T20 உலகக்கோப்பை: பாகிஸ்தான் முடிவால் ரூ.2,200 கோடி இழப்பு.. தவிக்கும் ஐசிசி.. அடுத்து என்ன நடக்கும்?

பாகிஸ்தான் கிரிக்கெட் வாரியத்தின் ஆண்டு வருமானம் 35.5 மில்லியன் டாலர். ஆனால் இந்த ஒற்றைப் போட்டியால் கிடைக்கும் மொத்த வருமானம் 250 மில்லியன் டாலர்.

இந்தியா-பாகிஸ்தான் போட்டி ரு.2,200 கோடி வருமானம்

T20 உலகக் கோப்பையில் இந்தியா-பாகிஸ்தான் போட்டியைப் புறக்கணிக்க பாகிஸ்தான் எடுத்துள்ள முடிவு, கிரிக்கெட் உலகிற்கு பெரும் நிதி நெருக்கடியை ஏற்படுத்தும் என்று தகவல்கள் தெரிவிக்கின்றன. ஒரு இந்தியா-பாகிஸ்தான் போட்டி மட்டுமே சுமார் 250 மில்லியன் டாலர் (இந்திய மதிப்பில் சுமார் ரூ.2,200 கோடி) வருமானத்தை ஐசிசி-க்கு ஈட்டித் தருகிறது.

விளம்பர வருவாய் மட்டும் ரூ.250 கோடி

இந்தப் போட்டி நடைபெறாமல் போனால், அனைத்து பங்குதாரர்களுக்கும் பெரும் நஷ்டம் ஏற்படும். தொடரின் அதிகாரப்பூர்வ ஒளிபரப்பு உரிமையைக் கொண்டுள்ள 'ஜியோஸ்டார்' ஏற்கனவே ஐசிசியுடனான 3 பில்லியன் டாலர் ஒப்பந்தத்தை மறுபரிசீலனை செய்ய முயற்சித்து வருகிறது. போட்டி ரத்து செய்யப்பட்டால், விளம்பர வருவாயில் மட்டும் 200 கோடி முதல் 250 கோடி ரூபாய் வரை நஷ்டம் ஏற்படலாம்.

10 வினாடி விளம்பரத்துக்கு ரூ.40 லட்சம்

இந்தப் போட்டியின் வெறும் 10 வினாடி கால அளவுள்ள ஒரு விளம்பர ஸ்லாட்டிற்கு 40 லட்சம் ரூபாய் வரை கட்டணம் வசூலிக்கப்படுகிறது. பாகிஸ்தான் கிரிக்கெட் வாரியத்தின் ஆண்டு வருமானம் 35.5 மில்லியன் டாலர். ஆனால் இந்த ஒற்றைப் போட்டியால் கிடைக்கும் மொத்த வருமானம் 250 மில்லியன் டாலர். போட்டியைப் புறக்கணித்தால், ஐசிசி பாகிஸ்தானுக்கு வழங்கும் பங்கில் பெரும் குறைப்பைச் செய்ய வாய்ப்புள்ளது.

ஐசிசி எச்சரிக்கை

இந்த விஷயத்தில் ஐசிசி ஏற்கனவே தனது நிலைப்பாட்டை எடுத்துள்ளது. "தேர்ந்தெடுக்கப்பட்ட போட்டிகளில் மட்டும் விளையாடுவது உலகளாவிய விளையாட்டுப் போட்டியின் அடிப்படைக் கொள்கைகளுக்கு எதிரானது" என்று ஐசிசி தெளிவுபடுத்தியுள்ளது. தொடரின் நம்பகத்தன்மையைப் பாதிக்கும் இத்தகைய நகர்வுகளை தீவிரமாகப் பார்ப்பதாகவும் ஐசிசி எச்சரித்துள்ளது.

வங்கதேசமே மூல காரணம்

வங்கதேச வீரர் முஸ்தாபிசுர் ரஹ்மானை ஐபிஎல்-இல் இருந்து நீக்க பிசிசிஐ அறிவுறுத்தியதே இந்த பிரச்சனைகளின் தொடக்கம். இதற்கு எதிர்ப்பு தெரிவித்து வங்கதேசம் தொடரில் இருந்து விலகியது. வங்கதேசத்திற்கு ஆதரவு தெரிவித்து, பாகிஸ்தான் இந்தியாவிற்கு எதிரான போட்டியைப் புறக்கணிக்க முடிவு செய்தது.

தற்போது பாகிஸ்தான் அணி தொடரின் மற்ற போட்டிகளுக்காக கொழும்புவிற்குப் புறப்பட்டுள்ளது. ஆனால், பிப்ரவரி 15-ம் தேதி நடைபெறும் இந்தியாவிற்கு எதிரான போட்டியில் அவர்கள் விளையாடுவார்களா அல்லது இந்தியாவிற்கு 'வாக்கோவர்' கிடைக்குமா என்பது வரும் நாட்களில் தெரியவரும்.