Indian Railways: நீலம் டூ ரெட்.. ரயில்களின் நிறம் மாறியதன் ரகசியம்.. பின்னணியில் மாஸ் டெக்னாலஜி!

Indian Railways: இந்திய ரயில் பெட்டிகள் பெரும்பாலானவை நீல நிறத்தில் இருந்து சிகப்பு நிறத்துக்கு மாறி விட்டன. வெறும் கலர் சேஞ்ச் மட்டுமில்லாது மாற்றத்துக்கான பின்னணி காரணத்தை பார்ப்போம்.

சிவப்பு நிறத்துக்கு மாறிய ரயில் பெட்டிகள்

இந்திய ரயில்களில் பயணம் செய்யும்போது, அடர் நீல நிறப் பெட்டிகளைப் பார்த்துப் பழகிய நம்மில் பலருக்கும் இப்போது ஒரு மாற்றம் தெரிந்திருக்கும். இப்போது பெரும்பாலான ரயில்கள் பிரகாசமான சிவப்பு நிறப் பெட்டிகள் வலம் வருகின்றன. இது வெறும் பெயின்ட் வேலை இல்லை என்பதுதான் இங்கே விஷயம்; இந்திய ரயில்வேயின் பாதுகாப்பு மற்றும் தொழில்நுட்பத்தில் நிகழ்ந்திருக்கும் ஒரு முக்கியப் பாய்ச்சல் இது.

பல தசாப்தங்களாக பயன்பாட்டில் இருந்த அந்த நீல நிறப் பெட்டிகள், சென்னையில் உள்ள ஒருங்கிணைந்த ரயில் பெட்டி தொழிற்சாலையில் (ICF) தயாரிக்கப்பட்டவை. 1950-களின் தொழில்நுட்பத்தில், எஃகு கொண்டு உருவாக்கப்பட்டவை. ஆனால், தற்போது பயன்படுத்தப்படும் சிவப்பு நிறப் பெட்டிகள், ஜெர்மன் தொழில்நுட்பத்தில் உருவான LHB (Linke Hofmann Busch) வகையைச் சேர்ந்தவை.

பாதுகாப்பு அம்சமே பிரதானம்

LHB பெட்டிகளின் மிக முக்கியமான அம்சம், அதன் மேம்பட்ட பாதுகாப்பு அமைப்புதான். பழைய ICF பெட்டிகளில் விபத்து நேர்ந்தால், ஒரு பெட்டி மற்றொரு பெட்டியின் மீது ஏறி பெரும் சேதத்தையும், உயிரிழப்புகளையும் ஏற்படுத்தும் அபாயம் இருந்தது. ஆனால், LHB பெட்டிகளில் உள்ள 'ஆன்டி-கிளைம்பிங்' தொழில்நுட்பம், விபத்தின்போது பெட்டிகள் ஒன்றோடு ஒன்று மோதினாலும், ஒன்றன்மீது ஒன்று ஏறுவதைத் தடுத்துவிடும். இது பயணிகளின் பாதுகாப்பை பன்மடங்கு அதிகரிக்கிறது.

மேலும், பழைய பெட்டிகளில் இருந்த ஏர் பிரேக்குகளுக்குப் பதிலாக, LHB பெட்டிகளில் நவீன டிஸ்க் பிரேக்குகள் பொருத்தப்பட்டுள்ளன. இதனால், அதிக வேகத்தில் சென்றாலும் ரயிலை குறைந்த தூரத்திலேயே பாதுகாப்பாக நிறுத்த முடியும். இது ரயிலின் ஒட்டுமொத்த இயக்கப் பாதுகாப்பை மேம்படுத்துகிறது.

வேகம் முதல் வசதி வரை.. மாறும் பயண அனுபவம்

வேகத்தின் LHB பெட்டிகள்தான் முன்னணியில் இருக்கின்றன. ICF பெட்டிகள் மணிக்கு 110 கி.மீ வேகத்தில் செல்ல வடிவமைக்கப்பட்ட நிலையில், LHB பெட்டிகளால் மணிக்கு 160 கி.மீ வேகம் வரை எளிதாகப் பயணிக்க முடியும். துருப்பிடிக்காத ஸ்டெயின்லெஸ் ஸ்டீல் கொண்டு தயாரிக்கப்படுவதால், எடை குறைவாகவும், அதே சமயம் அதிக உறுதியுடனும் இவை இருக்கின்றன.

பயணிகளின் வசதியிலும் பெரிய மாற்றம் நிகழ்ந்துள்ளது. LHB பெட்டிகளில் உள்ள மேம்பட்ட ஹைட்ராலிக் சஸ்பென்ஷன், பயணத்தின்போது ஏற்படும் குலுக்கல்களையும், அதிர்வுகளையும் பெருமளவில் குறைக்கிறது. இதனால், பயணத்தின்போது சத்தம் குறைவாகவும், பயணம் மிகவும் சௌகரியமாகவும் இருக்கிறது.

நிறம் மாறியதன் பின்னணி என்ன?

பாதுகாப்பு மற்றும் தொழில்நுட்ப மேம்பாடு காரணமாக, 2018-ம் ஆண்டுக்குப் பிறகு ICF பயணிகள் பெட்டிகளின் உற்பத்தியை இந்திய ரயில்வே முழுமையாக நிறுத்திவிட்டது. அதற்குப் பதிலாக, அனைத்து புதிய ரயில்களும் LHB பெட்டிகளுடனே தயாரிக்கப்படுகின்றன. பழைய நீல நிறப் பெட்டிகளில் இருந்து புதிய LHB பெட்டிகளை எளிதாக அடையாளம் காணவே ஆரம்பத்தில் சிவப்பு நிறம் பயன்படுத்தப்பட்டது. 

இப்போது, அந்த சிவப்பு நிறமே இந்திய ரயில்வேயின் நவீனமயமாக்கலின் அடையாளமாக மாறியிருக்கிறது. ஆக, அடுத்த முறை நீங்கள் சிவப்புப் பெட்டி ரயிலில் ஏறும்போது, அது வெறும் நிற மாற்றம் அல்ல, பாதுகாப்பான மற்றும் மேம்பட்ட பயணத்திற்கான உத்தரவாதம் என்பதை நினைவில் கொள்ளலாம்.