அதிகபட்ச தனிநபர் ஸ்கோர்.
ஒருநாள் போட்டிகளில் அதிக இரட்டை சதங்கள்:
ஒருநாள் கிரிக்கெட்டில் இரட்டை சதம் அடிப்பது எளிதான காரியமல்ல. ஆனால் ஹிட்மேன் ரோஹித் ஒருமுறையல்ல, இருமுறையல்ல, 3 முறை ஒருநாள் கிரிக்கெட்டில் இந்த சாதனையைப் படைத்துள்ளார்.
ஒருநாள் கிரிக்கெட் வரலாற்றில் 8 முறை 150க்கும் அதிகமாக ரன்கள் எடுத்த ஒரே பேட்ஸ்மேன் என்ற உலக சாதனையை ரோகித் சர்மா படைத்துள்ளார்.
சர்வதேச டி20 போட்டிகளில் அதிக ரன்கள்:
டி20 உலகக் கோப்பையை வெல்ல இந்தியாவை வழிநடத்திய கேப்டன் ரோகித் சர்மா, சர்வதேச டி20 கிரிக்கெட்டில் 4,231 ரன்கள் குவித்துள்ளார். இதன் மூலம் சர்வதேச டி20 கிரிக்கெட்டில் அதிக ரன்கள் எடுத்தவர் என்ற பெருமையைப் பெற்றுள்ளார்.
ரோகித் சர்மா இந்தியாவுக்காக மொத்தம் 159 டி20 போட்டிகளில் விளையாடியுள்ளார். இதன் மூலம் சர்வதேச டி20 கிரிக்கெட் வரலாற்றில் அதிக போட்டிகளில் விளையாடிய வீரர் என்ற பெருமையைப் பெற்றுள்ளார்.
சர்வதேச டி20 போட்டிகளில் அதிக சிக்ஸர்கள்:
சர்வதேச டி20 கிரிக்கெட்டில் ரோகித் சர்மா 205 சிக்ஸர்கள் அடித்து அதிக சிக்ஸர்கள் அடித்த உலக சாதனையைப் படைத்துள்ளார். சர்வதேச டி20 கிரிக்கெட்டில் ரோகித் தவிர வேறு எந்த பேட்ஸ்மேனும் 200 சிக்ஸர்களை கூட நெருங்கவில்லை.
சர்வதேச டி20 கிரிக்கெட்டில் ரோகித் சர்மா மொத்தம் 5 சதங்கள் அடித்துள்ளார். இதன் மூலம் ஹிட்மேன் ரோகித் சர்மா அதிக சதங்கள் அடித்தவர்களின் பட்டியலில் ஆஸ்திரேலியா வீரர் கிளென் மேக்ஸ்வெல்லுடன் இணைந்து முதலிடத்தில் உள்ளார்.
சர்வதேச கிரிக்கெட்டில் அதிக சிக்ஸர்கள்:
சர்வதேச கிரிக்கெட் வரலாற்றில் 600க்கும் மேற்பட்ட சிக்ஸர்கள் அடித்த ஒரே பேட்ஸ்மேன் ரோகித் சர்மா. சர்வதேச கிரிக்கெட்டில் ரோகித் சர்மா மொத்தம் 623 சிக்ஸர்கள் அடித்துள்ளார்.