மோடியின் ராஜதந்திரங்களை புரிந்து கொள்ளுங்கள்..! ராகுல் காந்தியை வெளுத்தெடுத்த அமெரிக்க பாடகி..!

ராகுல் இப்படிப் புரிந்துகொள்வார் என்று நான் எதிர்பார்க்கவில்லை. ஏனென்றால் இந்தியாவின் பிரதமராக இருப்பதற்கான புத்திசாலித்தனம் அவரிடம் இல்லை. நீங்கள் மட்டுமே பார்வையாளர்களாக இருக்கும் ஐ ஹேட் இந்தியா சுற்றுப்பயணத்தில் இருந்து திரும்பி வருவது நல்லது

வரிவிதிப்பு தொடர்பாக அமெரிக்க-இந்திய உறவுகளில் தற்போது பதற்றம் நிலவுகிறது. இதற்கிடையில், அமெரிக்க ஜனாதிபதி டொனால்ட் டிரம்ப் இந்தியா-பாகிஸ்தான் போர் நிறுத்தம், ரஷ்யாவிற்கு கச்சா எண்ணெய் விற்பனை செய்வதை நிறுத்துவதற்கான இந்தியாவின் முடிவு உட்பட ஏராளமான வெற்று வாதங்களை வைத்து வருகிறார். டிரம்பின் இந்த பேச்சுகள் இந்தியாவிலும் அரசியல் சூட்டை அதிகரித்துள்ளன. இந்நிலையில், அமெரிக்க ஹாலிவுட் நடிகையும், பாடகியுமான மேரி மில்பென் மீண்டும் இந்தியாவில் பரபரப்பாக பேசப்பட்டு வருகிறார்.

பிரதமர் மோடி, அமெரிக்க ஜனாதிபதி டொனால்ட் டிரம்பிற்கு பயப்படுவதாக சமீபத்தில் காங்கிரஸ் தலைவர் ராகுல் காந்தி சமீபத்தில் குற்றம் சாட்டினார். இதற்கு இப்போது, ​​அமெரிக்க பாப் பாடகி மேரி மில்பென், ராகுல் காந்தியை கடுமையாக சாடியுள்ளார்.

ஒரு கிறிஸ்தவ குடும்பத்தில் பிறந்த பாடகி மேரி மில்பென் அமெரிக்காவின் ஓக்லஹோமாவில் வளர்ந்தார். அவரது தாயார் பெந்தேகோஸ்தே இசை போதகராக பணியாற்றினார். தனது தாயைக் கவனித்த அவர், இசையில் ஆர்வத்தை வளர்த்துக் கொண்டார். அவர் தனது 5 வயதில் பாடத் தொடங்கினார். ஜார்ஜ் புஷ், பராக் ஒபாமா, டொனால்ட் டிரம்ப் மற்றும் ஜோ பைடன் ஆகிய நான்கு தொடர்ச்சியான அமெரிக்க ஜனாதிபதிகளுக்கு மில்பென் தேசிய கீதம், தேசபக்தி இசையை நிகழ்த்தினார்.

அமெரிக்க பாப் பாடகி மேரி மில்பென் முதன்முதலில் 2020 ஆம் ஆண்டு சுதந்திர தினத்தன்று இந்திய தேசிய கீதத்தைப் பாடியபோது இந்தியாவில் முக்கியத்துவம் பெற்றார். தீபாவளி கொண்டாட்டங்களுக்காக "ஓம் ஜெய் ஜகதீஷ் ஹரே" பாடியதன் மூலம் அவர் இந்தியர்களின் இதயங்களில் நீடித்த தாக்கத்தை ஏற்படுத்தினார். அமெரிக்காவிலும், இந்தியாவிலும் மில்லியன் கணக்கான மக்கள் இந்த வீடியோவைப் பார்த்தனர். 2022 ஆம் ஆண்டில், சுதந்திர தின கொண்டாட்டங்களில் நிகழ்ச்சி நடத்த மில்பென் இந்தியாவிற்கு அழைக்கப்பட்டார். ஜூன் 2023-ல், அமெரிக்காவிற்கு வருகை தந்திருந்த பிரதமர் மோடிக்காக மேரி மில்பென் தேசிய கீதத்தை பாடியபோது அமெரிக்காவிலும் இந்தியாவிலும் பாராட்டுக்களை குவித்தார்.

ஒரு வீடியோவில், அவர் பேசியபோது, ‘‘நான் ஏன் பிரதமர் மோடியை ஆதரிக்கிறேன். ஏன் இந்தியாவின் விவகாரங்களை இவ்வளவு நெருக்கமாகப் பின்பற்றுகிறேன் என்று பலர் கேட்கிறார்கள். பதில் எளிது. நான் இந்தியாவை நேசிக்கிறேன். மேலும் இந்தியா , அதன் குடிமக்களின் முன்னேற்றத்திற்கு பிரதமர் மோடி சிறந்த தலைவர் என்று நான் நம்புகிறேன்" எனத் தெரிவித்துள்ளார்.

பிரதமர் மோடி அமெரிக்க அதிபர் டொனால்ட் டிரம்பைப் பார்த்து பயப்படுகிறார் என்று குற்றம் சாட்டிய ராகுல் காந்தியின் பேச்சை மேற்கோள் காட்டி பேசிய மேரி மில்பென் தனது எக்ஸ்தள பக்கத்தில் "நீங்கள் சொல்வது தவறு, ராகுல் காந்தி. பிரதமர் மோடி ஜனாதிபதி டொனால்ட் டிரம்பைப் பார்த்து பயப்படவில்லை. பிரதமர் மோடி நீண்டகால உத்தியைப் புரிந்துகொள்கிறார். அமெரிக்காவுடனான அவரது ராஜதந்திரம் முக்கியமானது. டொனால்ட் டிரம்ப் எப்போதும் அமெரிக்காவின் நலன்களை முதன்மைப்படுத்துவது போல, பிரதமர் நரேந்திர மோடி இந்தியாவிற்கு சிறந்ததைச் செய்கிறார். அதை நான் பாராட்டுகிறேன். நாட்டுத் தலைவர்கள் அதைத்தான் செய்கிறார்கள். அவர்கள் தங்கள் நாட்டிற்கு சிறந்ததைச் செய்கிறார்கள், சொல்கிறார்கள்."

நீங்களும் இப்படித்தான் வழிநடத்துவீர்கள் என்று நான் எதிர்பார்க்கிறேன். நீங்கள் இதை இப்படிப் புரிந்துகொள்வீர்கள் என்று நான் எதிர்பார்க்கவில்லை. ஏனென்றால் இந்தியாவின் பிரதமராக இருப்பதற்கான புத்திசாலித்தனம் உங்களிடம் இல்லை. நீங்கள் மட்டுமே பார்வையாளர்களாக இருக்கும் உங்கள் "ஐ ஹேட் இந்தியா" சுற்றுப்பயணத்தில் இருந்து திரும்பி வருவது நல்லது’’ எனத் தெரிவித்துள்ளார்.