ராஜஸ்தான் ராயல்ஸ் அணிக்கு எதிரான 38ஆவது லீக் போட்டியின் மூலமாக ஹர்திக் பாண்டியா மும்பை இந்தியன்ஸ் அணிக்காக தனது 100ஆவது ஐபிஎல் போட்டியிலும், ஒரு கேப்டனாக தனது 8ஆவது போட்டியிலும் விளையாடுகிறார்.
நடப்பு ஆண்டுக்கான ஐபிஎல் 2024 கிரிக்கெட் தொடரின் 17ஆவது சீசன் கடந்த மார்ச் 22 ஆம் தேதி பிரம்மாண்டமாக தொடங்கியது. இந்த சீசனில் ரோகித் சர்மா கேப்டன் பொறுப்பிலிருந்து நீக்கப்பட்டு அவருக்குப் பதிலாக ஹோம் அணிக்கு திரும்பிய ஹர்திக் பாண்டியா கேப்டனாக நியமிக்கப்பட்டார்.
இவரது தலைமையிலான மும்பை இந்தியன்ஸ் முதல் 3 போட்டிகளில் தோல்வி அடைந்தது. டெல்லி மற்றும் ஆர்சிபி அணிகளுக்கு இடையிலான போட்டியில் வெற்றி பெற்றது. இதையடுத்து சென்னைக்கு எதிரான போட்டியில் தோல்வி அடைந்த நிலையில், பஞ்சாப் அணிக்கு எதிரான போட்டியில் வெற்றி பெற்றது.
இதுவரையில் விளையாடிய 7 போட்டிகளில் 3 வெற்றியும், 4 தோல்வியும் அடைந்து புள்ளிப்பட்டியலில் 7ஆவது இடத்தில் உள்ளது. தற்போது ஜெய்பூரில் உள்ள சவாய் மான்சிங் ஸ்டேடியத்தில் ராஜஸ்தான் ராயல்ஸ் அணிக்கு எதிரான 38ஆவது லீக் போட்டியில் மும்பை இந்தியன்ஸ் விளையாடி வருகிறது.
இந்தப் போட்டியின் மூலமாக மும்பை இந்தியன்ஸ் அணியின் கேப்டனான ஹர்திக் பாண்டியா கேப்டனாக தனது 8ஆவது போட்டியிலும், மும்பை இந்தியன்ஸ் அணிக்காக தனது 100ஆவது ஐபிஎல் போட்டியிலும் விளையாடுகிறார்.
இதுவரையில் மும்பை இந்தியன்ஸ் அணிக்காக 99 போட்டிகளில் விளையாடி 4 அரைசதங்கள் உள்பட 1617 ரன்கள் எடுத்துள்ளார். அதிகபட்சமாக 91 ரன்கள் எடுத்துள்ளார். மேலும், 46 விக்கெட்டுகளும் கைப்பற்றியிருக்கிறார். இதே போன்று குஜராத் டைட்டன்ஸ் அணிக்காக 31 போட்டிகளில் விளையாடி 833 ரன்களும், 6 அரைசதங்களும் அடித்துள்ளார். மேலும், 11 விக்கெட்டுகளும் கைப்பற்றியிருக்கிறார்.
இதுவரையில் 130 ஐபிஎல் போட்டிகளில் விளையாடிய ஹர்திக் பாண்டியா மொத்தமாக 2450 ரன்கள் எடுத்துள்ளார். மேலும் 10 அரைசதங்களும் எடுத்துள்ளார். அதோடு, 57 விக்கெட்டுகளும் கைப்பற்றியிருக்கிறார் என்பது குறிப்பிடத்தக்கது.
இந்த சீசனில் அவர் விளையாடிய இன்றைய போட்டி உள்பட 8 போட்டிகளில் முறையே 11, 24, 34, 39, 21*, 2, 10, 10 (ஆர்ஆர் போட்டி) என்று மொத்தமாக 151 ரன்கள் எடுத்துள்ளார். மேலும், இன்றைய போட்டி இல்லாமல் 15 ஓவர்கள் வீசி 165 ரன்கள் கொடுத்துள்ளார். அதோடு, 4 விக்கெட்டுகள் மட்டுமே கைப்பற்றியுள்ளார் என்பது குறிப்பிடத்தக்கது.
சேனலை கிளிக் செய்து பின்தொடரவும்